ജ്യോതിഷരത്നം വേണു മഹാദേവ്

എല്ലാ മലയാള മാസത്തിലെയും ആദ്യം വരുന്ന തിങ്കളാഴ്ചയെ മുപ്പെട്ട് തിങ്കൾ എന്ന് അറിയപ്പെടുന്നു. ഒരു സാധാരണ തിങ്കളാഴ്ച വ്രതാനുഷ്ഠാനത്തെക്കാൾ ഇരട്ടിഫലം മാസാദ്യത്തിലെ തിങ്കളാഴ്ചകളിൽ വ്രതം നോറ്റാൽ ലഭിക്കും എന്നാണ് വിശ്വാസം. ഉമാ മഹേശ്വര പ്രീതി നേടാൻ ഉത്തമദിവസമായ തിങ്കളാഴ്ച പാർവതീ സമ്മേതനായ ശിവഭഗവാനെ ഭജിച്ചാൽ തൽക്ഷണം ആഗ്രഹങ്ങൾ സഫലമാകുമത്രേ. 2022 ആഗസ്റ്റ് 22 തിങ്കളാഴ്ച വരുന്ന ഈ ചിങ്ങത്തിലെ മുപ്പെട്ട് തിങ്കളിന് മറ്റൊരു പ്രത്യേകതയുമുണ്ട്. ഏകാദശിയും മുപ്പെട്ടു തിങ്കളും ഏകാദശിയും ഒന്നിച്ചു വരുന്നു എന്ന പ്രത്യേകത.

അങ്ങനെ തികച്ചും ദിവ്യമായ ഈ ദിവസം ശിവപാർവതി പ്രീതിക്കൊപ്പം വിഷ്ണു പ്രീതിയും നേടാൻ ശ്രേഷ്ഠമാണ്. അതിനാൽ അന്നത്തെ ഉപാസകൾക്ക് ഇരട്ടിഫലം ഉറപ്പ്.
ശിവപാർവതി പ്രീതികരമായ മുപ്പെട്ട് തിങ്കൾ വ്രതം നോറ്റാൽ എല്ലാ ദാമ്പത്യക്ലേശവും മാറിക്കിട്ടും. ഭദ്രമായ കുടുംബ ജീവിതത്തിനും വിവാഹ ഭാഗ്യത്തിനും മാത്രമല്ല ജാതകത്തിലെ ചന്ദ്രദോഷം മാറാനും വൈധവ്യ ദോഷ നിവാരണത്തിനും കുടുംബ ശ്രേയസിനും മുപ്പെട്ട് തിങ്കൾ വ്രതം എടുക്കുക നല്ലതാണ്.

ചിങ്ങത്തിലെ കറുത്ത പക്ഷ ഏകാദശിയായ അജ ഏകാദശിയാണ് തിങ്കളാഴ്ച സമാഗതമാകുന്നത്. ആനന്ദ ഏകാദശി എന്നും ഈ ഏകാദശി അറിയപ്പെടന്നു. ഈ രണ്ടു വിശേഷങ്ങൾക്കും വ്രതം നോക്കുന്നവർ ആഗസ്റ്റ് 21 ഞായറാഴ്ച ഒരിക്കലെടുക്കണം. ഉച്ചയ്ക്ക് മാത്രം അരിയാഹാരം. മറ്റ് സമയങ്ങളിൽ പഴങ്ങളോ ലഘുവായി ഗോതമ്പ് ഭക്ഷണമോ കഴിച്ച് ഭഗവത് സ്മരണയോടെ കഴിയണം. മത്സ്യമാംസം കഴിക്കരുത്. വ്രതദിവസം പൂർണ്ണ ഉപവാസം പറ്റിയാൽ നല്ലത്. അല്ലെങ്കിൽ ഒരിക്കൽ ആചരിക്കാം. മുപ്പെട്ട് തിങ്കളാഴ്ച നോൽക്കുന്നവർ ശിവക്ഷേത്രവും ആനന്ദ ഏകാദശി ആചരിക്കുന്നവർ വിഷ്ണു ക്ഷേത്ര ദർശനവും നടത്തി വഴിപാടുകൾ കഴിച്ച് പ്രാർത്ഥിക്കണം. ഓം നമഃ ശിവായ മന്ത്രം രണ്ടു ദിവസവും കുറഞ്ഞത് 108 തവണ ജപിക്കണം. പാർവതി ദേവിയെ ധ്യാനിച്ച് ഓം ഹ്രീം ഉമായൈ നമഃ ജപിക്കുന്നതും നല്ലത്. ഏകാദശി ആചരിക്കുന്നവർ ഓം നമോ നാരായണായ , ഓം നമോ ഭഗവതേ വാസുദേവായ തുടങ്ങിയ വിഷ്ണു മന്ത്രങ്ങളാണ് ജപിക്കേണ്ടത്.

പാർവതീ പരമേശ്വരന്മാരെ ഒരുമിച്ചു ഭജിക്കാവുന്ന സ്തോത്രമാണ് ശങ്കരാചാര്യ വിരചിതമായ ഉമാ മഹേശ്വര സ്തോത്രം. ഉമാ മഹേശ്വര സ്തോത്രം ചൊല്ലി ഭജിച്ചാൽ സർവസൗഭാഗ്യങ്ങളും ദീർഘായുസ്സും മംഗളവും ഉണ്ടാകും എന്നാണ് ഫലശ്രുതി. സന്ധ്യയ്ക്കു നെയ് വിളക്കിനു മുന്നിൽ ഇരുന്നു ഉമാ മഹേശ്വര സ്തോത്രം ജപിക്കുന്നത് ഇരട്ടി ഫലദായകമാണ്. ഇതിനൊപ്പം ഏത് ശിവ പാർവതി മന്ത്രവും സ്തോത്രവും ജപിക്കാം.

ശിവാഷ്ടോത്തരം, ശിവ സഹസ്രനാമം, ലളിതാ സഹസ്രനാമം ഇവ ഇതിൽ ചിലത് മാത്രമാണ്. ജലധാര, കുവളദളാർച്ച, സ്വയംവര പുഷ്പാഞ്ജലി, ഉമാ മഹേശ്വര
പൂജ ഇവയാണ് ഈ ദിനം നടത്താവുന്ന വഴിപാടുകളിൽ പ്രധാനം. പിറ്റേന്ന് കുളിച്ച് ശിവക്ഷേത്ര ദർശനം നടത്തി തീർത്ഥം സേവിച്ച് വ്രതം അവസാനിപ്പിക്കാം.

ഉമാ മഹേശ്വര സ്‌തോത്രം
1
നമഃ ശിവാഭ്യാം നവയൗവനാഭ്യാം
പരസ്പരാശ്ലിഷ്ടവപുര്‍ധരാഭ്യാം
നഗേന്ദ്രകന്യാവൃഷകേതനാഭ്യാം
നമോ നമഃ ശങ്കരപാര്‍വതീഭ്യാം
2
നമഃ ശിവാഭ്യാം സരസോത്സവാഭ്യാം
നമസ്‌കൃതാഭീഷ്ടവരപ്രദാഭ്യാം
നാരായണേനാര്‍ച്ചിതപാദുകാഭ്യാം
നമോ നമഃ ശങ്കരപാര്‍വതീഭ്യാം
3
നമഃ ശിവാഭ്യാം വൃഷവാഹനാഭ്യാം
വിരിഞ്ചിവിഷ്ണ്വിന്ദ്രസുപൂജിതാഭ്യാം
വിഭൂതിപാടീര വിലേപനാഭ്യാം
നമോ നമഃ ശങ്കരപാര്‍വതീഭ്യാം
4
നമഃ ശിവാഭ്യാം ജഗദീശ്വരാഭ്യാം
ജഗത്പതിഭ്യാം ജയവിഗ്രഹാഭ്യാം
ജംഭാരിമുഖൈ്യ രഭിവന്ദിതാഭ്യാം
നമോ നമഃ ശങ്കരപാര്‍വതീഭ്യാം
5
നമഃ ശിവാഭ്യാം പരമൗഷധാഭ്യാം
പഞ്ചാക്ഷരീപഞ്ചര രഞ്ജിതാഭ്യാം
പ്രപഞ്ചസൃഷ്ടിസ്ഥിതിസംഹൃതാഭ്യാം
നമോ നമഃ ശങ്കരപാര്‍വതീഭ്യാം
6
നമഃ ശിവാഭ്യാമതിസുന്ദരാഭ്യാം
അത്യന്തമാസക്തഹൃദംബുജാഭ്യാം
അശേഷലോകൈക ഹിതങ്കരാഭ്യാം
നമോ നമഃ ശങ്കരപാര്‍വതീഭ്യാം
7
നമഃ ശിവാഭ്യാം കലിനാശനാഭ്യാം
കങ്കാളകല്യാണവപുര്‍ധരാഭ്യാം
കൈലാസശൈലസ്ഥിതദേവതാഭ്യാം
നമോ നമഃ ശങ്കരപാര്‍വതീഭ്യാം
8
നമഃ ശിവാഭ്യാമശുഭാപഹാഭ്യാം
അശേഷലോകൈകവിശേഷിതാഭ്യാം
അകുണ്ഠിതാഭ്യാം സ്മൃതിസംഭൃതാഭ്യാം
നമോ നമഃ ശങ്കരപാര്‍വതീഭ്യാം
9
നമഃ ശിവാഭ്യാം രചിതാഭയാഭ്യാം
രവീന്ദു വൈശ്വാനരലോചനാഭ്യാം
രാകാശശാങ്കാഭമുഖാംബുജാഭ്യാം
നമോ നമഃ ശങ്കരപാര്‍വതീഭ്യാം
10
നമഃ ശിവാഭ്യാം ജനമോഹനാഭ്യാം
ജരാമൃതിഭ്യാം ച വിവര്‍ജിതാഭ്യാം
ജനാര്‍ദനാബ്‌ജോദ്ഭവപൂജിതാഭ്യാം
നമോ നമഃ ശങ്കരപാര്‍വതീഭ്യാം
11
നമഃ ശിവാഭ്യാം വിഷമേക്ഷണാഭ്യാം
ബില്വച്ഛദാമല്ലികദാമഭൃദ് ഭ്യാം
ശോഭാവതീശാന്തവതീശ്വരാഭ്യാം
നമോ നമഃ ശങ്കരപാര്‍വതീഭ്യാം
12
നമഃ ശിവാഭ്യാം പശുപാലകാഭ്യാം
ജഗത്ത്രയീരക്ഷണബദ്ധഹൃദ് ഭ്യാം
സമസ്തദേവാസുരപൂജിതാഭ്യാം
നമോ നമഃ ശങ്കരപാര്‍വതീഭ്യാം

സ്‌തോത്രം ത്രിസന്ധ്യം ശിവപാര്‍വതീഭ്യാം
ഭക്ത്യാ പഠേദ്ദ്വാദശകം നരോ യഃ
സ സര്‍വസൗഭാഗ്യഫലാനി ഭുംക്തേ
ശതായുരന്തേ ശിവലോകമേതി
ജ്യോതിഷരത്നം വേണു മഹാദേവ്
+91 89217 09017

Story Summary: Significance of Muppettu Thinkal Vritham along with Thiruvathira and Ananda Ekadeshi

Copyright 2022 Neramonline.com. All rights reserved