വിദ്യദായകനും മംഗല്യദായകനുമായ മലയിൻകീഴപ്പന് തിരുവാഭരണച്ചാർത്ത്
( നേരം ഓൺ ലൈൻ ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വിശേഷങ്ങൾക്കായി ക്ലിക്ക് ചെയ്യൂ : neramonline.com )
മംഗള ഗൗരി
തിരുവനന്തപുരം: മലയിൻകീഴ് ശ്രീകൃഷ്ണസ്വാമി
ക്ഷേത്രത്തിൽ തിരുവുത്സവം കൊടിയേറി. മീനത്തിലെ തിരുവോണം ആറാട്ടായി എട്ട് ദിവസത്തെ ഉത്സവമാണ് ഇവിടെ നടക്കുന്നത്. 2025 മാർച്ച് 25 ചൊവ്വാഴ്ച രാത്രി കുഴയ്ക്കാട് ദേവീക്ഷേത്രത്തിലേക്ക് ആറാട്ടെഴുന്നള്ളി ഉത്സവം സമാപിക്കും. 18 ന് ചൊവ്വാഴ്ച രാത്രിയിൽ തൃക്കൊടിയേറ്റ് നടന്ന ഉത്സവത്തിൻ്റെ ഭാഗമായി ബുധനാഴ്ച വൈകിട്ട് തിരുവാഭരണം ചാർത്തിയുള്ള ദീപാരാധനയുണ്ട്. മലയം ശിവക്ഷേത്രത്തിൽ നിന്നാണ്
തിരുവാഭരണ ഘോഷയാത്ര തുടങ്ങിയത്. വൈകിട്ട് ക്ഷേത്രത്തിൽ എത്തിച്ച തിരുവാഭരണം ചാർത്തിയുള്ള ദീപാരാധന നടന്നു. മൂന്നാം ഉത്സവം മുതൽ അഞ്ചാം ഉത്സവം വരെ ഉത്സവബലി ദർശനമുണ്ട്. മാർച്ച് 23 ഞായറാഴ്ച ലക്ഷദീപം നടക്കും. 24 നാണ് പള്ളിവേട്ട . ക്ഷേത്ര തന്ത്രി തെക്കേടത്ത് കുഴിക്കാട്ട് പരമേശ്വരൻ വാസുദേവൻ ഭട്ടതിരിപ്പാട്, മേൽശാന്തി കെ വിഷ്ണു പോറ്റി ശാന്തി മനു രാമനാഥൻ, ഉപദേശക സമിതിയുടെ എൽ അജിത് കുമാർ, വി വി സുരേഷ് കുമാർ, സബ് ഗ്രൂപ്പ് ഓഫീസർ വിനോദ് എന്നിവരാണ് ഉത്സവ ചടങ്ങുകൾക്ക്
നേതൃത്വം നൽകുന്നത്.
അത്ഭുത അനുഭവങ്ങൾ
തിരുവല്ലാഴപ്പൻ എന്നറിയപ്പെടുന്ന മലയിൻകീഴ്
ശ്രീകൃഷ്ണ സ്വാമിയുടെ മുന്നിൽ ഉള്ളുരുകി നടത്തുന്ന പ്രാർത്ഥനകൾക്ക് ഭഗവാനിൽ നിന്നും ലഭിക്കുന്ന പ്രതികരണം അത്യത്ഭുതകരമാണ്. അത്തരത്തിൽ വ്യക്തിപരമായ അനുഭവങ്ങൾ ഇല്ലാത്ത ഭക്തർ ഇവിടെ വിരളമാണ്. ഒരിക്കൽ ഈ മതിലകത്ത് പ്രവേശിക്കുന്ന ഏതൊരാളും ലഹരിക്കടിമപ്പെട്ടതുപോലെ ഇവിടുത്തെ ദാസനായിത്തീരുന്നു – തന്ത്രി ഭട്ടതിരിപ്പാട് പറഞ്ഞു.
അമരാവതിക്ക് തുല്യം
മലയിൻകീഴ് ശ്രീകൃഷ്ണ സ്വാമിക്ഷേത്രത്തിലെ പ്രതിഷ്ഠാ സങ്കല്പം വിദ്യദായകനും മംഗല്യദായകനുമായ ശ്രീകൃഷ്ണ സ്വാമിയാണ്. വളരെ സവിശേഷതകളുള്ള വിഗ്രഹമാണ്
ക്ഷേത്രത്തിലുള്ളത്. സ്ത്രീകൾ ഇവിടെ നാലമ്പലത്തിൽ പ്രവേശിക്കാറില്ല. തിരുവല്ലാ ശ്രീവല്ലഭ ക്ഷേത്രവുമായി മലയിൻകീഴപ്പന് ബന്ധങ്ങൾ ഉള്ളതായി പറയപ്പെടുന്നു. വില്വമംഗലം സ്വാമിയാർ പൂജിച്ചിരുന്ന ശ്രീകൃഷ്ണസ്വാമി
വിഗ്രഹമാണ് ഇവിടെ പ്രതിഷ്ഠിച്ചിട്ടുള്ളതെന്ന് ഐതിഹ്യം. കണ്ണശ്ശ കവികളിലെ കണ്ണശ്ശ മാധവപണിക്കർ പതിനഞ്ചാം ശതകത്തിൽ ഈ ക്ഷേത്രനടയിൽ വച്ചാണ് ഭഗവത് ഗീത സംസ്കൃതത്തിൽ നിന്നും മലയാളത്തിലേക്ക് മൊഴിമാറ്റിയത്. ലോകത്ത് ആദ്യമായാണ് ഭഗവത് ഗീത മറ്റൊരു ഭാഷയിലേക്ക് മൊഴിമാറ്റം ചെയ്യപ്പെട്ടത്. തന്റെ ഭാഷാ ഭഗവത് ഗീതയിൽ തിരുവല്ലാഴപ്പൻ വാഴുന്ന മലയിൻകീഴിനെ അമരാവതിക്ക് തുല്യമായി അദ്ദേഹം വർണ്ണിക്കുന്നു.
ദക്ഷിണ ഗുരുവായൂർ
ദക്ഷിണ ഗുരുവായൂരെന്നും മലയിൻകീഴ് ക്ഷേത്രം
അറിയപ്പെടുന്നു. പഞ്ച ലോഹനിർമ്മിതമായ ശംഖ്, ചക്ര, ഗദാ, പദ്മധാരിയായ ചതുർബാഹു പ്രതിഷ്ഠ. കിഴക്കോട്ട് ക്ഷേത്ര ദർശനം. ശിവൻ, ഗണപതി, ശാസ്താവ്, നാഗം അനന്തൻ, ബ്രഹ്മരക്ഷസ് ഉപദേവതകൾ. ഇപ്പോൾ തിരുവിതാംകൂർ ദേവസ്വം ബോർഡിന്റെ നിയന്ത്രണത്തിലുള്ള ക്ഷേത്രം തിരുവനന്തപുരത്ത് നിന്ന് കാട്ടാക്കടയിലേക്കുള്ള വഴിയിലാണ് സ്ഥിതി ചെയ്യുന്നത്.
Story Summary: Malayinkeezhu Sree Krishna Swami Temple Annual festival
ആത്മീയ വിശേഷങ്ങളും ജ്യോതിഷ പ്രവചനങ്ങളും സംബന്ധിച്ച വാര്‍ത്തകള്‍ അപ്പപ്പോള്‍ ലഭിക്കാന്‍, അസ്ട്രോ ജി, നേരം ഓൺലൈൻ ആപ് ഡൗണ്‍ലോഡ് ചെയ്യുക : AstroG App
Copyright 2025 Neramonline.com. All rights reserved
