പൈങ്കുനി ഉത്രത്തിന് മഹാലക്ഷ്മിയെ ഭജിച്ചാൽ ഐശ്വര്യം, ധനസമൃദ്ധി
( നേരം ഓൺ ലൈൻ ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വിശേഷങ്ങൾക്കായി ക്ലിക്ക് ചെയ്യൂ : neramonline.com )
ജ്യോതിഷരത്നം വേണു മഹാദേവ്
മഹാവിഷ്ണുവിന്റെ ധർമ്മപത്നിയായ മഹാലക്ഷ്മി ഐശ്വര്യം, ധനം എന്നിവ സമ്മാനിച്ച് അനുഗ്രഹിക്കുന്ന ശുക്രന്റെ അധിദേവതയാണ്. പൈങ്കുനിമാസത്തിലെ ഉത്രം നക്ഷത്രത്തിലാണ് ലക്ഷ്മീദേവി അവതരിച്ചതെന്ന് ഒരു ഐതിഹ്യമുണ്ട്. അതുകൊണ്ട് മീനമാസത്തിലെ ഉത്രത്തിന് ലക്ഷ്മീപൂജ നടത്തുന്നത് ഐശ്വര്യപ്രദമായി കരുതുന്നു. 2025 ഏപ്രിൽ 11 വെള്ളിയാഴ്ചയാണ് പൈങ്കുനിഉത്രം. മഹാലക്ഷ്മി പ്രധാനമായ വെള്ളിയാഴ്ച പൈങ്കുനി ഉത്രവും വരുന്നത് ഏറെ വിശേഷമാണ്.
അലങ്കാരപ്രിയയായ ലക്ഷ്മി ഭഗവതിക്ക് വെള്ളിയാഴ്ചകളിൽ കമനീയമായ വർണ്ണങ്ങളിലുള്ള സുഗന്ധപുഷ്പങ്ങൾ കൊണ്ട് അർച്ചന നടത്തുന്നതും ശ്രീസൂക്തം കൊണ്ട് പുഷ്പാഞ്ജലി കഴിക്കുന്നതും ധനവർദ്ധനവിന് നല്ലതാണ്. വെള്ളിയാഴ്ച ദിവസമാണ് ലക്ഷ്മി ഉപാസയ്ക്ക് ഏറ്റവും നല്ലത്. ലക്ഷ്മി ദേവിയുടെ ചിത്രത്തിനു മുന്നിൽ നെയ് വിളക്ക് കൊളുത്തി മഹാലക്ഷ്മി അഷ്ടോത്തരം ജപിക്കുന്നത്
സമ്പത്ത് വർദ്ധിക്കുന്നതിനും ജീവിത പുരോഗതിക്കും ഉത്തമമാണ്. എല്ലാ ദിവസവും രാവിലെയും വൈകിട്ടും ഇത് ജപിക്കണം. ദേവിയുടെ തിരുഅവതാര ദിവസം, നവരാത്രി, വെള്ളിയാഴ്ച എന്നീ വിശേഷദിനങ്ങളിൽ ഈ ജപം മുടക്കരുത്. പ്രശസ്ത ഗായകൻ മണക്കാട് ഗോപൻ ആലപിച്ച മഹാലക്ഷ്മി അഷ്ടോത്തരം കേൾക്കാം:
ധനാഭിവൃദ്ധിക്ക് ലക്ഷ്മീ മന്ത്രങ്ങൾ
മഹാലക്ഷ്മി സമ്മേതനായ ശ്രീമഹാവിഷ്ണുവിന്റെ അനുഗ്രഹം നേടുകയാണ് ധനാഭിവൃദ്ധിക്കും സാമ്പത്തിക ദുരിത മോചനത്തിനും മറ്റൊരു വഴി. ആത്മാർത്ഥമായി നിരന്തരം പ്രാർത്ഥിച്ചാൽ മഹാലക്ഷ്മിയും വിഷ്ണുവും വേഗം പ്രസാദിക്കും. ലക്ഷ്മീവിനായക സങ്കല്പത്തിലുള്ള ഗണപതി പൂജയാണ് ധനപരമായ മേന്മ ലഭിക്കുന്നതിന് സഹായിക്കുന്ന മറ്റൊരു ആരാധനാ മാർഗ്ഗം. ഗണപതി പ്രീതിയിലൂടെ ഐശ്വര്യലബ്ധിക്കുള്ള തടസങ്ങൾ അകറ്റുമ്പോൾ ലക്ഷ്മീദേവി അതിവേഗം പ്രസാദിക്കും. ലക്ഷ്മീ ദേവിയുടെ ചിത്രത്തിനു മുന്നിൽ നെയ് വിളക്ക് കൊളുത്തി കമലാ മന്ത്രം ജപിക്കുന്നത് സമ്പത്ത് വർദ്ധിക്കുന്നതിനും ഐശ്വര്യത്തിനും ഉത്തമമാണ്. രാവിലെയും വൈകിട്ടും 1008 തവണ ഇത് ജപിക്കണം. മറ്റ് മന്ത്രങ്ങൾ 108 തവണ ദിവസവും ഒരു നേരമെങ്കിലും ജപിക്കുക.
ധനവർദ്ധനവിന് മഹാലക്ഷ്മി പ്രീതി നേടാൻ സഹായിക്കുന്ന ചില ലക്ഷ്മീ മന്ത്രങ്ങൾ:
ലക്ഷ്മീ നാരായണ മന്ത്രം
ഓം ശ്രീലക്ഷ്മി നാരായണായ നമ:
ലക്ഷ്മീ ഗണേശ മന്ത്രം
ഓം ഗം ശ്രീം സർവ സിദ്ധി പ്രദായെ ശ്രീം ഗം നമ:
മഹാലക്ഷ്മീ മന്ത്രം
ഓം ശ്രീം ഹ്രീം ശ്രീം കമലേ കമലായെ പ്രസീദ പ്രസീദ ഓം ശ്രീം ഹ്രീം ശ്രീം മഹാലക്ഷ്മിയൈ നമ:
കമലാ മന്ത്രം
കുബേരത്വം ധനാദീശ ഗൃഹതേ കമലാ സ്ഥിത
താം ദേവിം പ്രേഷയ ത്വാം ഷു മദ് ഗൃഹതേ നമോ നമ:
ശ്രീചക്ര പൂജ ചെയ്താൽ ധനസമൃദ്ധി
സർവാനുഗ്രഹദായിനിയായ ശ്രീ ലളിതാംബികയുടെ ചെെതന്യമുള്ള ശ്രീ ചക്രം ഉത്തമനായ കർമ്മിയെ സമീപിച്ച് വിധിപ്രകാരം തയ്യാറാക്കി വീട്ടിലെ പൂജാമുറിയിൽ സ്ഥാപിക്കുന്നത് ഐശ്വര്യസിദ്ധിക്കും സമ്പത്ത് വർദ്ധിക്കുന്നതിനും സഹായിക്കും. ലളിതാ സഹസ്രനാമാവലി പാരായണം ചെയ്തു കൊണ്ട് നിത്യവും ശ്രീചക്ര പൂജ ചെയ്താൽ ധനം കുന്നു കൂടും.
സൗന്ദര്യലഹരി ശ്ലോക ജപം
സൗന്ദര്യ ലഹരിയിലെ ശ്ലോകം 33 നിത്യവും ജപിക്കുന്നതും വെള്ളിയാഴ്ച തോറും ലളിതാസഹസ്രനാമം ചെല്ലുന്നതും
അളവറ്റ തരത്തിൽ ധനവർദ്ധനവിന് സഹായിക്കും. ജന്മ നാൾ ദിവസം ക്ഷേത്രത്തിൽ ശ്രീസൂക്താർച്ചന ലക്ഷ്മീ നാരായണ പുജ എന്നിവ ചെയ്യുന്നത് ഐശ്വര്യത്തിന് നല്ലതാണ്.
സൗന്ദര്യലഹരി ശ്ലോകം 33
സ്മരം യോനിം ലക്ഷ്മീം ത്രിതയമിദമാദൗതവമനോർ-
ന്നിധായൈകേ നിത്യേ ! നിരവധിമഹാഭോഗരസികാ:
ഭജന്തി ത്വാം ചിന്താമണി ഗുണനിബദ്ധാക്ഷവലയാ:ശിവാഗ്‌നൗ ജൂഹന്ത്വസുരഭി ഘൃതധാരാഹുതിശതൈ:
ജ്യോതിഷരത്നം വേണു മഹാദേവ്
+91 9847475559
Story Summary: Paikuni Utram: Thiru Avathara day of Goddess Sree Maha Lakshmi. Powerful Lakshmi Mantras for fortune and wealth
ആത്മീയ വിശേഷങ്ങളും ജ്യോതിഷ പ്രവചനങ്ങളും സംബന്ധിച്ച വാര്‍ത്തകള്‍ അപ്പപ്പോള്‍ ലഭിക്കാന്‍, അസ്ട്രോ ജി, നേരം ഓൺലൈൻ ആപ് ഡൗണ്‍ലോഡ് ചെയ്യുക : AstroG App
Copyright 2025 Neramonline.com. All rights reserved
