ജ്യോതിഷ ചക്രവർത്തി പെരിങ്ങോട് ശങ്കരനാരായണൻ

അഷ്ടമിരോഹിണി ദിവസം ഭാഗവതം പാരായണം ചെയ്യുന്നത് ഐശ്വര്യവർദ്ധനവിനും കുടുംബ അഭിവൃദ്ധിക്കും ധനസമൃദ്ധിക്കും ഉത്തമമാണ്. ആചാര്യ വിധിപ്രകാരം രണ്ട് യാമവും രണ്ട് നാഴികയുമാണ് ശ്രീകൃഷ്ണജയന്തിക്ക് ഭാഗവതം പാരായണം ചെയ്യേണ്ടത്. അതായത് 6 മണിക്കൂർ 48 മിനിട്ട്. ഒരു യാമത്തിന്റെ ദൈർഘ്യം മൂന്നുമണിക്കൂർ.

ഒരു നാഴിക 24 മിനിട്ട്. അപ്പോൾ ഇത്തവണ 2020 സെപ്തംബർ 10 വ്യാഴാഴ്ച അഷ്ടമിരോഹിണി ദിവസം വൈകിട്ട് 6 മണിക്ക് ഭാഗവത പാരായണം തുടങ്ങി രാത്രി 12 മണി 48 മിനിട്ടിന് അവസാനിപ്പിക്കാം
ഇതിനിടയിൽ ഭാഗവതം ദശമസ്‌കന്ധമാണ് നിർബന്ധമായും വായിക്കേണ്ടത്. കൃഷ്ണ ഭക്തരെ സംബന്ധിച്ചിടത്തോളം ദശമസ്‌കന്ധമാണ് ഏറ്റവും പ്രധാനം. ശ്രീകൃഷ്ണന്റെ ജനനം മുതലുള്ള പ്രധാന സംഭവങ്ങളെല്ലാം വർണ്ണിക്കുന്നത് ഈ സ്കന്ദത്തിലാണ്. കൃഷ്ണന്റെ ശൈശവ, ബാല്യ, കൗമാരങ്ങളിലെ ലീലകൾ, അഹങ്കാരമൂർത്തികളായ കംസൻ, ശിശുപാലൻ മുതലായവരെയും ആസുര പ്രകൃതികളായ അവരുടെ കിങ്കരന്മാരെയും നശിപ്പിച്ചത് – ഇതെല്ലാം ദശമത്തിലാണ്.
അതിനാലാണ് അഷ്ടമി രോഹിണി ദിനത്തിൽ ദശമസ്കന്ദം തീർച്ചയായും വായിക്കണമെന്ന് വിധിച്ചിരിക്കുന്നത്. ഈ സ്കന്ദം നിശ്ചിത സമയത്തിനുളളിൽ വായിച്ച് തീർക്കാൻ കഴിഞ്ഞില്ലെങ്കിൽ വിഷമിക്കണ്ടാ, കഴിയുന്നത്ര വായിക്കുക.

കരാരവിന്ദേന പദാരവിന്ദം
മുഖാരവിന്ദേ വിനിവേശയന്തം
വടസ്യ പത്രസ്യ പുടേ ശയാനം
ബാലം മുകുന്ദാം മനസാസ്മരാമി

വില്വമംഗലം സ്വാമിയാർ രചിച്ച മുകുന്ദാഷ്ടകത്തിലെ ആദ്യത്തെ ഈ ധ്യാനശ്ലോകം അഷ്ടമിരോഹിണി നാൾ ചൊല്ലുന്നത് ഐശ്വര്യപ്രദമാണ്; പാപദുരിത – ദോഷ ശാന്തികരവും മുക്തി പ്രദായകവുമാണ്. ഒരു അരയാലിലയിൽ കാൽ പെരുവിരൽ മുഖത്തോട് അടുപ്പിച്ചു വച്ച് ശയിക്കുന്ന ശ്രീകൃഷ്ണന്റെ ശൈശവരൂപമാണ് ശ്ലോകത്തിലെ ഇതിവൃത്തം.

ശ്രീകൃഷ്ണ ഭഗവാനുമായി എങ്ങനെ ബന്ധപ്പെട്ടാലും മോക്ഷം സിദ്ധിക്കും. കാമാദ് ദ്വേഷാദ് ഭയാ സ്നേഹാദ് എന്ന ശ്ലോകം വർണ്ണിക്കുന്നത് ഇതാണ് : കാമംകൊണ്ട് ഗോപസ്ത്രീകളും ദ്വേഷം കൊണ്ട് ശിശുപാലാദികളും ഭയംകൊണ്ട് കംസനും സ്‌നേഹംകൊണ്ട് യാദവരും മോക്ഷപ്രാപ്തിക്ക് അർഹരായി.

നാരായണ നമ: എന്ന മന്ത്രം ജപിക്കുന്നവർ വിഷ്ണുവിന്റെ പാദാരവിന്ദങ്ങളോട് ചേരുന്നതാണ്. സർവ്വ ദേവനമസ്‌കാരം കേശവം പ്രതിഗച്ഛതി എന്നാണ് പ്രമാണം. ഏത് ദേവനെ ആരാധിച്ചാലും ആരാധിക്കപ്പെടുന്നത് കേശവനെ അതായത് കൃഷ്ണനെ തന്നെയാകുന്നു. മറ്റൊന്നു കൊണ്ടും തീരാത്ത സംസാരദുഃഖം ഈ നാമ ജപത്തോടെ തീരുന്നതാണ്. ആഗ്രഹസാഫല്യത്തിലും ഒടുവിൽ ജന്മസായൂജ്യം നേടാനും കൂടുതൽ ശ്രീകൃഷ്ണ ചൈതന്യം പ്രസരിക്കുന്ന അഷ്ടമിരോഹിണി നാളിൽ കഴിയുന്നത്ര നേരം നാരായണനാമം ജപിക്കുക. നാരായണ നാമജപം പാപങ്ങളെല്ലാം തീർക്കും. ദാരിദ്രവും വിശപ്പും അകറ്റും. ദു:ഖങ്ങൾ തീരും, സങ്കടങ്ങൾ അവസാനിപ്പിക്കും.
വാക് വൈഭവം കൂടും. നാവിൽ നിന്നും നല്ല വാക്കുകൾ പൊഴിയും . അന്ത്യ കാലത്ത് ഗോവിന്ദ പാദാംബുജസേവ ചെയ്യും. അതിനുവേണ്ടി എപ്പോഴും നാരായണനെ നമുക്ക് പ്രാർത്ഥിക്കാം:

കൃഷ്ണായ വാസുദേവായ
ദേവകി നന്ദനായച
നന്ദ ഗോപകുമാരായ
ഗോവിന്ദായ നമോനമ:
നന്ദനം വസുദേവസ്യ
നന്ദഗോപസ്യനന്ദനം
യശോദാനന്ദനം വന്ദേ!
ദേവകീനന്ദനം സദാ

ജ്യോതിഷ ചക്രവർത്തി പെരിങ്ങോട് ശങ്കരനാരായണൻ,
റിട്ട. ബി എസ് എൻ എൽ എൻജിനീയർ,
കുന്നംകുളം, + 91 944740 4003