ജ്യോതിഷരത്നം ആറ്റുകാൽ ദേവീദാസൻ
ശനിദോഷങ്ങളകറ്റാൻ ഏറ്റവും നല്ല ദിവസങ്ങളിൽ ഒന്നാണ് പൈങ്കുനി ഉത്രം. ശബരിമല ശ്രീ അയ്യപ്പ സ്വാമിയുടെ അവതാരദിനമായ ഈ ദിവസം മുതൽ 21 ദിവസം തുടർച്ചയായി ശാസ്താ പഞ്ചരത്ന സ്തോത്രം കഴിയുന്നത്ര തവണ ജപിച്ചാൽ എല്ലാ ശനി ദോഷവും പമ്പ കടക്കും. ശങ്കരാചാര്യർ രചിച്ച ദിവ്യ സ്തോത്രമാണ് ശാസ്താ പഞ്ചരത്നം. അല്ലെങ്കിൽ തന്നെ ഇത് നിത്യേന ജപിക്കുന്നത് ശനിദോഷത്തിന് ഉത്തമ പരിഹാരമാണ്. ഈ സ്തുതി എന്നും ജപിക്കുന്ന ഭക്തരിൽ പ്രസാദിക്കുന്ന ശാസ്താവ് എല്ലാ ഐശ്വര്യവും നൽകി അവരെ അനുഗ്രഹിക്കും എന്നാണ് ശാസ്താ പഞ്ചരത്നത്തിന്റെ ഫലശ്രുതിയിൽ പറയുന്നത് :

ശബരിമല അയ്യപ്പ സ്വാമിയുടെ ആറാട്ടു നടക്കുന്ന പൈങ്കുനി ഉത്രം കലിയുഗ വരദനായ അയ്യപ്പസ്വാമിക്ക് മാത്രമല്ല ശിവനും പാർവതിക്കും സുബ്രഹ്മണ്യനും മഹാലക്ഷ്മിക്കുമെല്ലാം പ്രധാനമാണ്. അയ്യപ്പസ്വാമിക്കും മഹാലക്ഷ്മിക്കും ഇത് അവതാര ദിനമാണെങ്കിൽ ശിവ പാർവതിമാർക്കും പുത്രനും തൃക്കല്യാണ ദിവസമാണ്.

മീനത്തിലെ ഉത്രം ശബരിമലയിൽ മാത്രമല്ല എല്ലാ അയ്യപ്പ – ധർമശാസ്താ ക്ഷേത്രങ്ങളിലും വഴിപാടുകളും വിശേഷാൽ പൂജകളുമായാണ് ആചരിക്കുന്നത്. പൈങ്കുനി ഉത്രം നാളിലെ അയ്യപ്പ ദർശനത്തിനും വഴിപാടുകൾക്കും പൂജകൾക്കും സവിശേഷ ഫലസിദ്ധി ഉണ്ട്. ശനിയുടെ അധിദേവതയായ, ഹരിഹര പുത്രനായ ധർമ്മ ശാസ്താവിൽ വിലയം പ്രാപിച്ച അയ്യപ്പനെ ഭജിച്ചാൽ ശനിദോഷങ്ങളെല്ലാം ശമിക്കും. ശനിദോഷ പരിഹാരത്തിനായി ശാസ്താക്ഷേത്രത്തിൽ എല്ലാ ശനിയാഴ്ചയും ഉത്രം നക്ഷത്രത്തിലും മണ്ഡല – മകര വിളക്ക് കാലത്തും നീരാജനം, എള്ളുപായസം വഴിപാട് വളരെ ഫലപ്രദമാണ്. ശാസ്താ പ്രീതിക്ക് ജപിക്കേണ്ട മന്ത്രങ്ങൾ:

മൂലമന്ത്രം
ഓം ഘ്രൂം നമ: പരായ ഗോപ്ത്രേ

ശാസ്താസ്തുതി
ഭൂതനാഥ സദാനന്ദ
സർവഭൂത ദയാപര
രക്ഷരക്ഷ മഹാബാഹോ
ശാസ്ത്രേ തുഭ്യം നമോനമഃ

ശാസ്തൃ ഗായത്രി
ഭൂതനാഥായ വിദ്മഹേ
ഭവപുത്രായ ധീമഹി
തന്നോ ശാസ്താ
പ്രചോദയാത്

ശാസ്താ പഞ്ചരത്ന സ്തോത്രം
ലോകവീരം മഹാപൂജ്യം
സര്‍വ്വരക്ഷാകരം വിഭും
പാര്‍വതീ ഹൃദയാനന്ദം
ശാസ്താരം പ്രണമാമ്യഹം

വിപ്രപൂജ്യം വിശ്വവന്ദ്യം
വിഷ്ണുശംഭു പ്രിയം സുതം
ക്ഷിപ്രപ്രസാദനിരതം
ശാസ്താരം പ്രണമാമ്യഹം

മത്തമാതംഗ ഗമനം
കാരുണ്യാമൃതപൂരിതം
സര്‍വ്വവിഘ്നഹരം ദേവം
ശാസ്താരം പ്രണമാമ്യഹം

അസ്മത് കുലേശ്വരം
ദേവമസ്മച്ഛത്രു വിനാശനം
അസ്മദിഷ്ട പ്രദാതാരം
ശാസ്താരം പ്രണമാമ്യഹം

പാണ്ഡ്യേശവംശതിലകം
കേരളേ കേളിവിഗ്രഹം
ആര്‍ത്തത്രാണപരം ദേവം
ശാസ്താരം പ്രണമാമ്യഹം

പഞ്ചരത്നാഖ്യമേതദ്യോ
നിത്യം ശുദ്ധ: പഠേന്നര:
തസ്യ പ്രസന്നോ ഭഗവാൻ
ശാസ്താവസതി മാനസേ

ജ്യോതിഷരത്നം ആറ്റുകാൽ ദേവീദാസൻ

91 9847575559

Story Summary: Panguni Uthiram : The Day of incarnation of Lord Ayyappan