മംഗളഗൗരി
ത്രയോദശി തിഥി ശനിയാഴ്ച സന്ധ്യയ്ക്ക് വരുന്ന ദിവസമാണ് ശനി പ്രദോഷമായി കണക്കാക്കുന്നത്. ഈ
ശനിയാഴ്ച, 2024 ഏപ്രിൽ 6 ന് ഈ വർഷത്തെ ആദ്യ ശനി പ്രദോഷം സമാഗതമാകുന്നു. ഗ്രഹദോഷങ്ങളിൽ നിന്നും മുക്തിനേടാൻ പ്രദോഷ ദിവസം വ്രതമെടുത്ത് ശിവപാർവ്വതി പൂജ ചെയ്യുന്നത് ശ്രേഷ്ഠമാണ്. പ്രത്യേകിച്ച് ശനിദോഷം അകറ്റാനുള്ള വിശേഷശക്തി ശനിപ്രദോഷ വ്രതാനുഷ്ഠാനത്തിനുണ്ട്. കറുത്തപക്ഷത്തിലെ ശനിയാഴ്ച വരുന്ന പ്രദോഷവ്രതമാണെങ്കിൽ ഏറ്റവും മഹത്തരവും അനുഗ്രഹദായകവുമായി കണക്കാക്കുന്നു.
ശനിപ്രദോഷ വ്രതം നോറ്റ് ഉമാമഹേശ്വരന്മാരെ ഭജിച്ചാൽ മരണഭയവും രോഗവും അകലുകയും അളവറ്റ സമ്പദ് സമൃദ്ധിയും ലഭിക്കുകയും ചെയ്യും.

കറുത്തപക്ഷത്തിലും വെളുത്തപക്ഷത്തിലുമായി ഒരു മാസം രണ്ട് പ്രദോഷം ഉണ്ട്. രണ്ട് പ്രദോഷത്തിലും ഭക്തർ വ്രതം അനുഷ്ഠിക്കും. കറുത്തപക്ഷ പ്രദോഷം മാത്രം അനുഷ്ഠിക്കുന്നവരുമുണ്ട്. സാധാരണ പ്രദോഷവ്രതം അനുഷ്ഠിക്കുന്നതിന്റെ ഇരട്ടി ഫലം നൽകുന്നതാണ് ശനി പ്രദോഷം. കറുത്തപക്ഷത്തിൽ ശനിയാഴ്ച വരുന്ന
മഹാ ശനിപ്രദോഷമാകട്ടെ നാലിരട്ടി ഫലദായമാണ് വ്രതമെടുക്കാൻ കഴിയാത്തവർ അന്ന് ക്ഷേത്രത്തിൽ ദർശനം നടത്തി വഴിപാടുകൾ കഴിപ്പിച്ച് പ്രാർത്ഥിക്കണം. പ്രദോഷപൂജയിൽ പങ്കെടുക്കുന്നതും വിശിഷ്ടമാണ്.

ശിവപ്രീതിക്ക് അനുഷ്ഠിക്കുന്ന വ്രതങ്ങളിൽ ഏറ്റവും ഫലദായകമാണ് പ്രദോഷവ്രതം. ദോഷം ഇല്ലാതാക്കുക എന്നാണ് പ്രദോഷം കൊണ്ട് അർത്ഥമാക്കുന്നത്. പ്രദോഷ ദിവസം സന്ധ്യയിൽ പാർ‌വതിദേവിയെ സന്തോഷിപ്പിക്കാൻ ശിവഭഗവാൻ നടരാജനായി നൃത്തം ചെയ്യുമ്പോൾ സകല ദേവീദേവന്മാരും അവിടെ സന്നിഹിതരാകുമെന്നാണു വിശ്വാസം. അതിനാൽ പ്രദോഷവ്രതം അനുഷ്ഠിച്ചാൽ എല്ലാ ദേവതകളുടെയും അനുഗ്രഹം ലഭിക്കും. ശിവപാർ‌വതിമാർ‌ ഏറ്റവും പ്രസന്നരായിരിക്കുന്ന പ്രദോഷസന്ധ്യയിൽ ശിവഭജനം നടത്തുന്നതും കൂവളത്തില കൊണ്ട് ശിവന് അർച്ചന നടത്തുന്നതും സന്താനലാഭം, ആയുരാരോഗ്യം, സന്തുഷ്ട കുടുംബജീവിതം എന്നിവ സമ്മാനിക്കും. “സന്തതിക്കും യശസ്സിനും ധനത്തിനും സന്തതം ശോഭനം പ്രദോഷികം വ്രതം” എന്നാണ് ശിവപുരാണത്തിൽ പറയുന്നത്.

ദേവിക്ക് പൗർണ്ണമി പോലെ വിഷ്ണുവിന് ഹരിവാസരം പോലെ മഹാദേവന് പ്രാധാന്യമുള്ള പ്രദോഷവേളയിൽ
ഭക്ഷണം കഴിക്കുക, പാചകം ചെയ്യുക, വിനോദങ്ങളിൽ ഏർപ്പെടുക എന്നിവ പാടില്ല. ക്ഷേത്രത്തിലാണെങ്കിലും അല്ലെങ്കിലും ഈ നേരത്ത് ഓം നമഃ ശിവായ കഴിയുന്നത്ര തവണ ജപിക്കണം.

പ്രദോഷദിനത്തിന്റെ തലേന്ന് വ്രതം ആരംഭിക്കണം. അന്ന് ഒരിക്കൽ നിർബന്ധമാണ്. പ്രദോഷദിനത്തിൽ രാവിലെ എണ്ണ തേക്കാതെ കുളിക്കണം. പഞ്ചാക്ഷരി ജപത്തോടെ ശിവക്ഷേത്രദർശനം നടത്തി കൂവളത്തില കൊണ്ട് അർച്ചന, കൂവളമാല സമർപ്പണം, പിൻവിളക്കിൽ എണ്ണ, ജലധാര എന്നിവ നടത്തുക. പകൽ മുഴുവൻ ഉപവാസം നന്ന്. അതിന് സാധിക്കാത്തവർക്ക് ഉച്ചയ്ക്ക് ക്ഷേത്രത്തിൽ നിന്നുള്ള നിവേദ്യം കഴിക്കാം. ശിവ അഷ്ടോത്തരം, ഉമാമഹേശ്വര സ്തോത്രം, പ്രദോഷ സ്തോത്രം, ശങ്കരധ്യാന പ്രകാരം, ശിവ പഞ്ചാക്ഷരി സ്തോത്രം, ശിവസഹസ്രനാമം എന്നിവ ചൊല്ലുക, ശിവപുരാണ പാരായണം നടത്തുക എന്നിവ നല്ലതാണ്. സന്ധ്യയ്ക്ക് മുൻപ് കുളിച്ച് ക്ഷേത്ര ദർശനം നടത്തി ആറര മണിയോടെ തുടങ്ങുന്ന പ്രദോഷ പൂജ, ദീപാരാധന ഇവയിൽ പങ്കുകൊള്ളുക. ഭഗവാന് കരിക്ക് നേദിച്ച് അതിലെ ജലം സേവിക്കുക. അവിലോ മലരോ പഴമോ കഴിച്ച് ഉപവാസം അവസാനിപ്പിക്കാം. ദീപാരാധന കഴിഞ്ഞ് ക്ഷേത്രത്തിൽ നിന്നുള്ള ചോറു വാങ്ങി കഴിച്ച് വ്രതം പൂർത്തിയാക്കാം.

പ്രാർത്ഥനാ ശ്ലോകങ്ങൾ

ശിവം ശിവകരം ശാന്തം
ശിവാത്മാനം ശിവോത്തമം
ശിവമാർഗ്ഗ പ്രണേതാരം
പ്രണതോസ്മി സദാശിവം

സംഹാരമൂര്‍ത്തിം ഹരമന്തകാരീം
വൃഷധ്വജം ഭൂതഗണാദിസേവ്യം
കൈലാസവാസം പരമേശ്വരം തം
നിത്യം നമാമി പ്രണവസ്വരൂപം

ശിവപഞ്ചാക്ഷരി സ്തോത്രം

നാഗേന്ദ്രഹാരായ ത്രിലോചനായ
ഭസ്മാംഗരായായ മഹേശ്വരായ
നിത്യായ ശുദ്ധായ ദിഗംബരായ
തസ്മൈ നകാരായ നമഃ ശിവായ

മന്ദാകിനീസലില ചന്ദന ചര്‍ച്ചിതായ
നന്ദീശ്വരപ്രമഥനാഥ മഹേശ്വരായ
മന്ദാരപുഷ്പ ബഹുപുഷ്പ സുപൂജിതായ
തസ്മൈ മകാരായ നമഃ ശിവായ

ശിവായ ഗൗരീവദനാരവിന്ദ
സൂര്യായ ദക്ഷാധ്വര നാശകായ
ശ്രീ നീലകണ്ഠായ വൃഷധ്വജായ
തസ്മൈ ശികാരായ നമഃ ശിവായ

വസിഷ്ഠകുംഭോത്ഭവ ഗൗതമാര്യ
മുനീന്ദ്ര ദേവാര്‍ച്ചിത ശേഖരായ
ചന്ദ്രാര്‍ക്ക വൈശ്വാനരലോചനായ
തസ്മൈ വകാരായ നമഃ ശിവായ

യക്ഷസ്വരൂപായ ജഡാധരായ
പിനാകഹസ്തായ സനാതനായ
ദിവ്യായ ദേവായ ദിഗംബരായ
തസ്മൈ യകാരായ നമഃ ശിവായ

Story Summary: Significance of Shani Pradosham

Copyright 2024 Neramonline.com. All rights reserved