മംഗള ഗൗരി

മഹാലക്ഷ്മിയുടെ ജന്മദിനമാണ് വരലക്ഷ്മി വ്രതമായി ആചരിക്കുന്നത്. ദേവിപാല്‍ കടലില്‍ നിന്നും ഉയർന്നു വന്ന സുദിനം ശ്രാവണ മാസം വെളുത്ത പക്ഷത്തിലെ
അവസാന വെള്ളിയാഴ്ചയായിരുന്നുവത്രേ. അതായത്
കർക്കടകത്തിലോ ചിങ്ങത്തിലോ ആടിമാസത്തിലോ ആവണിയിലോ വെളുത്ത പക്ഷത്തിലെ അവസാനത്തെ വെള്ളിയാഴ്ച ദിവസമാണ് വരലക്ഷ്മി പൂജ നടത്തുക.
ചില വർഷങ്ങളിൽ അവസാനത്തെ ആവണി വെള്ളിയും ദ്വാദശി തിഥിയും ഒന്നിച്ചുവരും. ഇത് അതിവിശേഷമായി പറയുന്നു. സർവ സൗഭാഗ്യത്തിന് നടത്തുന്ന പൂജയാണ് വരലക്ഷ്മി പൂജ. ഈ ദിവസം വ്രതം അനുഷ്ഠിച്ച് ചിലർ സകല സൗഭാഗ്യങ്ങളും നേടാറുണ്ട്. തെലുങ്ക് ദേശത്തും തമിഴർക്കുമിടയിൽ അതിവിശേഷമാണ് വരലക്ഷ്മി പൂജ. ഇത്തവണത്തെ വരലക്ഷ്മി പൂജ 2023 ആഗസ്റ്റ് 25 നാണ്. വരലക്ഷ്മിവ്രതാനുഷ്ഠാനവും പൂജയും രണ്ട് ദിവസമായി ആണ് നടത്തുന്നത്. തലേന്ന് പൂജാമുറി വൃത്തിയാക്കി അലങ്കരിച്ച് പൂജയ്ക്ക് ഒരുക്കും. കലശത്തിൽ നാണയം, വെറ്റില, അടയ്ക്ക, മഞ്ഞൾ, നാരങ്ങ, കണ്ണാടി, കരിവള, കുങ്കുമച്ചെപ്പ്, പച്ചരി തുടങ്ങിയവ നിറയ്ക്കും. കുടത്തിന്റെ വായ് ഭാഗത്ത് മാവില നിരത്തി അതിനു മുകളിലായി ഒരു നാളികേരം പ്രതിഷ്ഠിക്കും.

നാളികേരത്തിൽ ദേവിയുടെ പടം വച്ച് കുടത്തിന്റെ മുഖം ഭംഗിയായി അലങ്കരിക്കും. പിന്നീട് വെള്ളപ്പൊങ്കാല ഒരുക്കി കർപ്പൂരം ഉഴിയുന്നു. ആ ദിവസം രാത്രി ആഹാരം ഉപേക്ഷിക്കും. ദ്വാദശി വരുന്ന വെള്ളിയാഴ്ച ദിവസം രാവിലെ കുളിച്ച് ശുദ്ധമായി പൂജ തുടങ്ങുന്നു.
ലക്ഷ്മിഭഗവതിയെ വീട്ടിലേക്ക് വരവേല്ക്കാൻ വീട്ടിന് മുമ്പിൽ കോലമെഴുതി പൂക്കൾ വിതറി കർപ്പൂരാരതി ഉഴിയുന്നു. ലക്ഷ്മീദേവി ഈ വീട്ടിലേക്ക് വരൂ എന്ന് പ്രാർത്ഥിക്കുന്നു. അതിന് ശേഷം ഒരിലയിൽ പച്ചരി വിതറി പൂജാമുറിയിൽ നിന്നും കലശമെടുത്ത് ഇലയിൽ വച്ച് അതിൽ ഒരു മഞ്ഞച്ചരട് കെട്ടുന്നു.ആദ്യം ഗണപതി പൂജയാണ്. ശേഷമാണ് വരലക്ഷ്മി പൂജ. പൂജയുടെ അവസാനം നൈവേദ്യം കർപ്പൂരം കൊണ്ട് ഉഴിഞ്ഞ് സ്ത്രീകൾ മഞ്ഞച്ചരട് എടുത്ത് വലതുകൈയിൽ കെട്ടുന്നു. ഇതോടൊപ്പം തന്നെ മഹാലക്ഷ്മി പ്രീതികരമായ കീർത്തനങ്ങൾ പാടുന്നു. വൈകുന്നേരം പുതിയ പൂക്കൾ കൊണ്ട് അർച്ചന തുടരുന്നു. കടല കൊണ്ടുള്ള നൈവേദ്യം തയ്യാറാക്കുന്നു. മംഗളാരതി നടത്തുന്നു. ശനിയാഴ്ച രാവിലെ പൂക്കൾ മാറ്റി പുതിയ പൂക്കൾ കൊണ്ട് അർച്ചന നടത്തുന്നു. മൂന്നു ദിവസം പൂജ തുടരുന്നു. ഇതിനു ശേഷമേ നാളികേരത്തിൽ ദേവിയുടെ പടം വച്ച കുടത്തിന്റെ മുഖം മാറ്റുകയുള്ളു.

ഓം മഹാലക്ഷ്മ്യൈ നമഃ പതിവായി ജപിച്ച് സകല സൗഭാഗ്യങ്ങളും ധനശ്വൈര്യങ്ങളും സ്വന്തമാക്കൂ.

Story Summary: Significance and Rituals of Vara Lakshmi Vritham