ജ്യോതിഷരത്നം വേണു മഹാദേവ്

ശനിദോഷങ്ങൾ അനുഭവിക്കുന്നവർക്ക് ദുരിതങ്ങളിൽ നിന്നും മോചനം നേടാനുള്ള ഏറ്റവും ലളിതമായ വഴിയാണ് വൃശ്ചികം ഒന്നുമുതൽ 41 ദിവസം നീളുന്ന മണ്ഡല കാലത്തെ അയ്യപ്പപൂജ. ഇപ്പോൾ ഗോചരാൽ കണ്ടകശനി അഷ്ടമശനി, ഏഴരശനി തുടങ്ങിയ ശനിദുരിതങ്ങൾ അനുഭവിക്കുന്ന മേടം, മിഥുനം, കർക്കടകം, തുലാം, ധനു, മകരം, കുംഭം എന്നീ ആറു കൂറുകളിൽപ്പെടുന്നവരും ജാതകവശാൽ ശനിദശയും ശനി അപഹാരവും ഛിദ്രവും പിന്നിടുന്നവരും ശനിക്ക് നീചം, മൗഢ്യം, ദുർബ്ബല ക്ഷേത്ര സ്ഥിതി എന്നിവയുള്ള സമയത്ത് ജനിക്കുന്നവരും രോഗങ്ങൾ കാരണം ക്ലേശം അനുഭവിക്കുന്നവരും വിവാഹ തടസം മൂലം വിഷമം അനുഭവിക്കുന്നവരും എന്ത് കാര്യത്തിന് ഇറങ്ങിയാലും നിരന്തരമായി കാര്യതടസം നേരിടുന്നവരുമാണ് ഇപ്പോൾ അയ്യപ്പനെ ഭജിച്ച് ദോഷങ്ങൾ അകറ്റേണ്ടത്.

മേടക്കൂറിലെ അശ്വതി, ഭരണി, കാർത്തിക 1, മിഥുനക്കൂറിലെ മകയിരം 3, 4 പാദങ്ങൾ, തിരുവാതിര, പുണർതം 1, 2, 3 പാദങ്ങൾ, കർക്കടകക്കൂറിലെ പുണർതം അവസാന പാദം, പൂയം, ആയില്യം, തുലാക്കൂറിലെ ചിത്തിര 3, 4 പാദങ്ങൾ ചോതി, വിശാഖം 1, 2, 3 പാദങ്ങൾ ധനുക്കൂറിലെ മൂലം, പൂരാടം, ഉത്രാടം ആദ്യപാദം, മകരക്കൂറിലെ ഉത്രാടം 2, 3, 4 പാദങ്ങൾ, തിരുവോണം, അവിട്ടം 1, 2 പാദങ്ങൾ, കുംഭക്കൂറിലെ അവിട്ടം 3, 4 പാദങ്ങൾ, ചതയം, പൂരുരുട്ടാതി 1, 2, 3 പാദങ്ങൾ എന്നീ നക്ഷത്രങ്ങളിൽ ജനിച്ചവരും ശനിദശയിലും ശനി അപഹാരത്തിലും കഴിയുന്നവരും തികഞ്ഞ ഭക്തിയോടെ അയ്യപ്പനെ ഭജിക്കുകയും സാഹചര്യങ്ങൾ ഒത്തുവന്നാൽ ശബരിമല ദർശനം നടത്തുകയും ചെയ്താൽ എല്ലാ വിധ ശനിദോഷങ്ങളും ദു:ഖദുരിതങ്ങളും അലച്ചിലും അകന്ന് മന:ശാന്തിയും സുഖവും സമൃദ്ധിയും അഭിഷ്ടസിദ്ധിയും ലഭിക്കും. മണ്ഡലകാലയളവിൽ വ്രതനിഷ്ഠയോടെ കഴിയുവാൻ സാധിക്കുന്നത് മഹാപുണ്യമാണ്. ഈ സമയത്ത് ശാസ്താ പ്രീതികരമായ വഴിപാട് നടത്തുന്നതും ശബരിമല അയ്യപ്പവിഗ്രഹത്തിലെ അഭിഷേക ദർശനവും ശനിദോഷമകലാൻ ഉത്തമമാണ്. കുടുംബസുഖം, രോഗശമനം, മന:സുഖം, ബന്ധു ഗുണം, പാപമോചനം, ഐശ്വര്യം തുടങ്ങി എല്ലാ അഭീഷ്ടങ്ങളും കൈവരിക്കാൻ ഈ അനുഷ്ഠാനങ്ങൾ ഉപകരിക്കും. അയ്യപ്പന്റെ മൂലമന്ത്രം നിത്യേന പരമാവധി തവണ ജപിക്കണം. ശാസ്തൃ ഗായത്രിഎന്നും രാവിലെയും വൈകിട്ടും 36 തവണ വീതം ജപിക്കണം. ശനിയാഴ്ചകളിൽ സൂര്യോദയം കഴിഞ്ഞ് ഒരു മണിക്കൂറിനകമുള്ള ശനി ഹോര സമയത്ത് ശനീശ്വര സ്തോത്രം ജപിക്കണം. ഭക്തി വിശ്വാസപൂർവം ഇതെല്ലാം അനുഷ്ഠിച്ചാൽ കടുത്ത ശനിദോഷങ്ങൾ മാറിക്കിട്ടും. സ്വാമിയേ ശരണമയ്യപ്പാ.

മൂലമന്ത്രം
ഓം ഘ്രും നമ: പരായ ഗോപ്ത്രേ

ശനി സ്തോത്രം
നീലാഞ്ജനസമാഭാസം
രവിപുത്രം യമാഗ്രജം
ഛായാമാർത്താണ്ഡസംഭൂതം
തം നമാമി ശനൈശ്ചരം

ശാസ്തൃ ഗായത്രി
ഓം ഭൂതനാഥായ വിദ്മഹേ
ഭവപുത്രായ ധീമഹേ
തന്ന: ശാസ്താ പ്രചോദയാത്

ജ്യോതിഷരത്നം വേണു മഹാദേവ്
+91 89217 09017

Story Summary: Who is facing Shani dosha now Remadies to remove Shani dosha