ശിവപൂജയ്ക്ക് ഇരട്ടിഫലം കിട്ടുന്ന ദിവസങ്ങളാണ് തിങ്കൾ പ്രദോഷവും ശനി പ്രദോഷവും. ഈ ദിനങ്ങളിൽ
വ്രതമെടുക്കുന്നതും ശിവഭജനയും ക്ഷേത്ര ദർശനവും വഴിപാടുകളും നടത്തുന്നതും ഐശ്വര്യപ്രദമാണ്. 2025 ഫെബ്രുവരി 10 ന് തിങ്കൾ പ്രദോഷമാണ്; മകരത്തിലെ ശുക്ലപക്ഷപ്രദോഷമാണിത്.

ഈ ദിവസത്തെ വ്രതം മക്കൾക്കും കുടുംബത്തിനും ഒരു പോലെ നല്ലതാണ്. യശസ്സ്, ധനം, സന്താന സൗഖ്യം
കീർത്തി, ദാരിദ്ര്യശമനം, പാപമുക്തി, ആയുരാരോഗ്യം, എന്നിവയെല്ലാമാണ് ഫലം. ദശാദോഷം, ജാതകദോഷം എന്നിവ കാരണമുള്ള ദുരിതകാഠിന്യം കുറയ്ക്കാനും ഉത്തമമത്രേ പ്രദോഷവ്രതാനുഷ്ഠാനം. എല്ലാ മാസവും
വെളുത്തപക്ഷത്തിലും കറുത്തപക്ഷത്തിലും പ്രദോഷം വരും. സന്ധ്യയ്ക്ക് ത്രയോദശി തിഥി വരുന്ന ദിനമാണ്
പ്രദോഷാചരണം. ഇതിൽ തന്നെ അപൂർവമായി വരുന്ന ശനി പ്രദോഷവും തിങ്കൾ പ്രദോഷവും ഇരട്ടി ഫലസിദ്ധി
തരുന്നതിനാൽ അതിവിശേഷമാണ്.

ശിവപാർവതിമാര്‍ ഏറെ പ്രസന്നരാകുന്ന വേളയാണ് ത്രയോദശി തിഥിയിലെ പ്രദോഷ സന്ധ്യ. ഈ സമയത്തെ
ശിവപൂജ, ക്ഷേത്ര ദർശനം ഏറെ പുണ്യദായകമാണ്. വ്രതം അനുഷ്ഠിക്കാൻ സാധിക്കാത്തവർ കഴിയുന്നത്ര
ശിവമന്ത്രങ്ങൾ, കീർത്തനങ്ങൾ എന്നിവ ജപിക്കുകയോ കേൾക്കുകയോ വേണം. മൂലമന്ത്രം ഓം നമഃ ശിവായ,
ശിവഅഷ്ടോത്തരം, ശിവ പഞ്ചാക്ഷര സ്തോത്രം, ശിവാഷ്ടകം, ഉമാമഹേശ്വര സ്തോത്രം, ദാരിദ്ര്യദു:ഖദഹന
ശിവ സ്തോത്രം, ശങ്കരധ്യാനപ്രകാരം, ലിംഗാഷ്ടകം, വിശ്വനാഥാഷ്ടകം, ബില്വാഷ്ടകം, ശിവസഹസ്രനാമം
തുടങ്ങിയവയെല്ലാം ഈ ദിവസത്തെ ജപത്തിൽ പ്രധാനമാണ്. ശിവഭഗവാനെ ആപാദചൂഢം വർണ്ണിച്ച്
വന്ദിക്കുന്ന ശങ്കരധ്യാന പ്രകാരം…. 11 ത്രയോദശി പ്രദോഷ വേളയിൽ ജപിച്ചാൽ അഭീഷ്ട സിദ്ധി ഉറപ്പാണ്.
പ്രദോഷസന്ധ്യയിൽ ക്ഷേത്ര ദർശനം കഴിഞ്ഞില്ലെങ്കിലും ശിവഭജനയും വഴിപാടുകളും മുടക്കരുത്. പ്രദോഷ
സന്ധ്യയില്‍ പാര്‍വ്വതി ദേവിയെ പീഠത്തില്‍ ഇരുത്തി ശിവന്‍ നൃത്തം ചെയ്യും. ഈ സമയത്ത് എല്ലാ ദേവതകളും സന്നിഹിതരായി ശിവനെ ഭജിക്കുന്നുവെന്നാണ് പ്രദോഷ അനുഷ്ഠാനത്തെ പറ്റിയുള്ള ഒരു വിശ്വാസം .

ഈ ദിവസം വിധി പ്രകാരം വ്രതമനുഷ്ടിക്കുന്നതിലൂടെ സകല പാപങ്ങളും നശിക്കും. വ്രതമെടുക്കുന്നവർ
തലേന്ന് ഒരു നേരമേ അരിയാഹാരം കഴിക്കാവൂ. അന്ന് രാവിലെ പഞ്ചാക്ഷരി ജപത്തോടെ ശിവക്ഷേത്രദർശനം നടത്തി കൂവളത്തില കൊണ്ട് അർച്ചന, കൂവളമാല സമർപ്പണം, പിൻവിളക്ക്, ജലധാര എന്നിവ നടത്തുക.
പ്രദോഷപകൽ മുഴുവൻ ഉപവാസം വളരെ നല്ലത്. അതിന് കഴിയാത്തവർ ഉച്ചയ്ക്ക് ക്ഷേത്രത്തിൽ നിന്നുള്ള നേദ്യച്ചോറ് കഴിക്കാം. സന്ധ്യയ്ക്ക് മുൻപായി കുളിച്ച് ശിവക്ഷേത്രദർശനം നടത്തി പ്രദോഷപൂജ, ദീപാരാധന ഇവയിൽ പങ്കുകൊള്ളുക. ഭഗവാന് കരിക്ക് നേദിച്ച് അതിലെ ജലം കഴിക്കുക. അവിലോ, മലരോ, പഴമോ കഴിച്ച് ഉപവാസം അവസാനിപ്പിക്കാം. ദീപാരാധനയ്ക്ക് ശേഷം ക്ഷേത്രത്തിൽ നിന്നും ചോറു വാങ്ങി കഴിക്കണം.

ആദിത്യദശാ കാലമുള്ളവര്‍ ഈ വ്രതമനുഷ്ടിക്കുന്നത് കൂടുതല്‍ ഐശ്വര്യപ്രദമായിരിക്കും. ജാതകത്തില്‍
ഇഷ്ടദേവതയെ സൂചിപ്പിക്കുന്ന ഗ്രഹം ആദിത്യനായി വരുന്നവര്‍ പ്രദോഷവ്രതം നോൽക്കുന്നത് കൂടുതൽ
ഐശ്വര്യപ്രദവും കൂടുതല്‍ ഫലപ്രദവുമായിരിക്കും.

Story Summary: Importance of Soma Pradosha Vritham

നേരം ഓൺ ലൈൻ ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വിശേഷങ്ങൾക്കായി ക്ലിക്ക് ചെയ്യൂ : neramonline.com

ആത്മീയ വിശേഷങ്ങളും ജ്യോതിഷ പ്രവചനങ്ങളും സംബന്ധിച്ച വാര്‍ത്തകള്‍ അപ്പപ്പോള്‍ ലഭിക്കാന്‍, അസ്ട്രോ ജി, നേരം ഓൺലൈൻ ആപ് ഡൗണ്‍ലോഡ് ചെയ്യുക : AstroG App

Copyright 2024 Neramonline.com. All rights reserved