സാമ്പത്തിക ബുദ്ധിമുട്ടുകൾ അകറ്റാനും ധനാഭിവൃദ്ധിക്കും ഉപാസനാ വഴികൾ
(നേരം ഓൺ ലൈൻ ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വിശേഷങ്ങൾക്കായി ക്ലിക്ക് ചെയ്യൂ : neramonline.com )
ജ്യോതിഷരത്നം വേണു മഹാദേവ്
സാമ്പത്തിക ബുദ്ധിമുട്ടുകൾ അകറ്റാനും ധനാഭിവൃദ്ധി നേടാനും ഒട്ടേറെ ഈശ്വരാരാധനാ മാർഗ്ഗങ്ങൾ പ്രചാരത്തിലുണ്ട്. മഹാലക്ഷ്മി, മഹാവിഷ്ണു, ഗണപതി ഭഗവാൻ, കുബേരൻ തുടങ്ങിയവരെയാണ് സാമ്പത്തിക
നേട്ടത്തിന് പ്രധാനമായും പൂജിക്കുന്നത്.
മഹാലക്ഷ്മി ക്ഷേത്രങ്ങളിൽ പൂജയും വഴിപാടും കഴിക്കുന്നതിനൊപ്പം വീട്ടിൽ പൂജാ മുറിയിൽ നെയ് വിളക്ക് കൊളുത്തി ലക്ഷ്മി മന്ത്രങ്ങളും സ്തുതികളും ജപിക്കുന്ന രീതിയാണ് കൂടുതൽ പ്രചാരത്തിലുള്ളത്. മഹാലക്ഷ്മി സമ്മേതനായ ശ്രീമഹാവിഷ്ണുവിന്റെ അനുഗ്രഹം നേടുകയാണ് ധനാഭിവൃദ്ധിക്കും സാമ്പത്തിക ദുരിത മോചനത്തിനും മറ്റൊരു വഴി. ആത്മാർത്ഥമായി നിരന്തരം പ്രാർത്ഥിച്ചാൽ ലക്ഷ്മിയും വിഷ്ണുവും അതി വേഗം പ്രസാദിക്കും. ലക്ഷ്മി വിനായക സങ്കല്പത്തിലുള്ള ഗണപതി പൂജയാണ് ധനപരമായ മേന്മ ലഭിക്കുന്നതിന് സഹായിക്കുന്ന മറ്റൊരു ആരാധനാ വഴി. ഗണപതി പ്രീതിയിലൂടെ ഐശ്വര്യലബ്ധിക്കുള്ള തടസങ്ങൾ അകറ്റുമ്പോൾ ലക്ഷ്മിദേവി അതി വേഗം പ്രസാദിക്കും.
സാമ്പത്തിക ദുരിതങ്ങൾ അനുഭവിക്കുന്നവർ വിഷമ ഘട്ടങ്ങളിൽ രാവിലെയും വൈകിട്ടും മുടങ്ങാതെ താഴെ കുബേര മന്ത്രങ്ങൾ ജപിക്കണം. വെളുത്തവാവ്, വെള്ളിയാഴ്ച, തിങ്കളാഴ്ച, നവമി, പഞ്ചമി ദിവസങ്ങൾ കുബേര പ്രാർത്ഥനയ്ക്ക് വിശേഷമാണ്. കുബേരനെ
പ്രാർത്ഥിക്കുന്നവർ ശിവനെയും പ്രീതിപ്പെടുത്തണം.
പാലാഴി മഥനത്തിൽ അവതരിച്ച, മഹാവിഷ്ണുവിന്റെ ധർമ്മപത്നിയായ ലക്ഷ്മി ഭഗവതി ഐശ്വര്യവും ധനവും സമ്മാനിക്കുന്ന ശുക്രന്റെ അധിദേവതയാണ്. പൈങ്കുനി മാസത്തിലെ ഉത്രം നക്ഷത്രത്തിലാണ് ലക്ഷ്മി ഭഗവതി അവതരിച്ചതെന്ന് ഐതിഹ്യമുണ്ട്. അതിനാൽ മീന മാസത്തിലെ ഉത്രത്തിന് ലക്ഷ്മി പൂജ നടത്തുന്നത് ഐശ്വര്യദായകമായി കരുതുന്നു. അലങ്കാരപ്രിയയായ ലക്ഷ്മീ ഭഗവതിക്ക് വെള്ളിയാഴ്ചകളിൽ കമനീയ വർണ്ണങ്ങളിലുള്ള സുഗന്ധപുഷ്പങ്ങൾ കൊണ്ട് അർച്ചന നടത്തുന്നതും ശ്രീസൂക്തം കൊണ്ട് പുഷ്പാഞ്ജലി കഴിക്കുന്നതും ധനവർദ്ധനവിന് നല്ലതാണ്. വെള്ളിയാഴ്ച ദിവസമാണ് ലക്ഷ്മി ഉപാസയ്ക്ക് ഏറ്റവും നല്ലത്.
ലക്ഷ്മി ദേവിയുടെ ചിത്രത്തിനു മുന്നിൽ നെയ് വിളക്ക് കൊളുത്തി കമലാ മന്ത്രം ജപിക്കുന്നത് സമ്പത്ത് വർദ്ധിക്കുന്നതിനും ഐശ്വര്യത്തിനും ഉത്തമമാണ്. രാവിലെയും വൈകിട്ടും 1008 തവണ ഇത് ജപിക്കണം. മറ്റ് മന്ത്രങ്ങൾ 108 തവണ ദിവസവും ഒരു നേരമെങ്കിലും ജപിക്കുക. ധന വർദ്ധനവിന് മഹാലക്ഷ്മി പ്രീതി നേടാൻ സഹായിക്കുന്ന ചില ലക്ഷ്മി മന്ത്രങ്ങൾ:
ലക്ഷ്മി നാരായണ മന്ത്രം
ഓം ശ്രീലക്ഷ്മി നാരായണായ നമഃ
ലക്ഷ്മി ഗണേശ മന്ത്രം
ഓം ഗം ശ്രീം സർവ സിദ്ധി പ്രദായെ ശ്രീം ഗം നമഃ
മഹാലക്ഷ്മി മന്ത്രം
ഓം ശ്രീം ഹ്രീം ശ്രീം കമലേ കമലായെ പ്രസീദ പ്രസീദ ഓം ശ്രീം ഹ്രീം ശ്രീം മഹാലക്ഷ്മിയൈ നമഃ
കമലാ മന്ത്രം
കുബേരത്വം ധനാദീശ ഗൃഹതേ കമലാ സ്ഥിത
താം ദേവിം പ്രേഷയ ത്വാം ഷു മദ് ഗൃഹതേ നമോ നമഃ
സർവാനുഗ്രഹദായിനിയായ ശ്രീ ലളിതാംബികയുടെ ചെെതന്യമുള്ള ശ്രീ ചക്രം ഉത്തമനായ കർമ്മിയെ സമീപിച്ച് വിധിപ്രകാരം തയ്യാറാക്കി വീട്ടിലെ പൂജാമുറിയിൽ സ്ഥാപിക്കുന്നത് ഐശ്വര്യസിദ്ധിക്കും സമ്പത്ത് വർദ്ധിക്കുന്നതിനും സഹായിക്കും. ലളിതാ സഹസ്രനാമാവലി പാരായണം ചെയ്തു കൊണ്ട് നിത്യവും ശ്രീചക്ര പൂജ ചെയ്താൽ ധനം കുന്നു കൂടും.
സൗന്ദര്യ ലഹരിയിലെ ശ്ലോകം 33 നിത്യവും ജപിക്കുന്നതും വെള്ളിയാഴ്ച തോറും ലളിതാസഹസ്രനാമം ചെല്ലുന്നതും
അളവറ്റ തരത്തിൽ ധനവർദ്ധനവിന് സഹായിക്കും. ജന്മ നാൾ ദിവസം ക്ഷേത്രത്തിൽ ശ്രീസൂക്താർച്ചന ലക്ഷ്മീ നാരായണ പൂജ എന്നിവ ചെയ്യുന്നത് ഐശ്വര്യത്തിന് നല്ലതാണ്.
സൗന്ദര്യ ലഹരി ശ്ലോകം 33
സ്മരം യോനിം ലക്ഷ്മീം
ത്രിതയമിദമാദൗ തവ മനോർ-
ന്നിധായൈകേ നിത്യേ !
നിരവധി മഹാ ഭോഗരസികാ:
ഭജന്തി ത്വാം ചിന്താമണി
ഗുണനിബദ്ധാക്ഷവലയാ :
ശിവാഗ്‌നൗ ജൂഹന്ത്വ സുരഭി
ഘൃതധാരാഹുതിശതൈ:
ജ്യോതിഷരത്നം വേണുമഹാദേവ്
+91 9847475559
Story Summary: Powerful Mantras for fortune and wealth
ആത്മീയ വിശേഷങ്ങളും ജ്യോതിഷ പ്രവചനങ്ങളും സംബന്ധിച്ച വാര്‍ത്തകള്‍ അപ്പപ്പോള്‍ ലഭിക്കാന്‍, അസ്ട്രോ ജി, നേരം ഓൺലൈൻ ആപ് ഡൗണ്‍ലോഡ് ചെയ്യുക : AstroG App
Copyright 2025 Neramonline.com. All rights reserved
