മംഗളഗൗരി
ഏറ്റവും പ്രചാരമുള്ളതും ഏറ്റവും കൂടുതൽ ഭക്തർ ജപിക്കുന്നതുമായ സ്തോത്രമാണ് ശങ്കരാചാര്യ വിരചിതമായ ശിവപഞ്ചാക്ഷര സ്‌തോത്രം. പഞ്ചാക്ഷര മന്ത്രത്തിലെ ഓരോ അക്ഷരങ്ങൾ യഥാക്രമം ഓരോ ശ്ലോകത്തിൻ്റെയും ആദ്യം ക്രമീകരിച്ച് രചിച്ചിട്ടുളള ഈ സ്തോത്രം അത്ഭുതകരമായ ഫലസിദ്ധിയുള്ളതാണ്.

സർവ കാര്യവിജയത്തിനും മന:ശാന്തിയോടെയുള്ള ജീവിതത്തിനും ദുരിത മോചനത്തിനും നിത്യേനയുള്ള ശിവപഞ്ചാക്ഷര സ്‌തോത്ര ജപം സഹായിക്കും. കാര്യസിദ്ധി, വിദ്യാഭ്യാസ പുരോഗതി, ഓര്‍മ്മശക്തി, ബുദ്ധിശക്തി എന്നിവ വര്‍ദ്ധിക്കാനും പരീക്ഷകളിൽ മികച്ച വിജയം നേടാനും ശിവപഞ്ചാക്ഷര സ്‌തോത്ര
ജപം ഗുണകരമാണെന്ന് ആചാര്യന്മാർ പറയുന്നു. പരീക്ഷ എഴുതുന്നവർക്കും ഫലം അറിഞ്ഞ് അടുത്ത ഘട്ടത്തിലേക്ക് കടക്കാൻ തയ്യാറാകുന്നവർക്കും വരെ പ്രയോജനപ്പെടുന്ന ഈ സ്‌തോത്രത്തിലെ ഓരോ
ശ്ലോകവും ന മഃ ശി വാ യ അക്ഷരങ്ങളിലാണ് ആരംഭിക്കുന്നത്. മുജ്ജന്മാർജ്ജിത പാപങ്ങൾ പോലും മാറി ശാശ്വത സുഖം നൽകുന്ന ശിവലോക പ്രാപ്തിക്ക് ഏറ്റവും ഗുണകരമായ ഈ സ്‌തോത്രവും അർത്ഥവും ഇവിടെ കൊടുക്കുന്നു :

നാഗേന്ദ്രഹാരായ ത്രിലോചനായ
ഭസ്മാംഗരാഗായ മഹേശ്വരായ
നിത്യായ ശുദ്ധായ ദിഗംബരായ
തസ്‌മൈ ന കാരായ നമഃ ശിവായ

(സർപ്പശ്രേഷ്ഠനെ മാലയായി ധരിച്ചവനും മൂന്നു കണ്ണുകളുള്ളവനും തിരുവുടലിൽ ഭസ്മം പൂശിയിരിക്കുന്നവനും മഹേശ്വരനും ശുദ്ധനും ആദ്യന്തങ്ങളില്ലാത്തവനും ദിക്കുകൾ വസ്ത്രമാക്കിയ ദിഗംബരനും ന കാര രൂപിയുമായ ശിവന് നമസ്‌കാരം.)

മന്ദാകിനീ സലില ചന്ദന ചർച്ചിതായ
നന്ദീശ്വര പ്രമഥനാഥ മഹേശ്വരായ
മന്ദാര പുഷ്പ ബഹു പുഷ്പ സുപൂജിതായ
തസ്‌മൈ മഃ കാരായ നമഃ ശിവായ

(ഗംഗാജലവും ചന്ദനവും കൊണ്ട് അലങ്കരിക്കപ്പെട്ടവനും നന്ദികേശ്വരൻ തുടങ്ങിയവരുടെ പ്രഭുവും പ്രമഥന്മാരുടെ നാഥനും മഹേശ്വരനും മന്ദാരപുഷ്പം മുതലായ അനവധി പുഷ്പങ്ങൾ കൊണ്ട് പൂജിക്കപ്പെടുന്നവനും മഃ കാര രൂപിയുമായ ശിവന് നമസ്‌കാരം.)

ശിവായ ഗൗരീവദനാരവിന്ദ
സൂര്യായ ദക്ഷാദ്ധ്വര നാശകായ
ശ്രീ നീലകണ്ഠായ വൃഷദ്ധ്വജായ
തസ്‌മൈ ശി കാരായ നമഃ ശിവായ

(മംഗള സ്വരൂപനും പാർവ്വതിയുടെ മുഖമാകുന്ന താമരയ്ക്ക് സൂര്യനായവനും ദക്ഷപ്രജാപതിയുടെ യാഗത്തെ നശിപ്പിച്ചവനും ഐശ്വര്യമുള്ള നീലകണ്ഠത്തോട് കൂടിയവനും വൃഷഭമാകുന്ന കൊടിയടയാളത്തോടു കൂടിയവനും ശികാര സ്വരൂപനുമായ ശിവന് നമസ്‌കാരം.)

വസിഷ്ഠ കുംഭോത്ഭവ ഗൗതമാദി –
മുനീന്ദ്ര ദേവാർച്ചിത ശേഖരായ
ചന്ദ്രാർക്ക വൈശ്വാനരലോചനായ
തസ്‌മൈ വ കാരായ നമഃ ശിവായ

(വസിഷ്ഠൻ, അഗസ്ത്യൻ, ഗൗതമൻ മുതലായ മഹർഷീശ്വരന്മാരാലും ദേവദിക്പാലകന്മാരാലും
പൂജിച്ചുകൊണ്ടിരിക്കുന്നവനും ചന്ദ്രൻ, സൂര്യൻ, അഗ്‌നി എന്നിങ്ങനെ മൂന്നു കണ്ണുകളോടുകൂടിയവനും വകാര സ്വരൂപനുമായ ശിവന് നമസ്‌കാരം.)

യക്ഷസ്വരൂപായ ജടാധരായ
പിനാക ഹസ്തായ സനാതനായ
ദിവ്യായ ദേവായ ദിഗംബരായ
തസ്‌മൈ യ കാരായ നമഃ ശിവായ

(കുബേര മിത്രമായതിനാൽ യക്ഷ സ്വരൂപത്തെ ധരിച്ചിരിക്കുന്ന ജടാധരനും പിനാക പാണിയും സനാതനനും ദിവ്യനും ദിഗംബരനും ദേവനും യകാര
സ്വരൂപനുമായ ശിവന്‌ നമസ്‌കാരം )

പഞ്ചാക്ഷരമിദം പുണ്യം
യ: പഠേ ശിവ സന്നിധൗ
ശിവലോകമവാപ്‌നോതി
ശിവേന സഹ മോദതേ

(ശിവ സന്നിധിയിൽ ശിവ സാന്നിദ്ധ്യത്തോടെ
ഈ പഞ്ചാക്ഷരസ്‌തോത്രം ചൊല്ലുന്നവർ ശിവലോകം പ്രാപിച്ച് ശിവനോടുകൂടി നിത്യാനന്ദം അനുഭവിക്കും.)

Story Summary : Significance, Meaning and Benefits of Shiva Panchaksha Sthothram

Copyright 2024 Neramonline.com. All rights reserved