ശുഭകാര്യങ്ങൾക്ക് മുൻപ് ഗണപതിയെ പ്രാര്‍ത്ഥിക്കുന്നതിന്‍റെ പൊരുളും രഹസ്യവും

തരവത്ത് ശങ്കരനുണ്ണി , പാലക്കാട്
ശുഭകർമ്മങ്ങൾ ആരംഭിക്കും മുൻപ് ഗണപതിപൂജ നടത്തിയാൽ തടസ്സങ്ങൾ അകന്ന് ചൈതന്യം കരഗതമാകുമെന്നാണ് വിശ്വാസം. ചൈതന്യത്തെ എപ്പോഴു കാത്തു രക്ഷിക്കുന്ന ദേവനാണ് ഗണപതി.

ഗണ എന്നാൽ ‘പവിത്രകം’ അഥവാ ചൈതന്യത്തിൻ്റെ കണങ്ങൾ എന്നും അര്‍ത്ഥമുണ്ട് . ‘പതി’ എന്നാൽ ‘സ്വാമി’ അതായത് കാത്തു രക്ഷിക്കുന്നവൻ എന്നും വ്യാഖ്യാനം. അതിനാൽ ഗണപതി എന്നാൽ ചൈതന്യ രക്ഷകൻ എന്ന് അര്‍ത്ഥമാക്കുന്നു. ഗണപതി ഭഗവാനെ പല പേരുകളിൽ സംബോധന ചെയ്യാറുണ്ട്. അത് എന്തുകൊണ്ടാണെന്ന് പലര്‍ക്കും അറിയില്ല. മൂന്ന് നാമങ്ങൾ പരിശോധിക്കാം :

വക്രതുണ്ഡൻ
വളഞ്ഞ തുമ്പിക്കൈ ഉള്ളവൻ എന്നാണ് വക്രതുണ്ഡൻ എന്ന വാക്കിന്‍റെ അര്‍ത്ഥം. എന്നാൽ ഗണപതി ഭഗവാനെ വക്രതുണ്ഡൻ എന്ന് വിളിക്കുന്നത് ഈ കാരണം കൊണ്ട് മാത്രമല്ല. തെറ്റായ മാര്‍ഗത്തിൽ സഞ്ചരിക്കുന്നവരെ തക്കതായ ശിക്ഷ നൽകി നേരായ മാര്‍ഗത്തിൽ കൊണ്ടു വരുന്നവൻ എന്ന ഉദ്ദേശത്തിൽ കൂടിയാണ്.

ഏകദന്തൻ
രണ്ട് കൊമ്പുകളിൽ ഒന്ന് മാത്രമാണ് ഗണപതിക്ക് മുഴുവനായുള്ളത്. മറ്റൊന്നാകട്ടെ പാതി മുറിഞ്ഞതും. വിഘ്നേശ്വരനെ ഏകദന്തൻ എന്ന് വിളിക്കുന്നതിന് ഇത് ഒരു കാരണമാണ്. എന്നാൽ ഇവിടെ ഒന്ന് എന്ന അക്കം ബ്രഹ്മത്തെ സൂചിപ്പിക്കുന്നു. ദന്തീൻ എന്നാൽ കാണിച്ചു കൊടുക്കുക എന്നും വ്യാഖ്യാനിക്കുന്നു. അതായത് ഏകമായ ബ്രഹ്മത്തിന്‍റെ അനുഭൂതി നേടാനുള്ള വഴി കാട്ടിക്കൊടുക്കുന്നവൻ എന്ന അര്‍ത്ഥത്തിൽ കൂടിയാണ് ഗണപതി ഭഗവാൻ ഏകദന്തൻ എന്ന നാമത്തിലും അറിയപ്പെടുന്നത്.

വിനായകൻ
വിനായകൻ എന്നാൽ നേതാക്കന്മാരുടെ പ്രത്യേകതകൾ ഉള്ളവൻ എന്നാകുന്നു. ലംബോദരൻ എന്നും ഗണപതിയെ അഭിസംബോധന ചെയ്യാറുണ്ട്. ലംബമായ അതായത് വലിയ ഉദരത്തോട് കൂടിയ എന്ന് വ്യാഖ്യാനിക്കാം. പക്ഷേ സര്‍വ്വ ചരാചരങ്ങളും ഗണപതിയിൽ വസിക്കുന്നു എന്നതാണ് ഇതിന്റെ വ്യംഗ്യാർത്ഥം.

പ്രഥമ പൂജനീയൻ
മനുഷ്യന്‍റെ സംസാരഭാഷ നാദഭാഷയായാണ് കണക്കാക്കുന്നത്. എന്നാൽ ദേവീ ദേവന്മാരുടെ ഭാഷ പ്രകാശ ഭാഷയാണെന്നും വിശ്വസിക്കുന്നു. വിഘ്നേശ്വന് മനുഷ്യരുടെ നാദഭാഷ ഗ്രഹിക്കുന്നതിനുള്ള കഴിവുണ്ട്. ഈ നാദഭാഷയെ അദ്ദേഹം ദേവീദേവന്മാരുടെ പ്രകാശഭാഷയായി രൂപാന്തരപ്പെടുത്തു മെന്നാണ് വിശ്വാസം. അതിനാൽ നമ്മുടെ പ്രാര്‍ത്ഥനകൾ മറ്റ് ദേവീദേവന്മാരിൽ എത്തിക്കുന്നതിന് ഗണപതി ഭഗവാൻ സഹായിക്കുമെന്ന് കരുതപ്പെടുന്നു. ഈ കാരണത്താലാണ് ഏതൊരു ശുഭകാര്യവും ഗണപതി പൂജയോടെ ആരംഭിക്കുന്നത്.

മൂഷികനും ഗണപതിയും
ഗണപതിയുടെ വാഹനമാണ് മൂഷികൻ. വാഹനം എന്ന വാക്കിന് സംസ്കൃതത്തിൽ വഹിച്ചുകൊണ്ടു പോവുക എന്നാണ് അര്‍ത്ഥമാക്കുന്നത്. അതായത് നമ്മളെ
ജീവിതത്തിൽ മുന്നോട്ടു വഹിച്ചു കൊണ്ടു പോകുന്നത് നമ്മുടെ പ്രവൃത്തികളാണെന്ന് ഇത് സൂചിപ്പിക്കുന്നു. ഗണപതിയുടെ ചലനങ്ങൾക്ക് ആവശ്യമായ ശക്തി മൂഷികനിൽ നിന്നും ലഭിക്കുന്നു. മൂഷികനാവട്ടെ രജോഗുണത്തെ സൂചിപ്പിക്കുന്നു. അതായത് ത്രിഗുണങ്ങളിൽ രജോഗുണങ്ങൾ നിയന്ത്രിക്കുന്നത് വിഘ്നേശ്വരനാണെന്ന് വിശ്വസിക്കുന്നു.

വീടുകളിൽ വാമമുഖി വിഗ്രഹം
ഇടത്തോട്ടും വലത്തോട്ടും തുമ്പിക്കൈ ഉള്ള ഗണപതി ഭഗവാൻ്റെ വിഗ്രഹങ്ങൾ രണ്ട് തരത്തിലുണ്ട്. തുമ്പിക്കൈ ഇടത് വശത്തേക്കും വലത് വശത്തേക്കും തിരിഞ്ഞിരിക്കുന്ന വിധത്തിലാണ് അവ. വലത് ഭാഗം സൂര്യനാഡിയുമായി ബന്ധപ്പെട്ടിരിക്കുന്നു. കൂടാതെ തെക്ക് ദിശ യമലോകത്തെ സൂചിപ്പിക്കുന്നതുമാണ്. ആരാണോ യമലോക ദിശയെ ധൈര്യത്തോടെ നേരിടുന്നത് അവനെ ശക്തിശാലിയായി കണക്കാക്കുന്നു. കൂടാതെ സൂര്യനാഢി പ്രവര്‍ത്തന ക്ഷമമായിട്ടുള്ളവര്‍ തേജസ്വിയായിരിക്കും. ഈ രണ്ട് കാരണത്താൽ വലത് ഭഗത്തേക്ക് തുമ്പിക്കൈയുള്ള ഗണപതി ശക്തിയുള്ള ഗണപതിയാണ് എന്നാണ് വിശ്വാസം. മാത്രമല്ല വലത്തോട്ട് തുമ്പിക്കൈയുള്ള വിഗ്രഹം പൂജിക്കുമ്പോൾ കര്‍മ്മകാണ്ഡപ്രകാരമുള്ള എല്ലാ നിയമങ്ങളും കര്‍ശനമായി പാലിച്ചിരിക്കണം. വലത് ഭഗത്തേക്ക് തുമ്പിക്കൈയുള്ള ഗണേശ വിഗ്രഹങ്ങൾ വീടുകളിൽ സൂക്ഷിക്കരുതെന്ന് പറയുന്നത് ഈ കാരണത്താലാണ്.

ഇടത് വശത്തേക്ക് വളഞ്ഞിരിക്കുന്ന തുമ്പിക്കൈയുള്ള ഗണേശ വിഗ്രഹത്തെ വാമമുഖി എന്ന് പറയുന്നു. ഇടത് ഭാഗത്തേയും വടക്ക് ദിശയേയും സൂചിപ്പിക്കുന്നതാണ് വാമം. അതുപോലെ വടക്ക് ദിശ ആദ്ധ്യാത്മിക ഉന്നതിക്ക് അനുയോജ്യവും ആനന്ദദായകവുമാണ്. വീടുകളിൽ ഗണപതി ആരാധനക്ക് ഉത്തമം വാമമുഖി ഗണപതിയാണ്.

ചുവന്ന പുഷ്പങ്ങൾ
വിഘ്നേശ്വരന്‍റെ നിറം ചുവപ്പായതിനാൽ പൂജകളിൽ ചുവന്ന വസ്ത്രം, ചുവന്ന പുഷ്പങ്ങൾ, രക്തചന്ദനം, എന്നിവ ഉപയോഗിക്കുന്നത് ഉത്തമമാണ്. ചുവപ്പ് നിറത്തിന് അന്തരീക്ഷത്തിലെ പവിത്ര കണങ്ങളെ അഥാവാ നല്ല കാര്യങ്ങളെ കൂടുതലായി ആകര്‍ഷിക്കാൻ കഴിവുണ്ട്. പൂജാവേളകളിൽ കൂടുതൽ ചൈതന്യം ലഭിക്കുമെന്നതിനാലാണ് ഗണപതി ഭഗവാന് ചുവപ്പ് നിറത്തിന് പ്രാധാന്യം നൽകിയത്.

ഗണപതി പൂജയിൽ കറകപ്പുല്ല്
ഗണേശാരാധനയിൽ കറകപ്പുല്ലിന് വളരെയധികം പ്രാധാന്യമുണ്ട്. ദുര്‍വ എന്നാണ് കറുക അറിയപ്പെടുന്നത്. ദു എന്നാൽ ദൂരെയുള്ളത്. അവ എന്നാൽ സമീപത്ത് കൊണ്ടു വരുന്നത് എന്നുമാണ് അര്‍ത്ഥമാക്കുന്നത്. ദൂരെയുള്ള പവിത്രകങ്ങളെ സമീപത്ത് കൊണ്ടു വരുന്നതെന്തോ അത് ദുര്‍വയാകുന്നു. അതിനാലാണ് ഗണപതി പൂജയിൽ കറുകപ്പുല്ല് പ്രധാന ദ്രവ്യമായി ഉപയോഗിക്കുന്നത്.

ഗണേശോത്സവം
മാഘമാസത്തിൽ വെളുത്തപക്ഷത്തിലെ ചതു‍ര്‍ത്ഥി നാളിലാണ് ഗണപതി ഭഗവാൻ അവതരിച്ചത്. അതുകൊണ്ട് തന്നെ ഗണപതി ഭഗവാന്‍റെ ചൈതന്യം ആയിരം മടങ്ങ് കൂടുതൽ അളവിൽ ഈ ദിവസം ഭൂമിയിലെത്തിച്ചേരും. ഈ ദിവസം ഗണപതി ഭഗവാന്‍റെ നാമം ജപിക്കുന്നതും, പൂജകൾ നടത്തുകയും ഏറെ ഗുണപ്രദമാണ്.

തരവത്ത് ശങ്കരനുണ്ണി , പാലക്കാട്
+91 9847118340

Story Summary: Significance of Genesha Worshipping