തന്ത്രരത്നം പുതുമന മഹേശ്വരൻ നമ്പൂതിരി
അനുഗ്രഹവർഷിണിയായ ഭദ്രകാളിയെ പൂജിക്കാൻ ഏറ്റവും നല്ല ദിവസമാണ് കുംഭഭരണി. 2021 ഫെബ്രുവരി 18 നാണ് ഇത്തവണ കുംഭഭരണി. മിക്ക ഭദ്രകാളി ക്ഷേത്രങ്ങളിലും അതിവിശേഷമായാണ് ഈ ദിവസം കൊണ്ടാടുന്നത്. ചെട്ടികുളങ്ങര ഭഗവതി ക്ഷേത്രം ഉൾപ്പെടെ അറിയപ്പെടുന്ന ഒട്ടേറെ ക്ഷേത്രങ്ങളിൽ കുംഭ ഭരണി ദിവസം ഉത്സവവും വിശേഷാൽ പൂജകളും നടക്കും. മണ്ടയ്ക്കാട് കൊട, കൊടുങ്ങല്ലൂർ കൊടിയേറ്റ്, പിഷാരിക്കാവിൽ കളിയാട്ടം കുറിക്കൽ, വൈരങ്കോട് തീയാട്ട് എന്നിവ കുംഭഭരണി നാളിലാണ്. തിരുവനന്തപുരം പാച്ചല്ലൂർ ഭദ്രകാളി ക്ഷേത്രത്തിലും ശാസ്തമംഗലം ബ്രഹ്മപുരം ക്ഷേത്രത്തിലും കുംഭഭരണി വിശേഷമാണ്. ഗുരുതി സമർപ്പണത്തിനും ഈ ദിവസം ഏറെ വിശേഷമാണ്.
അധർമ്മത്തിന്റെ സംഹാരമൂർത്തിയും സാധുക്കളുടെ രക്ഷകയുമാണ് ഭദ്രകാളി. കുഞ്ഞുങ്ങളെയും സ്ത്രീകളെയും ഉപദ്രവിക്കുന്നവരോട് അമ്മ ക്ഷമിക്കില്ല. അതുകൊണ്ട് തന്നെ ഭദ്രകാളിയെ ഉപാസിച്ചാൽ അതിവേഗം ശത്രുദോഷവും ദൃഷ്ടിദോഷവും അകലും. ചൊവ്വാപരിഹാരത്തിനും കുംഭഭരണി ഉപാസന നല്ലതാണ്. ദേവി എന്നല്ല അമ്മേ എന്നാണ് ഭക്തർ വിളിക്കുന്നത്. ഭക്തരുമായി ഇത്രമാത്രം ആത്മബന്ധം പുലർത്തുന്ന വേറെ മൂർത്തിയില്ല. എന്നാൽ കോവിഡ് മഹാമാരി ഭീഷണി കാരണം എല്ലാവർക്കും ക്ഷേത്രങ്ങളിൽ കുംഭഭരണി ഉത്സവത്തിൽ പങ്കെടുക്കാൻ കഴിയില്ല. പക്ഷേ എന്തെങ്കിലും നിവർത്തിയുണ്ടെങ്കിൽ കുംഭഭരണി വ്രതം മുടക്കരുത്.
കുംഭഭരണിയുടെ തലേദിവസമായ 2021 ഫെബ്രുവരി 17 ന് വ്രതം തുടങ്ങണം. ശരീരിക ബന്ധവും ലഹരി പദാർത്ഥങ്ങളും മത്സ്യമാംസാദി ഭക്ഷണവും ഒഴിവാക്കി വേണം വ്രതം. പുല, വാലായ്മ, മാസാശുദ്ധി എന്നിവ ഉള്ളവർ വ്രതം ഒഴിവാക്കണം. രാവിലെയും വൈകിട്ടും നെയ്വിളക്ക് കൊളുത്തി കഴിയുന്നത്ര തവണ ദേവീ മന്ത്രങ്ങളും സ്തുതികളും ജപിക്കണം. എല്ലാവിധ ജീവിത തടസങ്ങളും അകലുന്നതിന് കുംഭഭരണി വ്രതം ഉത്തമമാണ്. അഭീഷ്ടസിദ്ധിയാണ് ഭരണി വ്രതത്തിന്റെ പ്രധാനഫലം.
വ്രതദിവസങ്ങളിൽ രാവിലെയും വൈകിട്ടും കുളിച്ച് ഭദ്രകാളിയുടെ മൂലമന്ത്രം ജപിക്കണം. ദേവിയുടെ ഏറ്റവും ശക്തിയുള്ളതും അത്ഭുതശക്തിയുള്ളതുമായ മൂലമന്ത്രമാണ് ജപിക്കേണ്ടത്. ഓം ഐം ക്ലീം സൗ: ഹ്രീം ഭദ്രകാള്യൈ നമ: എന്ന മന്ത്രമാണ് 48 പ്രാവശ്യം വീതം രാവിലെയും വൈകിട്ടും ജപിക്കേണ്ടത്. മന്ത്രജപഫലം കാര്യവിജയമാണ്. ഉഗ്രശക്തിയുള്ള ഈ മന്ത്രം നിത്യജപത്തിനും നല്ലതാണ്. ഇഷ്ടകാര്യലബ്ധിക്കും ശത്രുദോഷം മൂലം വരുന്ന ദുരിതങ്ങൾ അകറ്റാനും മൂലമന്ത്രത്തിന് അത്ഭുതശക്തി ഉണ്ട്. 12, 21, 41 തുടങ്ങി യഥാശക്തി ദിവസം തുടർച്ചയായി ജപിക്കാം.
കുംഭഭരണി നാളിൽ അല്ലെങ്കിൽ ഏതൊരു മാസത്തെയും ഭരണിനാൾ ജപം തുടങ്ങുന്നതിന് നല്ലതാണ്. കുംഭഭരണി ദിവസം തുടങ്ങി മീനഭരണി ദിവസം വരെ മന്ത്രജപം ചെയ്യുന്നത് ഏറെ ഫലപ്രദം.കുംഭഭരണി വ്രതം അനുഷ്ഠിക്കാൻ കഴിയാത്തവർ ഉപാസന എങ്കിലും നടത്തുന്നത് നല്ലതാണ്. പവിത്രമായ ഈ ദിവസം ഭദ്രകാളി ക്ഷേത്രത്തിൽ ദർശനം നടത്തി കഴിവിനൊത്ത വഴിപാടുകൾ നടത്തണം. കടുംപായസം, പുഷ്പാഞ്ജലി, രക്തപുഷ്പാഞ്ജലി എന്നിവയാണ് ഭദ്രകാളി പ്രധാനമായ വഴിപാടുകൾ.
ഭദ്രകാളിയുടെ ധ്യാനം
കാളീം മേഘസമപ്രഭാം
ത്രിനയനാം
വേതാളകണ്ഠസ്ഥിതാം
ഖഡ്ഗം ഖേടകപാലദാരികശിര:
കൃത്വാ കരാഗ്രേഷു ച
ഭൂതപ്രേതപിശാചമാതൃസഹിതാം മുണ്ഡസ്രജാലംകൃതാം
വന്ദേ ദുഷ്ടമസൂരികാദിവിപദാം
സംഹാരിണീമീശ്വരീം
ALSO READ
ഭദ്രകാളിയുടെ മൂല മന്ത്രം
ഓം ഐം ക്ലീം സൗ: ഹ്രീം ഭദ്രകാള്യൈ നമ:
ഭദ്രകാളി ഗായത്രി
ഓം രുദ്ര സുതായൈ വിദ്മഹേ
ശൂല ഹസ്തായൈ ധീമഹി
തന്നോ കാളി പ്രചോദയാത്
ഭദ്രകാളി സ്തുതി
കാളി കാളി മഹാകാളി ഭദ്രകാളി നമോസ്തുതേ
കുലം ച കുലധർമ്മം ച മാം ച പാലയപാലയ
സംശയ നിവാരണത്തിനും
മന്ത്രോപദേശത്തിനും ബന്ധപ്പെടുക:
തന്ത്രരത്നം പുതുമന മഹേശ്വരൻ നമ്പൂതിരി,
+91 09447020655
