(നേരം ഓൺ ലൈൻ ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വിശേഷങ്ങൾക്കായി ക്ലിക്ക് ചെയ്യൂ : riyoceline.com/projects/Neram/ . നേരം ഓൺലൈനിൽ പ്രസിദ്ധീകരിക്കാൻ ലേഖനങ്ങൾ ചിത്രങ്ങൾ അയയ്ക്കേണ്ട വാട്ട്സാപ്പ് നമ്പർ : +91 8138015500 )
മംഗള ഗൗരി
2025 ആഗസ്റ്റ് 5 ചൊവ്വാഴ്ചയാണ് സൽസന്താന ഭാഗ്യം നേടാൻ ഉത്തമമായ പുത്രപദ ഏകാദശി. പുണ്യദഏകാദശി, പുത്രദ ഏകാദശി, പുത്രജാത ഏകാദശി, പവിത്ര ഏകാദശി എന്നിങ്ങനെ വിവിധ പേരുകളിൽ ഈ വ്രതം പ്രസിദ്ധമാണ്. മക്കളില്ലാതെ വിഷമിക്കുന്ന
യുവതീയുവാക്കൾ അതിശക്തമായി ആഗ്രഹിച്ച് വിധിപ്രകാരം ഈ വ്രതം അനുഷ്ഠിച്ചാൽ സന്താനഭാഗ്യം
ലഭിക്കും. സാധാരണ ഏകാദശി വ്രതഫലങ്ങൾ എല്ലാം തന്നെ പുത്രദ ഏകാദശിക്കും പറയപ്പെടുന്നു. കർക്കടകം അല്ലെങ്കിൽ ചിങ്ങം മാസത്തിലെ ശുക്ലപക്ഷത്തിലാണ് ഈ ഏകാദശി വരുന്നത്. ഭൗതികജീവിതത്തില് അളവറ്റ ഐശ്വര്യവും, അന്ത്യത്തില് മോക്ഷവുമാണ് ഏകാദശിവ്രത ഫലം.
തിങ്കളാഴ്ച വ്രതം തുടങ്ങണം
വിധിപ്രകാരം പുത്രപദ ഏകാദശി നോൽക്കുന്നവർ തലേന്ന് ദശമി നാളിൽ ഒരിക്കൽ എടുത്ത് വ്രതം തുടങ്ങണം. ഏകാദശിനാൾ പൂർണ്ണോപവാസമാണ് വിധിച്ചിട്ടുള്ളത്. പക്ഷേ ആരോഗ്യ പ്രശ്നങ്ങളുള്ളവർക്ക് ലഘുഭക്ഷണമാകാം. ആഗസ്റ്റ് 4 ന് പകൽ 11:44 മുതൽ 5 ന് പകൽ 1:13 വരെയാണ് ഏകാദശി തിഥി. ചൊവ്വാഴ്ച
രാവിലെ 6 മണി 47 മിനിട്ട് മുതൽ രാത്രി 7 മണി 23 മിനിട്ട് വരെയാണ് ഹരിവാസരവേള. ഈ സമയത്ത് വിഷ്ണുപൂജ, മന്ത്രജപം എന്നിവ തീർച്ചയായും നടത്തണം.
ഏകാദശി വ്രതം ശ്രേഷ്ഠം
എല്ലാ വ്രതങ്ങളിലും ശ്രേഷ്ഠം ഏകാദശി വ്രതം എന്നാണ് വിഷ്ണുഭക്തരുടെ പ്രമാണം. ഇഹലോക സുഖവും പരലോക സുഖവും തരുന്ന വ്രതമാണിത്. മുരൻ എന്ന അസുരനെ നിഗ്രഹിക്കാൻ വിഷ്ണുഭഗവാനിൽ നിന്നും അവതരിച്ച ദേവിയാണ് ഏകാദശിയായത്. ദേവിയുടെ ആവിർഭാവ ദിവസം ഏകാദശിയായതിനാൽ ആ പേരു സ്വീകരിച്ചു. മുരനെ നിഗ്രഹിച്ചതിന് വരദാനം ചോദിച്ച ദേവിക്ക് ഭഗവാനാണ് ആ തിഥി വരുന്ന ദിവസങ്ങളിൽ സ്വന്തം പേരിൽ ഏകാദശിവ്രതം അനുവദിച്ചത്. മുരനെ വധിച്ചതിനാലാണ് മഹാവിഷ്ണു മുരാരിയായത്.
ഗൃഹസ്ഥർക്ക് വിശേഷം
ചാന്ദ്രമാസത്തിലെ ഇരുപക്ഷങ്ങളിലെയും പതിനൊന്നാം തിഥിയാണ് ഏകാദശി. അമാവസിക്കും പൗർണ്ണമിക്കും ശേഷം ഇത് വരും. വെളുപക്ഷത്തിലേത് ശുക്ലപക്ഷ ഏകാദശി; ഗൃഹസ്ഥർ വെളുപക്ഷത്തിലെ ഏകാദശി നോൽക്കുന്നത് ശ്രേഷ്ഠമാണ്. കറുത്ത പക്ഷത്തിലുള്ളത് കൃഷ്ണപക്ഷ ഏകാദശി. ഒരു വർഷം 24 ഏകാദശിയുണ്ട്. ചിലപ്പോൾ ഇത് 25 എണ്ണവും ആകാം. ഭഗവാൻ ശ്രീകൃഷ്ണൻ അർജ്ജുനന് ഭഗവദ്ഗീത ഉപദേശിച്ചത് ഒരു ഏകാദശിയിലാണെന്ന് വിശ്വസിക്കുന്നു. സൂര്യോദയത്തിന് ദശമി ബന്ധമുള്ള ഏകാദശിയാണ് ഭൂരിപക്ഷ ഏകാദശി, ദ്വാദശി ബന്ധമുള്ളത് ആനന്ദപക്ഷ ഏകാദശി. ധനു, മകരം, മീനം, മേടം എന്നീ മാസങ്ങളിൽ ഒന്നിൽ വേണം
തുടർച്ചയായ ഏകാദശിവ്രതം തുടങ്ങാൻ.
ഹരിവാസര പുണ്യവേള
ഏകാദശിയുടെ അവസാന 15 നാഴികയും ദ്വാദശിയുടെ ആദ്യത്തെ 15 നാഴികയും കൂടിയ ഹരിവാസര വേള ഒന്നും ഭക്ഷിക്കാതെ വിഷ്ണു ചിന്തയും ജപവുമായി കഴിയുന്നത് അത്യുത്തമമാണ്. ഈ സമയത്ത് മഹാവിഷ്ണുവിന്റെ സാമീപ്യം വളരെ കൂടുതൽ ഭൂമിയില് അനുഭവപ്പെടും എന്നാണ് വിശ്വാസം. ഹരിവാസര സമയത്ത് നടത്തുന്ന മഹാവിഷ്ണു ഭജനം പരിപൂര്ണ്ണ ഫലസിദ്ധിയേകും.
ALSO READ
മൂന്ന് ദിവസവും പ്രധാനം
ദശമി, ഏകാദശി, ദ്വാദശി എന്നീ മൂന്ന് ദിവസങ്ങളും ഏകാദശിവ്രതത്തിന് പ്രാധാനമാണ്. ഈ ദിവസങ്ങളില് ഒരുനേരം മാത്രം അരിയാഹാരം കഴിക്കാം. മറ്റ് സമയത്ത് ഗോതമ്പിലുണ്ടാക്കിയ ലളിത വിഭവങ്ങളും പയര്, പുഴുക്ക്, പഴങ്ങള്, ഫലം എന്നിവ കഴിക്കാം. ഏകാദശിനാളില് പൂര്ണ്ണമായി ഉപവസിക്കുന്നതാണ് ഉത്തമം. ഈ ദിവസം തുളസീതീര്ത്ഥം മാത്രം കുടിച്ച് വ്രതമെടുക്കുന്നവരുണ്ട്. അതിന് കഴിയാത്തവർ ഒരു നേരം അരിയാഹാരം കഴിച്ച് വ്രതം നോൽക്കുന്നു. അടുത്ത ദിവസം തുളസീതീര്ത്ഥം കഴിച്ച് വ്രതം പൂർത്തിയാക്കും. ഈ മൂന്ന് ദിവസവും പ്രത്യേകിച്ച് ഏകാദശി ദിവസം വിഷ്ണു പ്രീതികരമായ മന്ത്രജപങ്ങൾ പ്രധാനമാണ്. കഴിയുന്നത്ര തവണ ഓം നമോ നാരായണായ, ഓം നമോ ഭഗവതേ വാസുദേവായ എന്നിവ ജപിക്കണം വിഷ്ണുഗായത്രി, വിഷ്ണു ശതനാമ സ്തോത്രം, വിഷ്ണു അഷ്ടോത്തരം, വിഷ്ണു സഹസ്രനാമം, അച്യുതാഷ്ടകം എന്നിവ ജപിക്കുന്നത് ഗുണപ്രദമാണ്. വിഷ്ണു ക്ഷേത്ര ദര്ശനം നടത്തണം. ക്ഷേത്ര ദര്ശനത്തിന് കഴിയാത്തവർ വീട്ടിൽ പൂജാമുറിയിൽ മഹാവിഷ്ണുവിന്റെ ചിത്രത്തിനു മുന്നിൽ വിളക്ക് കൊളുത്തി പ്രാർത്ഥിക്കണം. ശ്രീരാമ, ശ്രീകൃഷ്ണ പ്രീതികരമായ മന്ത്രങ്ങൾ ജപിക്കുന്നതിനും ഏകാദശി ദിനം ഉത്തമമാണ്. മൗനം ഭജിക്കുന്നതും നല്ലതാണ്. മത്സ്യ മാംസ ഭക്ഷണം, മദ്യസേവ, ശാരീരിക ബന്ധം, പകലുറക്കം ഇതൊന്നും പാടില്ല. രണ്ടു നേരം കുളിക്കണം.
തുളസിയില സമര്പ്പിക്കണം
മഹാവിഷ്ണുവിന് ഏറെ പ്രിയപ്പെട്ട തുളസിയിലയും പഴങ്ങളും ഏകാദശിക്ക് ക്ഷേത്രത്തിൽ സമര്പ്പിക്കുന്നത് സുകൃതകരമാണ്. വിഷ്ണുസൂക്ത പുഷ്പാഞ്ജലി, മുഴുക്കാപ്പ് തുടങ്ങിയ വഴിപാടുകൾ നടത്തുന്നതും നല്ലതാണ്. മേടം, കർക്കടകം രാശിയിൽ പിറന്ന അശ്വതി, ഭരണി, കാർത്തിക ആദ്യകാൽ, പുണർതം അവസാന കാൽ, പൂയം, ആയില്യം നക്ഷത്രക്കാർ ഏകാദശി വ്രതം
നോൽക്കുന്നത് വളരെ നല്ലതാണ്.
വ്രതമെടുക്കാത്തവർ ചെയ്യേണ്ടത്
ഏകാദശി വ്രതമെടുക്കാനാകാത്തവർ അന്ന് മഹാവിഷ്ണു ക്ഷേത്ര ദർശനം നടത്തി മൂലമന്ത്രമായ ഓം നമോ നാരായണായ അത്ഭുത ശക്തിയുള്ള നാമത്രയം ഓം അച്യുതായ നമഃ, ഓം അനന്തായ നമഃ, ഓം ഗോവിന്ദായ നമഃ എന്നിവ കഴിയുന്നത്ര ജപിക്കണം. വിഷ്ണു സഹസ്രനാമം, വിഷ്ണു അഷ്ടോത്തരം, വിഷ്ണു ശതനാമ സ്തോത്രം, അച്യുതാഷ്ടകം ജപിക്കുന്നതും നല്ലതാണ്. ഏകാദശി എടുക്കുന്നവരിൽ
ഏറ്റവും കൂടുതൽ ആളുകൾ കേൾക്കുന്ന വിഷ്ണു ശതനാമ സ്തോത്രം ശ്രവിക്കാം. ആലാപനം: മണക്കാട് ഗോപൻ.
Story Summary: Significance of Pavitra / Puthrapada Ekadashi
ആത്മീയ വിശേഷങ്ങളും ജ്യോതിഷ പ്രവചനങ്ങളും സംബന്ധിച്ച വാര്ത്തകള് അപ്പപ്പോള് ലഭിക്കാന്, അസ്ട്രോ ജി, നേരം ഓൺലൈൻ ആപ് ഡൗണ്ലോഡ് ചെയ്യുക : AstroG App
Copyright 2025 riyoceline.com/projects/Neram/. All rights reserved
