(നേരം ഓൺ ലൈൻ ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വിശേഷങ്ങൾക്കായി ക്ലിക്ക് ചെയ്യൂ : riyoceline.com/projects/Neram/ . നേരം ഓൺലൈനിൽ പ്രസിദ്ധീകരിക്കാൻ ലേഖനങ്ങൾ ചിത്രങ്ങൾ അയയ്ക്കേണ്ട വാട്ട്സാപ്പ് നമ്പർ : +91 8138015500 )
ജോതിഷി പ്രഭാസീന സി പി
ജീവിത ദുരിതങ്ങളിൽ ഏറ്റവും പ്രധാനം രോഗക്ലേശം, ശത്രുദോഷം, സാമ്പത്തിക ബുദ്ധിമുട്ട്, സന്താന ക്ലേശം, ബാധാദോഷം, ശനിദോഷം, ദൃഷ്ടിദോഷം, ശാപദോഷം തുടങ്ങിയവയാണ്. ഇവയിൽ നിന്നെല്ലാം മുക്തി നേടാൻ ഏറ്റവും ഉത്തമമാണ് ത്രയോദശി തിഥിയിലെ പ്രദോഷ വ്രതാചരണം. അന്ന് ഉപവസിച്ച് ശിവ പാർവ്വതിമാരെ പ്രാർത്ഥിക്കുകയും സന്ധ്യയ്ക്ക് പ്രദോഷപൂജയിൽ പങ്കെടുക്കുകയും ചെയ്താൽ ഈ സങ്കടങ്ങളിൽ നിന്ന് മോചനം നേടാം. ഈ പുണ്യ ദിനത്തിൽ മനസും ശരീരവും ഒരുപോലെ ശുദ്ധമാക്കി ശിവ പാർവതിമാരെ ഭജിച്ചാൽ എല്ലാ പാപങ്ങളും നശിക്കും. എല്ലാ ആഗ്രഹങ്ങളും സാധിക്കും. ഭൗതികമായ സുഖസൗകര്യങ്ങളും ലഭിക്കും.
ജീവിതാന്ത്യത്താൽ ശിവലോക പ്രാപ്തിയും നേടാം.
🟠 സന്ധ്യയ്ക്ക് ത്രയോദശി വേണം
സന്ധ്യയ്ക്ക് ത്രയോദശി തിഥി വരുന്ന ദിവസമാണ് പ്രദോഷ വ്രതം അനുഷ്ഠിക്കുന്നത്; ശിവ ക്ഷേത്രത്തിൽ
പ്രദോഷ പൂജ നടത്തുന്നത്. എല്ലാ മാസവും കുറഞ്ഞത് രണ്ട് ത്രയോദശി തിഥി വരും. കറുത്തപക്ഷത്തിലും വെളുത്തപക്ഷത്തിലും വരുന്ന രണ്ടു പ്രദോഷ വ്രതവും ആചരിക്കാം. ചിലർ കറുത്തപക്ഷ പ്രദോഷത്തിന് കൂടുതൽ പ്രാധാന്യം കൊടുക്കുന്നു. പുണ്യ കർമ്മങ്ങൾ അനുഷ്ഠിക്കാൻ ഉത്തമമായ ദിവസമാണ് പ്രദോഷം. ഇതിൽ തിങ്കൾ പ്രദോഷവും, ശനി പ്രദോഷവും വളരെ ശ്രേഷ്ഠമാണ്. ഇതിന് ഇരട്ടിഫല സിദ്ധിയുണ്ട്.
🟠 ആഗസ്റ്റ് 6 ബുധനാഴ്ച പ്രദോഷം
2025 ആഗസ്റ്റ് 6 ബുധനാഴ്ച കർക്കടക മാസത്തിലെ ശുക്ലപക്ഷ പ്രദോഷമാണ്. അന്ന് ശിവ ക്ഷേത്രത്തിൽ ദർശനം, വഴിപാടുകൾ എന്നിവ നടത്തുന്നതും ശിവ പാർവതി മന്ത്രങ്ങളും സ്തോത്രങ്ങളും ജപിക്കുന്നതും ഗുണപ്രദമാണ്. പ്രദോഷാനുഷ്ഠാനം കുടുംബത്തിനും സന്തതികൾക്കും ഒരുപോലെ ഐശ്വര്യപ്രദമാണ്. ഭഗവാൻ മഹാദേവന്റെ അനുഗ്രഹത്തിനു ധാരാളം വ്രതങ്ങൾ ഉണ്ടെങ്കിലും ഏറെ ലളിതമായി ആചരിക്കാൻ കഴിയുന്നതാണ് പ്രദോഷം.
🟠 സർവദേവതാ കാടാക്ഷം ലഭിക്കും
പ്രദോഷസന്ധ്യാ സമയത്ത്, കൈലാസത്തില് ആനത്തോലുടുത്ത മഹാദേവന്, പാർവതി ദേവിയെ രത്നപീഠത്തിലിരുത്തി ഭഗവതിയുടെ മുന്പില് ആനന്ദ നടനം ആടുന്നു എന്നാണ് സങ്കല്പം. ആ പുണ്യവേളയില് വാണീ ഭഗവതി വീണ വായിക്കും. ബ്രഹ്മദേവൻ താളം പിടിക്കും. ദേവേന്ദ്രന് പുല്ലാങ്കുഴലൂതും. മഹാലക്ഷ്മി ഗീതം ആലപിക്കും. മഹാവിഷ്ണു മൃദംഗം വായിക്കും. നന്ദിയും ഭൃംഗിയും നടനം ചെയ്യും. സ്തുതിപാഠകര് സ്തുതിഗീതം ആലപിക്കും. ഗന്ധര്വയക്ഷകിന്നരന്മാര്, അപ്സരസുകള് തുടങ്ങി എല്ലാവരും ഭഗവാനെ സേവിച്ചു നില്ക്കും. അങ്ങനെ ത്രയോദശി തിഥിയിലെ പ്രദോഷ സന്ധ്യാവേളയിൽ കൈലാസത്തില് മുപ്പത്തിമുക്കോടി ദേവകളുടെയും സാന്നിധ്യമുണ്ടാകും. അതിനാൽ ഈ തിഥിയിലെ പ്രദോഷ സന്ധ്യാവേളയില് ശിവ ഭഗവാനെ പ്രാര്ത്ഥിച്ചാല് സന്തോഷവതിയായ പരാശക്തിയുടെയും മഹാദേവന്റെയും മാത്രമല്ല എല്ലാ ദേവീദേവന്മാരുടെയും കടാക്ഷവും അനുഗ്രഹവും ലഭിക്കും എന്നാണ് വിശ്വാസം.
🟠 തലേന്ന് ഒരിക്കലെടുക്കണം
പ്രദോഷ വ്രതം നോൽക്കുന്നവർ അതിന്റെ തലേന്ന് ഒരിക്കലെടുക്കണം. മാനസികമായും ശാരീരികമായും
ശുദ്ധി പാലിക്കണം. ദുഷിച്ച കൂടുകെട്ടുകൾ, ലഹരി വസ്തുക്കൾ, മത്സ്യമാംസാദികൾ, പരദ്രോഹചിന്ത ഇവ പാടില്ല. വാക്കുകൊണ്ടും പ്രവർത്തികൊണ്ടും ആരെയും
ദ്രോഹിക്കരുത്. മനസ് ഈശ്വര ചിന്തയിൽ ഏകാഗ്രമാക്കി കഴിയണം. സ്ത്രീപുരുഷബന്ധം, പുകവലി, വെറ്റില
മുറുക്ക് ഇതൊന്നും പാടില്ല.
ALSO READ
🟠 ശിവമന്ത്രങ്ങൾ ജപിക്കണം
പ്രദോഷ ദിവസം രാവിലെ കുളിച്ച് ദേഹശുദ്ധിയും മനഃശുദ്ധിയും വരുത്തി ശിവക്ഷേത്രദര്ശനം നടത്തണം.
ഉപവാസം അനുഷ്ഠിക്കണം. അതിന് ആരോഗ്യം അനുവദിക്കാത്തവർക്ക് ലഘു ഭക്ഷണം കഴിക്കാം. വൈകുന്നേരം പ്രദോഷ പൂജയുള്ള ശിവക്ഷേത്രത്തില് ദര്ശനം നടത്തണം. പ്രദോഷപൂജയിൽ പങ്കെടുത്ത് ഭഗവാന് കരിക്ക് നേദിക്കണം. പഞ്ചാക്ഷരീമന്ത്രം 108 തവണയോ ജപിക്കണം. അന്ന് ബ്രാഹ്മമുഹൂർത്തിൽ കൂടി ജപിച്ചാൽ അത്യുത്തമം. പഞ്ചാക്ഷരീ സ്തോത്രം, ശിവ അഷ്ടോത്തരം, സഹസ്രനാമം, ശിവപുരാണപാരായണം, ശിവാഷ്ടകം, മറ്റ് ശിവ സ്തുതികൾ, ഭജനകൾ എന്നിവ ഭക്തിപൂർവ്വം ചൊല്ലുക. പ്രദോഷപൂജ, ദീപാരാധന ഇവയ്ക്ക് ശേഷം ക്ഷേത്രത്തിൽ നിന്നും അവിലോ, മലരോ, പഴമോ കഴിച്ച് പാരണ വിടുക. ദീപാരാധനയ്ക്കു ശേഷം ക്ഷേത്രത്തിൽ നിന്നുള്ള ചോറു വാങ്ങി കഴിക്കാം.
🟠 എല്ലാ ദുരിതങ്ങളും ശമിക്കും
മാസംതോറും ഒരു പ്രദോഷമെങ്കിലും അനുഷ്ഠിച്ചാൽ ശത്രുദോഷ, ശാപദോഷങ്ങൾ അടക്കമുള്ള എല്ലാ ദുരിതങ്ങളും ശമിക്കും. ശത്രുവില് നിന്ന് മോചനമേ ആഗ്രഹിക്കാവൂ; ശത്രുനാശത്തിന് പ്രാര്ത്ഥിക്കരുത്. ദാരിദ്ര്യദു:ഖങ്ങൾ ശമിക്കുന്നതിനും സത്കീര്ത്തിക്കും സന്താനലബ്ധിക്കും രോഗശാന്തിക്കും എല്ലാവിധത്തിലെ ഉന്നതിക്കും ഐശ്വര്യത്തിനും പ്രദോഷവ്രതം ഏറ്റവും ഉത്തമമാണ്. ഗൃഹസ്ഥാശ്രമ ജീവിതത്തിലെ ബാധ്യതകൾ തീര്ന്നവര് മാത്രമേ മോക്ഷപ്രാപ്തിക്ക് പ്രാര്ത്ഥിക്കാവൂ.
🟠 ആദിത്യദശാ ദോഷം മാറ്റാം
ജാതകത്തില് ആദിത്യദശ വരുമ്പോൾ പ്രദോഷവ്രതം അനുഷ്ഠിച്ചാല് ഉദ്ദിഷ്ടകാര്യം അതിവേഗം സാധിക്കും. ജാതകത്തില് ഇഷ്ടദേവന് ആദിത്യനാണെങ്കില് പ്രദോഷവ്രതം നോൽക്കുന്നത് ഏറെ ഐശ്വര്യപ്രദമാണ്. ദീര്ഘായുസും സമ്പത്തും ലഭിക്കും. ജീവിതാവസാനം സായൂജ്യവും കരഗതമാകും. ജാതകത്തില് ആദിത്യന് അനിഷ്ടഷസ്ഥാനത്തു നില്ക്കുന്നവര്ക്ക് പ്രദോഷവ്രതാചരണം മൂലം അരിഷ്ടതകള് ഒഴിവാകും.
🟠 ശങ്കരധ്യാനം പ്രകാരം ജപിക്കണം
ഭഗവാൻ്റെ അതിമനോഹരമായ സ്വരൂപവർണ്ണനയായ ശങ്കരധ്യാന പ്രകാരം 11 പ്രദോഷനാളിൽ തുടർച്ചയായി ജപിച്ചാൽ ആഗ്രഹസാഫല്യം ഉറപ്പാണെന്ന് പറയുന്നു. കേൾക്കാം, പ്രശസ്ത ഗായകൻ മണക്കാട് ഗോപൻ ആലപിച്ച ശങ്കരധ്യാന പ്രകാരം:
ജോതിഷി പ്രഭാസീന സി പി,
മൊബൈൽ: + 91 9961442256
Story Summary: Significance of Pradosha Viratham on Karkataka Sukla Paksha
ആത്മീയ വിശേഷങ്ങളും ജ്യോതിഷ പ്രവചനങ്ങളും സംബന്ധിച്ച വാര്ത്തകള് അപ്പപ്പോള് ലഭിക്കാന്, അസ്ട്രോ ജി, നേരം ഓൺലൈൻ ആപ് ഡൗണ്ലോഡ് ചെയ്യുക : AstroG App
Copyright 2025 riyoceline.com/projects/Neram/. All rights reserved
