ജ്യോതിഷി സീനാ പ്രഭ സി പി
ഈ വർഷത്തെ അവസാന ചന്ദ്രഗ്രഹണം ഞായറാഴ്ച സംഭവിക്കുകയാണ്. 2025 സെപ്റ്റംബർ 7 ഞായറാഴ്ച, 1201 ചിങ്ങം 22 ന് രാത്രി 9:58 ന് കുംഭക്കൂറിൽ ചതയം പൂരുരുട്ടാതി നക്ഷത്ര സന്ധിയിൽ സംഭവിക്കുന്ന ഈ രാഹുഗ്രസ്ത ചന്ദ്രഗ്രഹണം അവിട്ടം 3, 4, ചതയം, പൂരുരുട്ടാതി 1, 2, 3 നക്ഷത്രങ്ങൾ ഉൾക്കൊള്ളുന്ന കുംഭം
രാശിക്കാരെയും മീനം (പൂരുരുട്ടാതി 4, ഉത്തൃട്ടാതി, രേവതി) മിഥുനം (മകയിരം 3,4 , തിരുവാതിര, പുണർതം 1,2,3), മകരം (ഉത്രാടം 2, 3, 4, തിരുവോണം , അവിട്ടം 1, 2 ) കുറുകളിൽ ജനിച്ചവരെയും കുറച്ച് ദോഷകരമായി ബാധിക്കാം. പൂരുരുട്ടാതി നക്ഷത്രത്തിൽ പൂർണ്ണമാകുന്ന ഈ ഗ്രഹണം ജാതകപ്രകാരം ചന്ദ്രദശയിലുള്ളവർക്കും ഇപ്പോൾ ചന്ദ്രഅപഹാരം പിന്നിടുന്നവർക്കും ചന്ദ്രന്റെ നക്ഷത്രങ്ങളായ രോഹിണി, അത്തം, തിരുവോണം നക്ഷത്രക്കാർക്കും ചന്ദ്രഗ്രഹണ ഫലം നല്ലതല്ല. ദോഷമായാലും ഗുണമാണെങ്കിലും ഈ ചന്ദ്രഗ്രഹണ ഫലം ഒരു വർഷമോ അടുത്ത ഗ്രഹണം വരെയോ നിലനിൽക്കും എന്ന് ആചാര്യന്മാർ പറയുന്നു. എങ്കിലും നമ്മുടെ ജാതകാലുള്ള ഗ്രഹങ്ങളുടെ ഫലങ്ങളും ഗോചരാലുള്ള ഫലങ്ങളും ദശാപഹാരങ്ങളും അനുകുലം ആയാൽ ഗ്രഹണ ദോഷങ്ങൾ കുടുതലായി ബാധിക്കില്ല.
🟠 രാത്രി 9:58 മണിക്ക് സ്പർശം
ഞായറാഴ്ച രാത്രി 9:58 മണിക്ക് സ്പർശവും അർദ്ധരാത്രി 1:22 മണിക്ക് ഗ്രഹണമോക്ഷവും ഉണ്ടാകും. ഈ സമയത്ത് ക്ഷേത്രങ്ങൾ അടച്ചിടും. രാത്രി 11 മണി മുതൽ 12 മണി വരെ ഗ്രഹണ മദ്ധ്യ കാലമാണ്. ഗ്രഹണം പൂർണ്ണമായും കാണാൻ കഴിയുന്നതിനാൽ ഇതിനെ
ബ്ലഡ് മൂൺ ചന്ദ്രഗ്രഹണം എന്ന് പറയുന്നു. കുംഭക്കൂറിൽ പൂരുരുട്ടതി നക്ഷത്രത്തിൽ രാഹു സഞ്ചരിക്കുന്ന സമയത്ത് ഗ്രഹണം നടക്കുന്നതിനാൽ ഇത് രാഹു ഗ്രസ്ത ചന്ദ്രഗ്രഹണമാണ്. സൂര്യനും ഭൂമിയും ചന്ദ്രനിൽ നേർരേഖയിൽ വരുമ്പോൾ, വെളുത്തവാവ് ദിവസമാണ്
ചന്ദ്രഗ്രഹണം നടക്കുക.
🟠 ദോഷാനുഭവങ്ങൾ ഇവർക്ക് കൂടുതൽ
ജനിച്ചകൂറിലും അതിന്റെ 2,4,5,7,8,9,12 കൂറുകളിലും ജന്മാനുജന്മനക്ഷത്രങ്ങളിലും ചന്ദ്രന്റെ നക്ഷത്രങ്ങളിലും ഗ്രഹണം ഉണ്ടായാൽ ദോഷാനുഭവങ്ങൾക്ക് ഇടവരാം.
ജന്മക്കൂറിൽ ഗ്രഹണം വരുന്നതാണ് ഏറ്റവും ദോഷപ്രദം.
പൂരുരുട്ടാതി നക്ഷത്രത്തിൽ ഗ്രഹണം നടക്കുന്നതിനാൽ കുംഭക്കൂറുകാർക്ക് ആരോഗ്യ പ്രശ്നങ്ങളും സാമ്പത്തിക വിഷമതകളും കലഹങ്ങളും ദു:ഖവുമുണ്ടാകാം.
മീനക്കൂറുകാർക്ക് സാമ്പത്തിക നഷ്ടവും വർദ്ധിച്ച പണച്ചെലവ് അപ്രതീക്ഷിത യാത്രകൾ, രോഗങ്ങൾ എന്നിവയാണ് ഈ ചന്ദ്രഗ്രഹണ ഫലം.
ALSO READ
മിഥുനക്കൂറുകാർക്ക് തൊഴിലിൽ നിർഭാഗ്യവും മാനഹാനിയും കുടുംബ സ്വത്തിൽ തർക്കം, ആലസ്യം, നഷ്ടം, കൊടുത്ത പണം കിട്ടാതെ വരിക എന്നിവ നേരിടും.
കർക്കടകക്കൂറുകാർക്ക് മൃത്യുഭീതിയും ചിങ്ങക്കൂറുകാർക്ക് ദാമ്പത്യ ജീവിതത്തിലും യാത്രയിലും ക്ലേശാനുഭവങ്ങളും വിവാഹ തടസ്സവും ദു:സ്വാധീനവും
നേരിടും.
തുലാക്കൂറുകാർക്ക് മനോദു:ഖവും സ്വത്ത് കലഹം, ദുർവ്യയം , ആരോഗ്യ പ്രശ്നങ്ങൾ എന്നിവ ഉണ്ടാകും.
വൃശ്ചികക്കൂറുകാർക്ക് അന്യ ദേശവാസവും ദേഹപീഢയുമാണ് ഗ്രഹണ ഫലം. ആരെയും കണ്ണടച്ച് വിശ്വസിക്കരുത്. ദമ്പതികൾ തെറ്റിദ്ധാരണകൾ ഒഴിവാക്കാൻ ശ്രമിക്കണം.
മകരക്കൂറിൽ ജനിച്ചവരെ കുടുംബ പ്രശ്നങ്ങളും കലഹവും സാമ്പത്തിക നഷ്ടവും ധനക്ലേശവും നേരിടും. ഇതിൽ തന്നെ കുംഭം , മീനം, മിഥുനം, മകരം രാശിക്കാർ കൂടുതൽ ജാഗ്രത പുലർത്തണം.
🟠 ഇവർക്ക് വലിയ ദോഷം ഇല്ല
ജനിച്ചകൂറിന്റെ 3,6,10,11 എന്നീ രാശികളിൽ ഗ്രഹണം ഉണ്ടായാൽ ചില ഗുണാനുഭവങ്ങൾ പ്രതീക്ഷിക്കാം. ഇത് പ്രകാരം ധനുക്കൂറുകാർക്ക് വലിയ ദോഷം ഇല്ല; ധനലാഭം ഉണ്ടാകും. കാര്യതടസ്സം, വാക്ക് പാലിക്കാൻ കഴിയാതെ വരിക, തെറ്റിദ്ധാരണ ഇവ ഉണ്ടാകും.
ഇടവക്കൂറിൽ ജനിച്ചവർക്ക് ഉത്തരവാദിത്വം കൂടും. എന്നാൽ തൊഴിൽ രംഗത്ത് വിജയവും സന്തോഷ അനുഭവങ്ങളും പ്രതീക്ഷിക്കാം. വിദേശ യാത്രാ തടസം , തർക്കങ്ങൾ എന്നിവ ഉണ്ടാകും. കന്നിക്കൂറുകാർക്ക് വളരെ സുഖാനുഭവങ്ങളുണ്ടാകും. കടം വീട്ടാൻ സാധിക്കും. ധനുക്കൂറുകാർ വാക്കുപാലിക്കാൻ ബുദ്ധിമുട്ടും. എങ്കിലും ഐശ്വര്യവും ധനസമൃദ്ധിയും സന്തോഷവും പ്രതീക്ഷിക്കാം. ചുരുക്കിപ്പറഞ്ഞാൽ ധനു, കന്നി, ഇടവം, മേടം രാശിക്കാർക്ക് ഗ്രഹണം കുറച്ച് സദ്ഫലങ്ങൾ സമ്മാനിക്കുമെന്ന് സാരം.
🟠 ഇന്ത്യയിൽ നേരിട്ടുകാണാനാകും
ഇന്ത്യയിൽ ദൂരദർശിനിയില്ലാതെ നേരിട്ടുകാണാനാകും. സൂര്യൻ, ഭൂമി, ചന്ദ്രൻ എന്നിവ നേർരേഖയിൽ വരുന്ന പ്രതിഭാസം ഇന്ത്യയിൽ എല്ലായിടത്തും ഇത് ദൃശ്യമാകും.
ഈ സമയത്ത് ചന്ദ്രൻ ചുവപ്പോ ഓറഞ്ചോ നിറത്തിലാകും ദൃശ്യമാവുക. സൂര്യനിൽനിന്നുള്ള പ്രകാശം ഭൂമിയുടെ അന്തരീക്ഷത്തിലൂടെ കടന്നുപോകുമ്പോൾ ഭൂമിയിലെ തരംഗദൈർഘ്യം കുറഞ്ഞ നിറങ്ങൾ മായുകയും തരംഗദൈർഘ്യം കൂടുതലുള്ള ഓറഞ്ച്, ചുവപ്പ് നിറങ്ങൾ ചന്ദ്രനിൽ പതിക്കുകയും ചെയ്യുന്നതാണ് കാരണം.
🟠 ഗ്രഹണ ദോഷം ഒഴിവാക്കാൻ ശിവ പ്രീതി
ശിവ ഭഗവാനെ പ്രീതിപ്പെടുത്തുകയാണ് ചന്ദ്രഗ്രഹണ ദോഷങ്ങൾ ഒഴിവാക്കാനുള്ള ഉത്തമമാർഗ്ഗം. ജ്യോതിഷപ്രകാരം നമ്മുടെ മനസ്സിന്റെ കാരകനായ ചന്ദ്രൻ ശരീരത്തെയും വളരെയധികം സ്വാധീനിക്കാറുണ്ട്. അതിനാൽ ചന്ദ്രഗ്രഹണത്തിന്റെ സ്വാധീനം ഏവരെയും ബാധിക്കും. അതിനാൽ ഗ്രഹണ സമയത്ത് ദോഷങ്ങൾ ഒഴിയുന്നത് ചന്ദ്രശേഖരനായ ശിവന്റെ മന്ത്രങ്ങളും ചന്ദ്രഗ്രഹത്തിന്റെ മന്ത്രങ്ങളും സ്തുതികളും കഴിയുന്നത്ര ജപിക്കണം.
🟠 ശുഭ കാര്യങ്ങൾക്ക് ഒഴിവാക്കണം
ശുഭ കാര്യങ്ങൾക്ക് ഗ്രഹണ സമയങ്ങൾ ഒഴിവാക്കണം. ഈ സമയത്ത് ഭക്ഷണം പാചകം ചെയ്യുന്നതും ഭക്ഷണം കഴിക്കുന്നതും വെള്ളം കുടിക്കുന്നതും പരമ്പരാഗതമായി ഒഴിവാക്കപ്പെടുന്ന കാര്യങ്ങളാണ്. ഈ സമയത്ത് അപകട സാദ്ധ്യതയുള്ള എല്ലാം പ്രവൃത്തികളിൽ നിന്നും ഒഴിഞ്ഞു നിൽക്കണം. 2028 ഡിസംബർ 31നാണ് ഇനി ഇന്ത്യയിൽ പൂർണചന്ദ്രഗ്രഹണം കാണാനാകുക.
ജോതിഷി പ്രഭാ സീന സി.പി
+91 9961 442256, 989511 2028
Story Summary: Effects and Astrological Remedies of Lunareclipse 2025 September 7
Copyright 2025 riyoceline.com/projects/Neram/. All rights reserved
