ഗൗരി ലക്ഷ്മി
വിനകളും വിഘ്നങ്ങളും നശിപ്പിക്കുന്ന ദേവനായാണ് ഗണേശഭഗവാൻ പ്രകീർത്തിക്കപ്പെടുന്നത്. എന്നാൽ തടസ്സങ്ങൾ മാത്രമല്ല രോഗദുരിതങ്ങളും അശുഭങ്ങളും ആപത്തുകളുമെല്ലാം മാറ്റുന്ന ദേവനാണ് ഗണേശൻ എന്ന് സുവ്യക്തമാക്കുന്നതാണ് ആദിശങ്കരനാൽ രചിക്കപ്പെട്ട ശ്രീ മഹാഗണേശ പഞ്ചരത്നം സ്തോത്രം. അഷ്ടൈശ്വര്യങ്ങൾ ആഗ്രഹിക്കുന്നവർ ദിവസവും പ്രഭാതത്തിൽ ഇത് ജപിക്കുക തന്നെ വേണം. എല്ലാ ദിവസവും ശരീരശുദ്ധിയും മനഃശുദ്ധിയും പാലിച്ച് ഇത് ചൊല്ലുന്നവർക്ക് ആരോഗ്യം, ദോഷനിവാരണം, വിദ്യ, പുത്ര സമ്പത്ത്, ദീർഘായുസ് തുടങ്ങി അഷ്ടൈശ്വര്യങ്ങളെല്ലാം ലഭിക്കുമെന്ന് ആചാര്യ സ്വാമികൾ ഫലശ്രുതിയിൽ വെളിപ്പെടുത്തുന്നു.
സന്തോഷത്തോടു കൂടി മോദകം വഹിക്കുന്നവനാണ് ഈ സ്തോത്രത്തിലൂടെ നമസ്കരിക്കപ്പെടുന്ന ഗണപതി. ഇതിന്റെ നിരന്തരമായ ജപത്തിലൂടെ ആപത്തുകൾ ഒഴിഞ്ഞു പോകും. അശുഭങ്ങളും രോഗക്ലേശവും ക്ഷണനേരത്തിൽ അകലും. ദാരിദ്ര്യദുഃഖം തീർത്ത് ഐശ്വര്യം പ്രദാനം ചെയ്യും. അർത്ഥം അറിഞ്ഞ് ഈ സ്തോത്രം ജപിച്ചാൽ ഭക്തരുടെ ജീവിതത്തിൽ സന്തോഷവും സൗഖ്യവും നിറയും. പ്രസിദ്ധ ഗായകൻ മണക്കാട് ഗോപൻ ആലപിച്ച മഹാഗണേശ പഞ്ചരത്നം സ്തോത്രം
കേൾക്കാം :
ശ്രീ മഹാഗണേശ പഞ്ചരത്നം വരികൾ അർത്ഥവും
1
മുദാകരാത്ത മോദകം സദാവിമുക്തി സാധകം
കലാധരാവതംസകം വിലാസിലോക രക്ഷകം
അനായകൈക നായകം വിനാശിതേഭ ദൈത്യകം
നതാശുഭാശു നാശകം നമാമി തം വിനായകം
2
നതേതരാതി ഭീകരം നവോദിതാർക്ക ഭാസ്വരം
നമത്സുരാരി നിർജ്ജരം നതാധികാപദുദ്ധരം
സുരേശ്വരം നിധീശ്വരം ഗജേശ്വരം ഗണേശ്വരം
മഹേശ്വരം സമാശ്രയേ പരാത്പരം നിരന്തരം
3
സമസ്ത ലോക ശങ്കരം നിരസ്ത ദൈത്യ കുഞ്ജരം
ദരേതരോദരം വരം വരേഭ വക്ത്രമക്ഷരം
കൃപാകരം ക്ഷമാകരം മുദാകരം യശസ്കരം
മനസ്കരം നമസ്കൃതാം നമസ്കരോമി ഭാസ്വരം
4
അകിഞ്ചനാർത്തിമാർജ്ജനം ചിരന്തനോക്തി ഭാജനം
പുരാരി പൂർവ്വ നന്ദനം സുരാരി ഗർവ്വ ചർവ്വണം
പ്രപഞ്ച നാശ ഭീഷണം ധനഞ്ജയാദി ഭൂഷണം
കപോല ദാനവാരിണം ഭജേ പുരാണ വാരണം
5
നിതാന്തകാന്ത ദന്ത കാന്തി മന്തകാന്തകാത്മജം
അചിന്ത്യ രൂപമന്തഹീന മന്തരായ കൃന്തനം
ഹൃദന്തരേ നിരന്തരം വസന്തമേവ യോഗിനാം
തമേകദന്തമേവ തം വിചിന്തയാമി സന്തതം
ഫലശ്രുതി
മഹാഗണേശ പഞ്ചരത്നമാദരേണ യോന്വഹം
പ്രജല്പതി പ്രഭാതകേ ഹൃദി സ്മരൻ ഗണേശ്വരം
അരോഗ താമദോഷതാം സുസാഹിതീം സുപുത്രതാം
സമാഹിതായുരഷ്ടഭൂതി മഭ്യുപൈതി സോചിരാത്
ശ്രീ മഹാഗണേശ പഞ്ചരത്നം അർത്ഥം
1
സന്തോഷപൂർവ്വം കൈയിൽ മോദകം വഹിക്കുന്നവനും,
എപ്പോഴും മുക്തിയിലേക്ക് നയിക്കുന്നവനും ചന്ദ്രക്കല ശിരസിൽ
അണിഞ്ഞവനും ലോകരക്ഷകനും നാഥനില്ലാത്തവരുടെ ഏകനാഥനും ഗജാസുരനെ നശിപ്പിച്ചവനും തന്നെ
നമസ്കരിക്കുന്നവരുടെ അശുഭങ്ങളെ ക്ഷണത്തിൽ നശിപ്പിക്കുന്നവനുമായ വിനായകനെ ഞാൻ നമസ്കരിക്കുന്നു.
2
നമസ്കരിക്കാത്തവർക്ക് ഭയം നൽകുന്നവനും ഉദയസൂര്യനെപ്പോലെ തിളങ്ങുന്നവനും ദേവാസുരന്മാരാൽ നമസ്കരിക്കപ്പെടുന്നവനും ആശ്രയിക്കുന്നവരെ
ആപത്തുകളിൽ നിന്നും കരകയറ്റുന്നവനും ദേവന്മാർക്കും സമ്പത്തിനും ഗജങ്ങൾക്കും ഗണങ്ങൾക്കും ഈശ്വരനും പരമ ശ്രേഷ്ഠനുമായ മഹാഗണപതിയെ ഞാൻ സദാ ആശ്രയിക്കുന്നു.
3
സമസ്ത ലോകത്തിനും മംഗളം പ്രദാനം ചെയ്യുന്നവനും ഗജാസുരനെ നശിപ്പിച്ചവനും വലിയ വയറുള്ളവനും ശ്രേഷ്ഠനും ഗജനായകന്റെ മുഖം ഉള്ളവനും നാശമില്ലാത്തവനും കാരുണ്യത്തിന്റെയും ക്ഷമയുടെയും വിളനിലമായവനും
നമസ്കരിക്കുന്നവർക്ക് സന്തോഷവും യശസും സദ്ബുദ്ധിയും നൽകുന്നവനും വിശ്വസിക്കുന്നവർക്ക് ഉള്ളിൽ പ്രകാശിക്കുന്നവനുമായ ഭഗവാനെ ഞാൻ നമസ്കരിക്കുന്നു.
4
ദാരിദ്ര്യദു:ഖദുരിതങ്ങളെ തുടച്ചു കളയുന്നവനും വേദോക്തികൾക്ക് വിഷയമായവനും പരമശിവന്റെ ആദ്യമകനും അസുരന്മാരുടെ അഹങ്കാരം തീർത്തവനും പ്രഞ്ചത്തെ നശിപ്പിക്കാൻ കഴിയുംവിധം ഭയങ്കരനും ധനഞ്ജയൻ എന്ന സർപ്പം തുടങ്ങിയ ഭൂഷണങ്ങളോട് കൂടിയവനും കവിൾത്തടത്തിൽ മദജലം ഒഴുകുന്നവനുമായ
ആദി ഗജ മൂർത്തിയെ ഞാൻ നമസ്കരിക്കുന്നു.
5
എപ്പോഴും അത്യന്തം മനോഹരമായ കൊമ്പുകളുടെ കാന്തിയുള്ളവനും അന്തകന്റെ അന്തകനായ ശിവന്റെ മകനും ചിന്തിക്കാനാകാത്ത സ്വരൂപത്തോടു കൂടിയവനും അവസാനമില്ലാത്തവനും വിഘ്നങ്ങളെ വെട്ടിമുറിക്കുന്നവനും യോഗികളുടെ ഹൃദയത്തിൽ എപ്പോഴും വസിക്കുന്നവനും ഏകദന്തനുമായ ആ ഒരുവനെത്തന്നെ ഞാൻ എപ്പോഴും സ്മരിക്കുന്നു.
ALSO READ
ഫലശ്രുതി
ഈ മഹാഗണേശ പഞ്ചരത്നം എന്നും പ്രഭാതത്തിൽ ആദരവോടെ ഗണേശനെ സ്മരിച്ച് ജപിക്കുന്നവർക്ക് ആരോഗ്യം, ദോഷം ഇല്ലായ്മ, സാഹിത്യഗുണം, സദ് പുത്രലാഭം, ദീർഘായുസ്സ്, അഷ്ടൈശ്വര്യങ്ങൾ എന്നിവ ക്രമേണ കരഗതമാകും.
Story Summary: Sri Maha Ganesha Pancharatnam a very powerful five stanzas stuti for Praising lord Ganesha composed by Adi Shankaracharya. Recitating this Pancharatnam daily will give us various benefits including Ashtaiswarya and removal of illnesses. The benefits are described in the phalashruti section of the Stotra
Copyright 2025 riyoceline.com/projects/Neram/. All rights reserved
