മംഗള ഗൗരി
വിഷ്ണുഭഗവാൻ യോഗനിദ്രയില് നിന്നുണരുന്ന പുണ്യദിനമായ ഉത്ഥാനഏകാദശി 2025 നവംബർ 2, 1201 തുലാം 16 ഞായറാഴ്ചയാണ്. കാർത്തിക മാസത്തിലെ വെളുത്തപക്ഷ ഏകാദശിയായ ഈ ദിവസം വ്രതം നോറ്റ് പുണ്യകർമ്മങ്ങൾ ചെയ്ത് ക്ഷേത്രദർശനവും വഴിപാടുകളും നടത്തി തൊഴുത് പ്രാർത്ഥിച്ചാൽ എത്ര കഠിനമായ ദോഷദുരിതങ്ങളും ശമിക്കും. പവിത്രമായ ഈ ദിവസം മുജ്ജന്മ സുകൃതം ഉള്ളവർക്ക് മാത്രമേ വ്രതം നോൽക്കാൻ പോലും കഴിയൂ എന്നാണ് വിശ്വാസം. പ്രബോധിനി ഏകാദശി, ദേവോത്ഥാന ഏകാദശി, ഹരി ബോധിനി ഏകാദശി, എന്നെല്ലാം ഇത് അറിയപ്പെടുന്നു.
🟣 തുളസീ പൂജാവസാനം
കാർത്തിക മാസത്തിലെ ഉത്ഥാന ഏകാദശിയുടെ മറ്റൊരു പ്രത്യേകത അതിനടുത്ത ദിവസമാണ്
12 ദിവസത്തെ തുളസീ പൂജാവസാനം എന്നതാണ്. കാർത്തികമാസത്തിലെ പന്ത്രണ്ടാം ദിവസം (ദ്വാദശി) തുളസീപൂജാ സമാപനനാളിലാണ് തുളസി വിവാഹം. വിഷ്ണു അവതാരമായ ശ്രീകൃഷ്ണ ഭഗവാനും തുളസി ദേവിയും തമ്മിലുള്ള വിവാഹം മഹാവിഷ്ണു ഭക്തർ വിശേഷാൽ അനുഷ്ഠാനങ്ങളോടെ ആചരിക്കുന്നു.
🟣 മംഗളകർമ്മങ്ങൾ തുടങ്ങുന്നു
ദേവശയിനി ഏകാദശി മുതൽ ഉത്ഥാന ഏകാദശി വരെ ഭഗവാൻ മഹാവിഷ്ണു യോഗനിദ്രയിൽ ശയിക്കുന്ന നാലുമാസത്തെ ചതുർമാസ്യമെന്നാണ് വിളിക്കുന്നത്. ഈ ചതുർമാസ്യ കാലത്ത് വിവാഹം, ഗൃഹപ്രവേശം തുടങ്ങിയ സുപ്രധാന മംഗളകർമ്മങ്ങൾ ഉത്തരേന്ത്യയിൽ നടത്താറില്ല. നിദ്രയിൽ ആയതിനാൽ ഈ സമയത്തെ കർമ്മങ്ങൾക്ക് വിഷ്ണു ഭഗവാന്റെ അനുഗ്രഹം ലഭിക്കില്ല എന്നാണ് വിശ്വസിക്കുന്നത്. ഈ ഏകാദശി കഴിഞ്ഞാൽ വിവാഹകാലം തുടങ്ങും
ALSO READ
🟣 വ്രതം, മന്ത്രജപം പ്രധാനം
ഉത്ഥാന ഏകാദശി വ്രതമെടുക്കുന്നവർ ദശമി ദിവസം മത്സ്യമാംസാദികൾ ത്യജിച്ച്, ഒരിക്കൽ എടുത്ത് വേണം വ്രതം ആരംഭിക്കാൻ. അന്ന് രാത്രി ദമ്പതികൾ ഒരുമിച്ച് ശയിക്കരുത്. ഏകാദശി നാൾ സൂര്യോദയത്തിന് മുൻപ് ഉണര്ന്ന് ശുഭ്ര വസ്ത്രം ധരിച്ച് ഓം നമോ നാരായണ, ഓം നമോ ഭഗവതേ വാസുദേവായ, ഹരേ കൃഷ്ണ ഹരേ കൃഷ്ണ കൃഷ്ണ കൃഷ്ണ ഹരേ ഹരേ തുടങ്ങിയ മന്ത്രങ്ങൾ യഥാശക്തി ചൊല്ലണം. വിഷ്ണു ഗായത്രി, വിഷ്ണു അഷ്ടോത്തരം, വിഷ്ണു ശതനാമ സ്തോത്രം വിഷ്ണു സഹസ്രനാമം എന്നിവ ചൊല്ലണം, അല്ലെങ്കിൽ കേൾക്കണം. ഭഗവത് ഗീത, നാരായണീയം, ഭാഗവതം തുടങ്ങിയവ വായിക്കണം. ഭഗവത് കീര്ത്തനങ്ങൾ കേൾക്കുകയും വിഷ്ണു ക്ഷേത്രത്തിൽ ദര്ശനം നടത്തുകയും ചെയ്യുന്നത് വളരെ ഉത്തമമാണ്. ഭഗവത് കീര്ത്തനങ്ങൾ ജപിക്കുന്നതിന് ഏറ്റവും ഉത്തമമായ സമയമാണ് ഹരിവാസര വേള. രാത്രി 1:55 മുതൽ 2 ന് ഞായറാഴ്ച പകൽ 11: 56 വരെയാണ് ഹരിവാസരം. ദ്വാദശി നാളിൽ രാവിലെ വ്രതം മുറിക്കാം.
🟣 വിഷ്ണു ശതനാമ സ്തോത്രം കേൾക്കാം
വിഷ്ണുഭക്തർക്കിടയിൽ ഏറ്റവും പ്രസിദ്ധമായ ഒരു സ്തുതിയാണ് വിഷ്ണു ശതനാമ സ്തോത്രം. ഏകാദശി എടുക്കുന്നവർ ഏറ്റവും കൂടുതൽ ജപിക്കുന്ന സ്തുതിയാണിത്. ഭഗവാനെ ഈ 100 നാമങ്ങളാൽ നിത്യവും ഭജിക്കുന്നവരുടെ ജീവിതത്തിൽ അശുഭങ്ങൾ ഉണ്ടാകാറില്ല എന്നാണ് വിശ്വാസം. വേദവ്യാസ വിരചിതമായ ഈ മധുര സ്തോത്രം എന്നും ജപിക്കുന്ന ഭക്തർക്ക് ചുരുങ്ങിയ സമയത്തിനകം സമ്പൽ സമൃദ്ധി, പാപമുക്തി, ഐശ്വര്യം, സന്തോഷം, ആരോഗ്യം ഇവ ലഭിക്കും. യാതൊരു വ്രതവും ഈ ജപത്തിന് നിർബന്ധമില്ല. മന്ത്രോപദേശം വേണ്ട. രാവിലെ വിളക്ക് കൊളുത്തി അതിന് മുമ്പിലിരുന്ന് ജപിക്കുക. പ്രസിദ്ധ ഗായകൻ മണക്കാട് ഗോപൻ ആലപിച്ച വിഷ്ണു ശതനാമ സ്തോത്രം കേൾക്കാം:
https://youtu.be/ZVuw_PzUEBo?si=lgOA0wwDYSTnIhKm
Story Summary: Significance Of Utthana Ekadeshi Or Prabodhini Ekadeshi
