മക്കളില്ലാത്തവർക്ക് മക്കളെയും ധനം ഇല്ലാത്തവർക്ക് സമ്പത്തും നൽകുന്ന ദേവി

ജോതിഷി പ്രഭാസീന സി പി

എല്ലാ ജീവജാലങ്ങൾക്കും സന്താനങ്ങളെ നൽകുന്ന, ആ കുഞ്ഞുങ്ങളെ ബാല്യത്തിൽ കാത്തു രക്ഷിക്കുന്ന ദേവിയാണ് ഷഷ്ഠിദേവി. ദേവസേന എന്ന പേരോടു കൂടിയ ദേവി കുഞ്ഞുങ്ങൾക്ക് വേണ്ടതെല്ലാം നൽകി എപ്പോഴും നമ്മുടെ പെറ്റമ്മയെപ്പോലെ സംരക്ഷിക്കും എന്നാണ് വിശ്വാസം. കുട്ടികളുടെ അരികിൽ ഷഷ്ഠി ദേവിയുടെ സാന്നിദ്ധ്യം എപ്പോഴും ഉണ്ടാകുമെന്നും അവർക്ക് ആയുസ് നൽകുന്ന സിദ്ധയോഗിനിയുമാണ് ഈ ഭഗവതി എന്ന് വിശ്വസിക്കുന്നു. സന്താനങ്ങൾ ജനിച്ചു കഴിഞ്ഞാൽ ഒരു വയസ്സ് വരെ ബാല പീഡകളില്ലാതെ ആവരെ കാത്ത് രക്ഷിക്കാൻ പരമ്പരാഗതമായി ഷഷ്ഠിദേവിയെ പൂജിക്കുന്നു.

🟠 ഏറ്റവും കീർത്തിയേറിയ അമ്മ

സുബ്രഹ്മണ്യന് പ്രാണനേക്കാൾ പ്രിയങ്കരിയായ ദേവസേനയെ മാതാക്കളിൽ ഏറ്റവും കീർത്തിയേറിയ അമ്മ എന്നാണ് പറയുന്നത്. മഹാവിഷ്ണുവിൻ്റെ പുത്രിയായും ബ്രഹ്മാവിൻ്റെ മകളായും ദക്ഷപ്രജാപതിയുടെ സന്താനമായുമെല്ലാം ഈ ദേവിയെ പുരാണങ്ങളിൽ പറയുന്നുണ്ട്. മഹാവിഷ്ണുവിൻ്റെ പുത്രിയായ അമൃതവല്ലി സുബ്രഹ്മണ്യനെ പതിയായി ലഭിക്കാൻ തപസ്സിരുന്നു എന്നും അതിൽ പ്രീതനായ സ്കന്ദൻ ദേവേന്ദ്ര പുത്രി ദേവസേനയായി ജനിച്ച് അമൃതവല്ലി ആഗ്രഹസാഫല്യം നേടുമെന്നും അനുഗ്രഹിച്ചു. പിന്നീട് ദേവാസുരയുദ്ധത്തിൽ വിജയിയായ സ്കന്ദ ഭഗവാന് ഇന്ദ്രൻ ദേവസേനയെ വിവാഹം കഴിച്ചു നൽകി എന്നാണ് തെക്കേയിന്ത്യയിൽ പ്രസിദ്ധമായ ഐതിഹ്യം.

🟠 ആദിപരാശക്തിയുടെ ഷഷ്ഠാശം

എല്ലാ സുബ്രഹ്മണ്യ ക്ഷേത്രങ്ങളിലും ഭഗവാൻ്റെ ഇടതുവശത്ത് ഷഷ്ഠിദേവിയുടെ അദൃശ്യ സാന്നിധ്യം ഉണ്ടാകുമെന്നാണ് വിശ്വാസം. ഷഷ്ഠി ദേവിക്ക് പ്രത്യേകം പ്രതിഷ്ഠയുള്ള ക്ഷേത്രം ഇല്ലെന്നതാണ് അറിവ്. ആദിപരാശക്തിയുടെ, മൂലപ്രകൃതിയുടെ ആറിലൊന്നു ഭാഗം കൊണ്ടുണ്ടായ ദേവിയാണ് ഷഷ്ഠിദേവി. ആറിലൊന്നു ഭാഗം കൊണ്ട് ഉണ്ടായതിനാലാണ് ഷഷ്ഠിദേവി എന്ന പേര് ലഭിച്ചത്.
“ഞാൻ ബ്രഹ്മാവിൻ്റെ മാനസപുത്രിയും സ്കന്ദ ദേവൻ്റെ ധർമ്മപത്നിയുമാണ്. പുത്രനില്ലാത്തവർക്ക് സന്തതിയെയും ഭാര്യയില്ലാത്തവർക്ക് ഭാര്യയെയും, ഭർത്താവില്ലാത്തവർക്ക് ഭർത്താവിനെയും, ധനമില്ലാത്തവർക്ക് ധനത്തെയും, എല്ലാവർക്കും നല്ല കർമ്മഫലത്തെയും നൽകുന്നത് ഞാനാണ് ” എന്ന് ഷഷ്ഠിദേവി പറയുന്നുണ്ട്.

🟠 ഇല്ലായ്മകൾ അകറ്റുന്ന ദേവി

സർവാഭീഷ്ടദായിനിയായ ഷഷ്ഠി ദേവിയെ ഭജിച്ചാൽ സന്താനഭാഗ്യവും അവർക്ക് ശ്രേയസ്സും ഉറപ്പാണ്. ഷഷ്ഠിവ്രതമെടുക്കുന്നവർ ഷഷ്ഠി ദിവസം രാവിലെ കുളിച്ച് ശുഭവസ്ത്രം ധരിച്ച് സുബ്രഹ്മണ്യസ്വാമിയുടെ ചിത്രത്തിന് മുന്നിൽ നിലവിളക്ക് കത്തിച്ച് വച്ച് “ഓം ഹ്രീം ഷഷ്ഠി ദേവ്യൈ നമഃ” എന്ന മന്ത്രം എട്ടു പ്രാവശ്യം ജപിച്ച ശേഷം ഷഷ്ഠി ദേവി സ്തോത്രം കുറഞ്ഞത് 3 തവണ ജപിക്കണം. ജപം പൂർത്തിയാക്കിയ ശേഷം കർപ്പൂര ദീപം ഉഴിഞ്ഞ് നമസ്കരിച്ച് തനിക്കും സന്തതികൾക്കും കുടുംബത്തിനും സർവ്വൈശ്യര്യവും ഉണ്ടാകാൻ അകമഴിഞ്ഞ് ആത്മാർത്ഥമായി പ്രാർത്ഥിക്കണം.

🟠 ഷഷ്ഠിദേവി സ്തോത്രം

പ്രസിദ്ധ ഗായകൻ മണക്കാട് ഗോപൻ ആലപിച്ച
ഷഷ്ഠിദേവി സ്തോത്രം കേൾക്കാം :

ജോതിഷി പ്രഭാസീന സി പി,
+91 9961 442256, 989511 2028
(ഹരിശ്രീ, മമ്പറം പി ഒ, പിണറായി, കണ്ണൂർ
Email ID prabhaseenacp@gmail.com)

Story Summary : Significance of Shasti Devi Stotram and benefits of chanting