വാരാഹി പഞ്ചമി, മണ്ണാറശാല ആയില്യം, കാല ഭൈരവ ജയന്തി, ഏകാദശി ; ഈ ആഴ്ചയിലെ നക്ഷത്രഫലം

ജ്യോതിഷരത്നം വേണു മഹാദേവ്

വാരം ആരംഭം: 2025 നവംബർ 8, ഞായർ,
മിഥുനക്കൂറ്, തിരുവാതിര നക്ഷത്രം രണ്ടാം പാദം
വിശേഷ ദിവസങ്ങൾ:
നവംബർ 9: വാരാഹി പഞ്ചമി,
നവംബർ 12: മണ്ണാറശാല ആയില്യം,
കാലഭൈരവ ജയന്തി
നവംബർ 15: ഏകാദശി
വാരം അവസാനം: 2025 നവംബർ 15, ശനി,
കന്നിക്കൂറ്, അത്തം നക്ഷത്രം ഒന്നാം പാദം

ഈ ആഴ്ചയിലെ നക്ഷത്രഫലം:

മേടക്കൂറ്
( അശ്വതി, ഭരണി, കാർത്തിക 1 )
ഊർജ്ജസ്വലതയും ഉത്സാഹവും കർമ്മകുശലതയും കുടുംബജീവിതത്തിൽ അനേകം നല്ല ഫലങ്ങൾ സമ്മാനിക്കും. ഗാർഹികമായ സമ്മർദ്ദങ്ങളിൽ നിന്ന് മുക്തി നേടും. എന്നാൽ ജോലിസ്ഥലത്ത് നിങ്ങളുടെ പ്രവർത്തന ശൈലിയിൽ ചില സഹപ്രവർത്തകർ അസംതൃപ്തരാണെന്ന് തിരിച്ചറിയും. ചില പദ്ധതികൾ പ്രതീക്ഷയനുസരിച്ച് വരാത്തതിനാൽ പുനർവിചിന്തനം നടത്തും. മറ്റുള്ളവരുടെ വിജയങ്ങൾ അംഗീകരിക്കും. മനോവീര്യം വർദ്ധിക്കും. ഭൂമി, വീട് ഇവയിൽ നിക്ഷേപം ഒഴിവാക്കുക. ഓം നമോ നാരായണായ ജപിക്കണം.

ഇടവക്കൂറ്
( കാർത്തിക 2 , 3 , 4 , രോഹിണി, മകയിരം 1, 2 )
സർഗ്ഗാത്മക കഴിവുകൾ ശരിയായി ഉപയോഗിക്കും. സാമ്പത്തിക സ്ഥിതി മെച്ചപ്പെടും. നേത്രസംരക്ഷണം അനിവാര്യമാകും. കൃത്യമായ പരിചരണം ശുഭ ഫലം നൽകും. നിരവധി തീരുമാനങ്ങൾ എടുക്കേണ്ടി വരും. സ്വന്തം ആവശ്യങ്ങൾ മാറ്റി വച്ച് കുടുംബാംഗങ്ങളുടെ ആവശ്യങ്ങളിൽ കൂടുതൽ ശ്രദ്ധ കേന്ദ്രീകരിക്കും. ഒരു പങ്കാളിയെ ബിസിനസ്സിൽ ചേർക്കുന്നതിനെക്കുറിച്ച് ആലോചിക്കും. ലളിതാ സഹസ്രനാമം ജപിക്കുക.

മിഥുനക്കൂറ്
(മകയിരം 3, 4, തിരുവാതിര, പുണർതം 1, 2, 3 )
സാമ്പത്തിക നേട്ടങ്ങൾ ഉണ്ടാകും. ബിസിനസ്സിൽ വളരെയധികം വിജയം നേടി മുന്നേറാൻ കഴിയും.
ഒരു കുടുംബാംഗത്തിന്റെ ആരോഗ്യനില വഷളാകും. ചെറിയ കാര്യത്തിലെ അഭിപ്രായവ്യത്യാസം കുടുംബ സമാധാനത്തെ ബാധിക്കും. ചങ്ങാതിമാരുടെ നല്ല പിന്തുണ കിട്ടും. ഉന്നത വ്യക്തിയുമായി കൂടിക്കാഴ്ച സാദ്ധ്യമാകും. ദേഷ്യം നിയന്ത്രിക്കണം. മാനസിക സമ്മർദ്ദത്തിൽ നിന്ന് മുക്തി നേടാൻ യോഗ ഗുണം ചെയ്യും. ഓം നമഃ ശിവായ എന്നും 108 ഉരു ജപിക്കുക.

കർക്കടകക്കൂറ്
( പുണർതം 4, പൂയം, ആയില്യം )
കുടുംബത്തിൽ സമാധാനം ഉണ്ടാകും. ജോലിഭാരം ക്ഷീണിപ്പിക്കും, അതുമൂലം മാനസിക പ്രശ്‌നങ്ങൾ അനുഭവപ്പെടും. സുപ്രധാന തീരുമാനം എടുക്കും മുമ്പ്, കുടുംബത്തിന്റെ അഭിപ്രായം തേടണം. പങ്കാളിയോട് മനസ്സ് തുറന്ന് സംസാരിക്കും. ഓഫീസിലെ കാര്യങ്ങളെക്കുറിച്ച് സംസാരിക്കുന്നത് ഒഴിവാക്കും. ജോലിസ്ഥലത്തെ ഗ്രൂപ്പ് കളികളിൽ നിന്നും ഒഴിഞ്ഞു മാറാൻ സാധിക്കില്ല. അത് മോശം പ്രതിച്ഛായയെ സൃഷ്ടിക്കും. ദിവസവും 108 തവണ ഓം ദും ദുർഗ്ഗായൈ നമഃ ജപിക്കണം.

ചിങ്ങക്കൂറ്
(മകം, പൂരം, ഉത്രം 1 )
ഈശ്വരാധീനം, ഭാഗ്യം ഗുണം ചെയ്യും. അനാവശ്യമായ തിടുക്കം ഒരു കാര്യത്തിലും കാണിക്കരുത്. പണം സൂക്ഷിച്ച് കൈകാര്യം ചെയ്യാൻ മറക്കരുത്. ഇപ്പോൾ ഏതെങ്കിലും നിക്ഷേപത്തിന് പറ്റിയ സമയമല്ല. ഒരു സ്വാർത്ഥവ്യക്തിയുടെ സമ്മർദ്ദം അനുഭവപ്പെടാൻ സാദ്ധ്യതയുണ്ട്. കുടുംബ ജീവിതത്തിലെ പ്രശ്നങ്ങൾ പരിഹരിക്കും. ഇതുമൂലം കുടുംബത്തിൽ സന്തോഷം നിറഞ്ഞ അന്തരീക്ഷം സംജാതമാകും. പിതാവിൻ്റെ ആരോഗ്യം മെച്ചപ്പെടും. ആദിത്യ ഹൃദയം ദിവസവും ജപിക്കുക.

കന്നിക്കൂറ്
( ഉത്രം 2, 3, 4, അത്തം, ചിത്തിര 1 , 2 )
മികച്ച നിക്ഷേപങ്ങൾ സാമ്പത്തിക സുരക്ഷിതത്വവും ധനപരമായ അഭിവൃദ്ധിയും നൽകും. തിടുക്കത്തിൽ ഒരു തീരുമാനവും എടുക്കരുത്. ആരോഗ്യം മെച്ചപ്പെടും. മറ്റുള്ളവരെ സ്വാധീനിക്കാനുള്ള കഴിവ് ഗൃഹത്തിൽ സമാധാനം നിലനിർത്താൻ സഹായിക്കും. മനസ്സിൽ നിരവധി സംശയങ്ങൾ ഉണ്ടാകും. ജോലിസ്ഥലത്ത് ഇത് സങ്കീർണ്ണമായ പ്രശ്നങ്ങൾക്ക് കാരണമാകും. ജീവിത പങ്കാളി എല്ലാ കാര്യങ്ങൾക്കും കൂടെ നിൽക്കും. എന്നും ഓം ഐ ക്ലീം സൗ: ഹ്രീം ഭദ്രകാള്യൈ നമഃ ജപിക്കുക.

തുലാക്കൂറ്
( ചിത്തിര 3, 4, ചോതി, വിശാഖം 1 , 2 , 3 )
കുടുംബത്തിൽ ബഹുമാനവും ആദരവും വർദ്ധിക്കും. വിദേശത്തേക്ക് പോകാൻ അവസരം ലഭിക്കും. ചില പ്രധാന ജോലികൾ ചെയ്തു തീർക്കേണ്ടി വരും. ആരോഗ്യവും വ്യക്തിത്വവും മെച്ചപ്പെടുത്തുന്നതിന് പരമാവധി ശ്രമിക്കണം. ധാരാളം പണം ചെലവഴിക്കും. മെച്ചപ്പെട്ട ജീവിതം നയിക്കുന്നതിനുള്ള സാഹചര്യം ഒത്തുവരും. സഹായ മന:സ്ഥിതി ശക്തമാകും. ഒരു
വിദൂര യാത്ര ഗുണം ചെയ്യും. വിദ്യാർത്ഥികൾക്ക് മികച്ച വിജയം ലഭിക്കും. ഓം ഗം ഗണപതയേ നമഃ ദിവസവും ജപിക്കുക.

വൃശ്ചികക്കൂറ്
( വിശാഖം 4 , അനിഴം, തൃക്കേട്ട )
സുപ്രധാനമായ ഒരു കാര്യവുമായി ബന്ധപ്പെട്ട് അടുത്ത വ്യക്തികൾ പണം ആവശ്യപ്പെടാൻ സാധ്യതയുണ്ട്; ഒഴിഞ്ഞു മാറാൻ കഴിയില്ല. ജീവിതം ഊർജ്ജസ്വലവും സന്തോഷം നിറഞ്ഞതുമായിരിക്കും. വിട്ടുമാറാത്ത രോഗങ്ങളിൽ നിന്ന് മുക്തി നേടാനുള്ള സാധ്യതയും ഈ വർഷം ഉണ്ടാകും. കുടുംബാംഗങ്ങളുമായി കലഹം ഉണ്ടാകുന്ന സാഹചര്യം ഒഴിവാക്കണം. കൃത്യ സമയത്ത് ജോലി തീർക്കാത്തത് അതൃപ്തി ഉണ്ടാകും. പ്രശസ്തി കൂടും. ഓം ക്ലീം കൃഷ്ണായ നമഃ എന്നും ജപിക്കണം.

ധനുക്കൂറ്
(മൂലം, പൂരാടം, ഉത്രാടം 1)
കുടുംബാന്തരീക്ഷം സന്തോഷപ്രദമാകും. മാനസിക സമ്മർദ്ദങ്ങൾ മാറും. ജോലിയുമായി ബന്ധപ്പെട്ട് യാത്ര വേണ്ടി വരും. വിദേശത്ത് പോകാനുള്ള തടസ്സം മാറും. അടുത്തിടെ വിവാഹിതരായവർക്ക് സന്താനഭാഗ്യം കാണുന്നു . ആരോഗ്യ സംബന്ധമായി സമയം വളരെ നല്ലതായിരിക്കും. കുടുംബാംഗങ്ങളുടെ കാര്യങ്ങൾ നന്നായി ശ്രദ്ധിക്കും. പങ്കാളിത്ത ബിസിനസ് രംഗത്ത്
സൂക്ഷിക്കുക; സാമ്പത്തിക നഷ്ടത്തിന് സാധ്യതയുണ്ട്. വിദ്യാർത്ഥികൾക്ക് നല്ല വാർത്ത ലഭിക്കും.
ഓം ശരവണ ഭവഃ നിത്യവും 108 തവണ ജപിക്കണം.

മകരക്കൂറ്
( ഉത്രാടം 2, 3, 4, തിരുവോണം, അവിട്ടം 1, 2 )
കുടുംബപരമായ ഉത്തരവാദിത്ത്വങ്ങൾ ഏറ്റെടുക്കും. ഔദ്യോഗിക കാര്യങ്ങളുമായി ബന്ധപ്പെട്ട് സമയം വളരെയധികം അനുകൂലമായിരിക്കും. പൂർണ്ണമായും ഭാഗ്യം പിന്തുണയ്ക്കും. ഏറ്റെടുക്കുന്ന ഏത് ജോലിയും തടസ്സങ്ങൾ വരാതെ പൂർത്തിയാക്കാൻ കഴിയും. മികച്ച അവസരങ്ങൾ കയ്യിൽ നിന്ന് വഴുതി മാറാൻ അനുവദിക്കരുത്. സമൂഹത്തിൽ ബഹുമാനം ഉയരും . പൊതുരംഗത്ത് പ്രവർത്തിക്കുന്നവർക്ക് അംഗീകാരം ലഭിക്കും. ഓം ഹം ഹനുമതേ നമഃ 108 ഉരു ജപിക്കുക

കുംഭക്കൂറ്
(അവിട്ടം 3, 4, ചതയം, പൂരുട്ടാതി 1, 2, 3 )
ആരോഗ്യകാര്യങ്ങളിലെ ശ്രദ്ധയും ജാഗ്രതയും പല പ്രശ്‌നങ്ങളും ഇല്ലാതാക്കാക്കും. സാമ്പത്തിക സ്ഥിതി ശക്തിപ്പെടും. ബുദ്ധിപൂർവം പരിചയസമ്പന്നരായ ആളുകളുടെ ഉപദേശപ്രകാരം നിക്ഷേപം നടത്താൻ ശ്രദ്ധിക്കും. ജോലിയിൽ തിളങ്ങും. മാതാപിതാക്കൾക്ക് അഭിമാനം വർദ്ധിക്കും. കച്ചവടത്തിൽ ലാഭം നേടാൻ കഴിയും. സഹപ്രവർത്തകരുടെ ശരിയായ പിന്തുണ നേടും. കഠിനാധ്വാനം ചെയ്യും. വിദ്യാർത്ഥികൾക്ക് നല്ല വിജയം ലഭിക്കും. ഓം ഘ്രൂം നമഃ പരായ ഗോപ്ത്രേ നിത്യവും ജപിക്കണം.

മീനക്കൂറ്
( പൂരുരുട്ടാതി 4, ഉത്തൃട്ടാതി , രേവതി )
സാമൂഹ്യ – സാംസ്കാരിക രംഗത്ത് ശ്രദ്ധേയരാകും. ഭൂമി, റിയൽ എസ്റ്റേറ്റ് പദ്ധതികളിൽ നിക്ഷേപം നടത്തും. അവസരങ്ങൾ പരമാവധി പ്രയോജനപ്പെടുത്തും. കുടുംബാംഗങ്ങൾക്കിടയിൽ സാഹോദര്യം വർദ്ധിക്കും. സർക്കാർ ഉദ്യോഗസ്ഥർക്ക് സ്ഥാനക്കയറ്റം അല്ലെങ്കിൽ ശമ്പള വർദ്ധനവ്, ആഗ്രഹിച്ച സ്ഥാനമാറ്റം ലഭിക്കാം. പ്രതികൂല സാഹചര്യങ്ങൾ സമർത്ഥമായി മറികടക്കും.
സ്വഭാവത്തിൽ നല്ല മാറ്റങ്ങൾ വരുത്താൻ സാധിക്കും. എല്ലാവരെയും ഉൾക്കൊണ്ട് മുന്നോട്ട് പോകാനാകും. ദിവസവും 108 തവണ “ഓം നമഃ ശിവായ ജപിക്കുക.

ജ്യോതിഷരത്നം വേണു മഹാദേവ്
മൊബൈൽ: + 91 9847575559

Summary: Weekly Star predictions based on moon sign
by Venu Mahadev