തന്ത്രരത്നം പുതുമന മഹേശ്വരൻ നമ്പൂതിരി
ഭദ്രകാളി പ്രീതി നേടാൻ ഏറ്റവും നല്ല ദിവസമാണ് മാസം തോറുമുള്ള കറുത്തവാവ് അഥവാ അമാവാസി. 2025 നവംബർ 20 വ്യാഴാഴ്ചയാണ് വൃശ്ചികത്തിലെ
അമാവാസി. ഈ ദിവസം വ്രതം നോറ്റ് ഭദ്രകാളി ക്ഷേത്ര ദർശനം, യഥാശക്തി വഴിപാടുകൾ എന്നിവ നടത്തി പ്രാർത്ഥിച്ചാൽ അതിവേഗം അഭീഷ്ട സിദ്ധി ലഭിക്കും. അത്ഭുതശക്തിയുള്ള കാളീ മന്ത്രങ്ങൾ, ഭദ്രകാളി അഷ്ടോത്തരം എന്നിവ ജപിച്ചു തുടങ്ങാനും ഈ ദിവസം ഉത്തമമാണ്. അമാവാസിക്ക് പുറമെ ചൊവ്വ, വെള്ളി ദിവസം, ഭരണി നക്ഷത്രം എന്നിവയും ഭദ്രകാളീപ്രീതി നേടാൻ നല്ലതാണ്.
⚫ അമാവാസി വ്രതം ദുരിതമോചനമേകും
പിതൃപ്രീതിക്കും ഗുണകരമാണ് അമാവാസി വ്രതം. എല്ലാ മാസവും അമാവാസി വ്രതമെടുക്കാം. പിതൃക്കള്ക്ക് വേണ്ടി ബലിയൂട്ടുകയും, അന്നദാനം, പുരാണപാരായണം, തിലഹോമം, പ്രാര്ത്ഥന എന്നിവ നടത്തുകയും വേണം. തീര്ത്ഥഘട്ടങ്ങളില് ദര്ശനം നടത്തി ദാനധര്മ്മങ്ങള് ചെയ്യുന്നതും വിശേഷമാണ്. ഉച്ചയ്ക്കുമാത്രം ഊണ് കഴിക്കാം. രാവിലെയും, വൈകിട്ടും മിതാഹാരം ഉത്തമം.ബലിതര്പ്പണത്തിനും ഏറെ വിശേഷമാണ് ദിവസം. ദുര്മൃതിയടഞ്ഞവരുടെ മോക്ഷത്തിന് ഈ വ്രതധാരണം ഏറെ വിശേഷമാണ്. 18 അമാവാസി നാളില് വ്രതം സ്വീകരിക്കുന്നവരുടെ പൂര്വ്വിക തലമുറ മുഴുവനും ദുരിതമോചിതരാകും എന്നാണ് വിശ്വാസം. അതിലൂടെ മുൻജന്മപാപങ്ങൾ അകറ്റി നമുക്ക് സന്തോഷവും സമാധാനവും അഭീഷ്ട സിദ്ധിയും നേടാൻ സാധിക്കും.
⚫ ശ്രദ്ധയോടെ ജപിച്ചാൽ ഉടൻ ഫലം
ഏതൊരു വ്രതത്തിലും ഏറ്റവും പ്രധാനം മന:ശുദ്ധി തന്നെയാണ്. ഭക്തിയോടെ, മന:ശുദ്ധിയോടെ, ഏകാഗ്രതയോടെ വ്രതമെടുത്താൽ ഏതൊരു കാര്യത്തിലും അത്ഭുതകരമായ ഫലസിദ്ധിയുണ്ടാകും.
മനസിനെയും വിചാരവികാരങ്ങളെയും അടക്കി
ഈശ്വരചൈതന്യത്തില് പ്രാര്ത്ഥനകള് കൊണ്ട് കുറച്ചു നേരമെങ്കിലും ചേര്ന്നു നില്ക്കുമ്പോള് നമുക്ക് ലഭിക്കുന്ന ശുഭോർജ്ജം തന്നെയാണ് പുണ്യം. പ്രാര്ത്ഥനയും ജപവും വെറുതെ നടത്തിയിട്ട് യാതൊരു കാര്യവുമില്ല. ശ്രദ്ധയില്ലാതെ ചെയ്യുന്ന ആയിരം മന്ത്രജപത്തേക്കാൾ ശ്രദ്ധയോടെ ചെയ്യുന്ന എട്ടു തവണത്തെ മന്ത്രജപത്തിന് അസാമാന്യ ശക്തിയും ഫലദാന ശേഷിയുമുണ്ട്.
ALSO READ
⚫ ഗുരുപദേശം നേടിയാൽ തെറ്റ് വരില്ല
മന്ത്രങ്ങള് ഗുരുമുഖത്ത് നിന്നും സ്വീകരിക്കുന്നതാണ് നല്ലത്. കാരണം ഉച്ചാരണത്തിൽ തെറ്റു വരില്ല. വ്രതം എടുക്കുന്നവർ മന്ത്രങ്ങളും സ്തോത്രങ്ങളും തെറ്റ് ഇല്ലാതെ ജപിക്കുവാൻ കർശനമായും ശ്രദ്ധിക്കണം. വ്രതമെടുക്കുന്നവർ ഒരു ചടങ്ങിന് വേണ്ടി ഉപവസിച്ചത് കൊണ്ടും മത്സ്യമാംസാദികൾ വെടിഞ്ഞതു കൊണ്ടും മാത്രം കാര്യവുമില്ല. നല്ല ചിന്തയും, കഴിയുന്നത്ര പ്രാര്ത്ഥനയും കര്ശനമായി പാലിക്കണം. ശാരീരിക ബന്ധവും ലൈംഗിക വിഷയ ചിന്തയും അത്തരത്തിലെ സംസാരങ്ങളുമെല്ലാം ഒഴിവാക്കണം.
⚫ മഹാകാളി മന്ത്രം ജപിച്ചു തുടങ്ങാം
അമാവാസിക്ക് ജപിച്ചു തുടങ്ങിയാൽ അതിവേഗം ഫലം ലഭിക്കുന്ന ഉഗ്രശക്തിയുള്ള മഹാകാളി മന്ത്രം പരിചയപ്പെടുത്താം. ഈ മന്ത്രം അമാവാസി തുടങ്ങി എല്ലാ ദിവസവും രാവിലെയും വൈകിട്ടും 48 തവണ വീതം ജപിക്കണം. ജപം തുടങ്ങുമ്പോഴും ജപാന്ത്യത്തിലും മഹാകാളി ധ്യാനശ്ലോകം മൂന്ന് പ്രാവശ്യം ചൊല്ലണം. ഇത് മുടങ്ങാതെ 28 ദിവസം ചെയ്യണം. അശുദ്ധി ഉണ്ടായാൽ അത് മാറിക്കഴിഞ്ഞ് 28 ദിവസം പൂർത്തിയാക്കിയാൽ മതി. ഇതിന് യാതൊരു വ്രതവും വേണ്ട. മത്സ്യമാംസാദി ഭക്ഷണം കഴിക്കുന്നതിൽ തെറ്റില്ല. ബ്രഹ്മചര്യവും വേണ്ട. എന്നാൽ മന്ത്രോപദേശം നിർബന്ധമാണ്. വടക്ക് അഭിമുഖമായിരുന്ന് ജപിക്കണം. വെളുത്ത വസ്ത്രമാണ് ജപസമയത്ത് ധരിക്കേണ്ടത്. പൂജാമുറിയിൽ ദിക്ക് പ്രധാനമല്ല. ശവത്തിന്റെ മുകളിൽ ഇരിക്കുന്ന കാളിയെ പൂജിക്കുന്നവർക്ക് സകല ഐശ്വര്യവും സിദ്ധിക്കും. സുമുഖീ കാളീ ധ്യാനം, സുമുഖീ കാളീ മന്ത്രം എന്നും ഇത് അറിയപ്പെടുന്നു.
⚫ മഹാകാളി ധ്യാനം
ധ്യായേദ് കാളീം മഹാകായാം
ത്രിനേത്രാം ബഹുരൂപിണീം നരമുണ്ഡം തഥാ
ഖഡ്ഗം കമലം ച വരം തഥാ ചതുർഭുജാം
ചലജ്ജിഹ്വാം പൂർണ്ണചന്ദ്രനിഭാനനാം
നീലോല്പലദളശ്യാമാം ശത്രുസംഘവിദാരിണീം
നിർഭയാം രക്തവദനാം ദ്രംഷ്ട്രാളീഘോര രൂപിണീം
സാട്ടഹാസനിരസ്താരീം സർവ്വദാം ചദിഗംബരീം
ശവാസനസ്ഥിതാം ദേവീം മുണ്ഡമാലാവിഭൂഷിതാം
ഘോര രൂപാം ഭീഷണാസ്യാം മഹാകാളീം സദാസ്മരേദ്
(അസുരശിരസ് കോർത്ത് മാലയണിഞ്ഞ് ശവത്തിന്റെ മുകളിൽ ഇരിക്കുന്ന ഭയാനക ചിത്രമാണ് മഹാകാളിയുടേത്. മുകളിൽ പറഞ്ഞിരിക്കുന്ന ധ്യാനശ്ലോകം മൂന്ന് പ്രാവശ്യം ജപിച്ച് മനസിൽ ദേവിഭാവം ഉറപ്പിക്കണം. അതിന് ശേഷം മഹാകാളിമന്ത്രം ജപിക്കാം)
⚫ മഹാകാളിമന്ത്രം
ഓം ഉച്ഛിഷ്ട ചണ്ഡാലിനീ
സുമുഖീ ദേവീ മഹാകാളീ
കാലഭൈരവപ്രിയംകരീം
മഹാകാളീ പിശാചിനി
വേദാന്തർഗതേ നിത്യേ
സർവ്വപാപശമനം ദേഹി
ദദാപയ ഹ്രീം ക്രീം നമ: സ്വാഹാ
⚫ ഭദ്രകാളി അഷ്ടോത്തരം
തന്ത്രരത്നം പുതുമന മഹേശ്വരൻ നമ്പൂതിരി
+91 944702 0655
Story Summary : Amavasya Vritham and Benefits of Powerful Bhadrakali Mantra Japam
ആത്മീയ വിശേഷങ്ങളും ജ്യോതിഷ പ്രവചനങ്ങളും സംബന്ധിച്ച വാര്ത്തകള് അപ്പപ്പോള് ലഭിക്കാന്, അസ്ട്രോ ജി, നേരം ഓൺലൈൻ ആപ് ഡൗണ്ലോഡ് ചെയ്യുക : AstroG App
Copyright 2025 neramonline.com/neram/Neram/. All rights reserved
