ചന്ദ്രഗ്രഹണം മാർച്ച് 03, ചൊവ്വാഴ്ച്ച; ക്ഷേത്രങ്ങൾ 4 മണിക്കൂർ അടച്ചിടും, അറിയേണ്ട കാര്യങ്ങൾ വിശദമായി

അടുത്ത ചൊവ്വാഴ്ച സംഭവിക്കുന്ന സൂര്യഗ്രഹണം കേരളത്തിൽ ആചരണീയമാണോ ? മാർച്ച് 3 ന്
നടക്കുന്ന ചന്ദ്രഗ്രഹണത്തിന് എന്തെല്ലാം കാര്യങ്ങൾ ശ്രദ്ധിക്കണം – ധാരാളം ഭക്തജനങ്ങളുടെ ചോദ്യമാണിത്.

സൂര്യഗ്രഹണം ആചരിക്കേണ്ട
2026 ഫെബ്രുവരി 17 ചൊവ്വാഴ്ച സംഭവിക്കുന്ന സൂര്യഗ്രഹണം കേരളത്തിൽ മാത്രമല്ല ഇന്ത്യയിൽ
തന്നെ ആചരണീയമല്ല. കാരണം ഇന്ത്യയിൽ ഒരിടത്തും ഇത് ദൃശ്യമാകില്ല. ഹൈന്ദവവിശ്വാസ പ്രകാരം ഒരു ഗ്രഹണം നഗ്നനേത്രങ്ങളാൽ കാണാൻ കഴിയുന്ന സ്ഥലങ്ങളിൽ മാത്രമേ സൂതക കാലം അഥവാ ഗ്രഹണ നിയന്ത്രണം ബാധകമാകൂ. അതിനാൽ സൂര്യഗ്രഹണ കാലത്ത് ഇവിടെ ക്ഷേത്രങ്ങൾ അടച്ചിടില്ല. പൂജകൾക്കും ആഹാരത്തിനും നിയന്ത്രണം ഉണ്ടാകില്ല. അൻ്റാർട്ടിക്ക, ദക്ഷിണാഫ്രിക്കയുടെ ചില ഭാഗങ്ങൾ, തെക്കേ അമേരിക്ക എന്നിവിടങ്ങളിൽ മാത്രമാണ് ഈ സൂര്യ ഗ്രഹണം ദൃശ്യമാകുക,

ചന്ദ്രഗ്രഹണം ആചരണീയം
2023 മാർച്ച് 3 ചൊവ്വാഴ്ച നടക്കുന്ന സമ്പൂർണ്ണ ചന്ദ്രഗ്രഹണം ഇന്ത്യയിൽ ഭൂരിഭാഗം പ്രദേശങ്ങളിലും കേരളത്തിലും ദൃശ്യവും ആചരണീയവുമാണ്. ഈ ഗ്രഹണ സമയത്ത് ചന്ദ്രൻ ചുവപ്പ് കലർന്ന ഓറഞ്ച് നിറത്തിൽ കാണപ്പെടും. അതിനാൽ ഇതിനെ ബ്ലഡ് മൂൺ എന്ന് വിളിക്കുന്നു.

ഊർജ്ജമാറ്റങ്ങൾ സംഭവിക്കും
ജ്യോതിഷ ശാസ്ത്രമനുസരിച്ചും തന്ത്രശാസ്ത്ര പ്രകാരവും ഗ്രഹണസമയം എന്നത് പ്രപഞ്ചത്തിൽ വലിയ ഊർജ്ജമാറ്റങ്ങൾ സംഭവിക്കുന്ന കാലയളവാണ്. അതിനാൽ ക്ഷേത്രങ്ങളിൽ ഈ സമയത്ത് പ്രത്യേക നിഷ്കർഷകൾ പാലിക്കാറുണ്ട്.

1. ക്ഷേത്രം എപ്പോൾ അടക്കണം?
   മാർച്ച് 03, 2026ലെ ചന്ദ്രഗ്രഹണം ഇവിടെ ആചാരണീയമാതിനാൽ ക്ഷേത്രനടകൾ വൈകിട്ട് 3.19 മുതൽ വൈകിട്ട് 7 വരെ അടച്ചിടാനാണ് മിക്ക തന്ത്രികളും തീരുമാനിച്ചിട്ടുള്ളത്. അതാണ് ഉത്തമവും. ആറ്റുകാൽ പൊങ്കാലയും ഈ ദിവസമാണ്. അവിടെ വൈകിട്ട് 3.10 മുതൽ സന്ധ്യക്ക് 7.00 വരെ ക്ഷേത്രനട അടച്ചിടും.
   ഗ്രഹണം തുടങ്ങുന്നതിന് കൃത്യം 12 മണിക്കൂർ മുമ്പ് (സൂര്യഗ്രഹണമെങ്കിൽ) അല്ലെങ്കിൽ 9 മണിക്കൂർ മുമ്പ് (ചന്ദ്രഗ്രഹണമെങ്കിൽ) ആഹാരപാനീയങ്ങൾ വർജ്ജിക്കണം എന്നാണ് നിയമം (വേധകാലം). എന്നാൽ ക്ഷേത്രനട അടക്കുന്നത് സാധാരണയായി ഗ്രഹണം ആരംഭിക്കുന്നതിന് 3 മുതൽ 4 മണിക്കൂർ മുമ്പാണ്. ഗ്രഹണത്തിന്റെ അശുദ്ധി (സൂതകം) വിഗ്രഹത്തിൽ ഏൽക്കാതിരിക്കാനാണ് ഇങ്ങനെ ചെയ്യുന്നത്.
2. എപ്പോഴാണ് അടച്ചിടേണ്ടത്?
   ഗ്രഹണം ആരംഭിക്കുന്ന സമയം മുതൽ അത് പൂർണ്ണമായി അവസാനിക്കുന്നത് (മോക്ഷകാലം) വരെയാണ് ക്ഷേത്രനട അടച്ചിടേണ്ടത്. കേവലം ഗ്രഹണത്തിന്റെ പരിപൂർണ്ണതയിൽ (പീക് ടൈം ) മാത്രമല്ല, മറിച്ച് ഗ്രഹണത്തിന്റെ സ്പർശകാലം മുതൽ മോക്ഷകാലം വരെ നട അടച്ചിരിക്കണം.
3. ശുദ്ധികലശവും നട തുറക്കലും
   ഗ്രഹണം പൂർണ്ണമായി അവസാനിച്ചാലുടൻ ക്ഷേത്രം തുറക്കാൻ പാടില്ല. ഗ്രഹണം കഴിഞ്ഞ് ബിംബത്തിലും ക്ഷേത്രത്തിനകത്തും ശുദ്ധി വരുത്തേണ്ടതുണ്ട്.

പുണ്യാഹം: ഗ്രഹണം കഴിഞ്ഞ് നട തുറന്ന് ബിംബത്തിൽ ശുദ്ധികലശം (പുണ്യാഹം) നടത്തിയതിന് ശേഷം മാത്രമേ സാധാരണ പൂജകൾ ആരംഭിക്കാവൂ. അതുകൊണ്ട് ഗ്രഹണം കഴിഞ്ഞ് ഏകദേശം 1 മുതൽ 2 മണിക്കൂർ വരെ ശുദ്ധീകരണ ചടങ്ങുകൾക്കായി എടുത്ത ശേഷമേ ഭക്തർക്ക് ദർശനം അനുവദിക്കാറുള്ളൂ.

4. പ്രമാണങ്ങൾ:
   ഗ്രഹണ സമയത്തെ ആചാരങ്ങളെക്കുറിച്ച് പ്രധാനമായും പരാമർശിക്കുന്ന ഗ്രന്ഥങ്ങൾ ഇവയാണ്:

തന്ത്രസമുച്ചയം: കേരളീയ ക്ഷേത്ര ആചാരങ്ങളുടെ അടിസ്ഥാന ഗ്രന്ഥമാണിത്. ഗ്രഹണ സമയത്തെ അശുദ്ധിയും പരിഹാരക്രിയകളും ഇതിൽ പ്രതിപാദിക്കുന്നു.

ജ്യോതിർനിബന്ധം: ഗ്രഹണ സമയത്തെ ഭക്ഷണക്രമം, സ്നാനം, ദാനം എന്നിവയെക്കുറിച്ച് ഇതിൽ വിശദമാക്കുന്നു. ദേവിഭാഗവതം, വരാഹപുരാണം: ഗ്രഹണ സമയത്ത് ജപം നടത്തുന്നതിന്റെ പുണ്യത്തെക്കുറിച്ച് ഇവയിൽ സൂചിപ്പിക്കുന്നു. ക്ഷേത്ര സംബന്ധിയായ കാര്യങ്ങളിൽ ഏറ്റവും പ്രധാനപ്പെട്ടത് ‘തന്ത്രസമുച്ചയം’ ആണെങ്കിലും, ഗ്രഹണ സമയത്തെ പൊതുവായ ആചാരങ്ങളെക്കുറിച്ച് സ്മൃതികളിലും പരാമർശമുണ്ട്.

തന്ത്രസമുച്ചയം പോലുള്ള തന്ത്രഗ്രന്ഥങ്ങളും സ്മൃതികളും പ്രകാരം, ഗ്രഹണം എന്നത് പ്രപഞ്ചത്തിലെ ഊർജ്ജ വ്യതിയാന സമയമാണ്. വിഗ്രഹ ചൈതന്യത്തെ സംരക്ഷിക്കുന്നതിനായി ഗ്രഹണ സ്പർശകാലം മുതൽ മോക്ഷകാലം വരെ നട അടച്ചിടുകയും, മോക്ഷത്തിന് ശേഷം പുണ്യാഹം നടത്തി ശുദ്ധിവരുത്തി ദീപാരാധനയോ പൂജകളോ നടത്തണമെന്നുമാണ് ശാസ്ത്രം.

പ്രധാന പ്രമാണ ഗ്രന്ഥങ്ങൾ:

1. തന്ത്രസമുച്ചയം:
   കേരളീയ ക്ഷേത്ര ആചാരങ്ങളുടെ ‘ഭരണഘടന’ എന്ന് ഇതിനെ വിശേഷിപ്പിക്കാം. ഗ്രഹണം മൂലമുണ്ടാകുന്ന ബിംബശുദ്ധി കുറവിനെ പരിഹരിക്കാൻ ‘പുണ്യാഹം’ നടത്തണമെന്ന് ഇതിൽ നിഷ്കർഷിക്കുന്നു. ഗ്രഹണ സ്പർശത്തിന് മുൻപ് ബിംബം മൂടിവെക്കുന്നതിനെക്കുറിച്ചും (ചില പ്രത്യേക സന്ദർഭങ്ങളിൽ), ഗ്രഹണം കഴിഞ്ഞ് ബിംബം കഴുകി ശുദ്ധി വരുത്തുന്നതിനെക്കുറിച്ചും ഇതിൽ സൂചനകളുണ്ട്.
2. സ്മൃതിരത്നാവലി:
   ഗ്രഹണ സമയത്തെ വേധകാലത്തെക്കുറിച്ചും (ഭക്ഷണ വർജ്ജനം) ക്ഷേത്രദർശന നിയന്ത്രണങ്ങളെക്കുറിച്ചും ഇതിൽ വ്യക്തമായി പറയുന്നു.

“സൂര്യഗ്രഹണേ തു പൂർവ്വം യാമചതുഷ്ടയം. ചന്ദ്രഗ്രഹണേ തു യാമത്രയം…” (സൂര്യഗ്രഹണത്തിന് 4 യാമം (12 മണിക്കൂർ) മുമ്പും ചന്ദ്രഗ്രഹണത്തിന് 3 യാമം (9 മണിക്കൂർ) മുമ്പും ആഹാരം ഉപേക്ഷിക്കണം എന്ന നിയമം ഇതിലാണ് വരുന്നത്. ഇതിനോട് അനുബന്ധിച്ചാണ് ക്ഷേത്ര നടകളും ക്രമീകരിക്കുന്നത്. ഇവിടെ ക്ഷേത്രം തന്ത്രിയുടെ വാക്കാണ് കമ്മിറ്റിക്കാർ സ്വീകരിക്കേണ്ടത്)

3. ആചാരസംഗ്രഹം:
   ക്ഷേത്രങ്ങളിലെ നിത്യനിദാന ചടങ്ങുകളിൽ ഗ്രഹണം വരുത്തുമ്പോൾ വരുത്തേണ്ട മാറ്റങ്ങളെക്കുറിച്ച് ഇതിൽ പ്രതിപാദിക്കുന്നു. ഗ്രഹണം മോക്ഷം പ്രാപിച്ചാൽ (അവസാനിച്ചാൽ) ഉടൻ തന്നെ സ്നാനം ചെയ്യണമെന്നും, ക്ഷേത്ര വിഗ്രഹത്തിന് അഭിഷേകം നടത്തി ശുദ്ധി വരുത്തണമെന്നും ഇതിൽ പറയുന്നു.
4. വരാഹപുരാണം:
   ഗ്രഹണ സമയത്ത് വിഗ്രഹം സ്പർശിക്കുന്നത് നിഷിദ്ധമാണെന്നും, ആ സമയത്ത് ജപങ്ങളും ധ്യാനങ്ങളും മാത്രമേ പാടുള്ളൂ എന്നും ഈ പുരാണം വ്യക്തമാക്കുന്നു. അതുകൊണ്ടാണ് ആ സമയത്ത് പൂജാരിമാർ പോലും ശ്രീകോവിൽ അടച്ച് ഭഗവാനെ ധ്യാനിക്കുന്നത്.

കൂടുതൽ വിവരങ്ങൾക്ക് ഉത്തരാ ജ്യോതിഷ ഗവേഷണ കേന്ദ്രവുമായി ബന്ധപ്പെടുക:
അനിൽ വെളിച്ചപ്പാടൻ, ഉത്തരാ ജ്യോതിഷ ഗവേഷണകേന്ദ്രം, മൊബൈൽ:+91 9497 134 134.

Story Summary : Devotional and Astrological aspects of Solar and lunar Eclipse on February 17 and March 3, 2026 respectively

(നേരം ഓൺ ലൈൻ വാട്‌സ്ആപ്പിലും ലഭിക്കും : NeramOnline.com . നേരം ഓൺലൈനിൻ പ്രസിദ്ധീകരിക്കാൻ ലേഖനങ്ങൾ, ചിത്രങ്ങൾ, വീഡിയോകൾ അയയ്ക്കേണ്ട വാട്‌സ്ആപ്പ് നമ്പർ : + 91 81380 15500 . ആത്മീയ- ജ്യോതിഷ വാര്‍ത്തകള്‍ക്ക്, അസ്ട്രോ ജി, നേരം ഓൺലൈൻ ആപ് ഡൗണ്‍ലോഡ് ചെയ്യുക: AstroG App .)

Copyright @ 2026 NeramOnline.com . All rights reserved.