പവിത്രമായ മണ്ഡലകാല വ്രതത്തിന് സമാപനം കുറിക്കുന്ന ശബരിമല മണ്ഡലപൂജ 2025 ഡിസംബർ 27 ശനിയാഴ്ച രാവിലെ 10:10 നും 11:30 നും മദ്ധ്യേ നടക്കും. ധർമ്മശാസ്താ ഭജനത്തിന് ശ്രേഷ്ഠമായ ശനിയാഴ്ച മണ്ഡലപൂജ വരുന്നത് ഏറെ പുണ്യകരവും ഇരട്ടി ഫലദായകവുമായി കരുതുന്നു.
വെള്ളിയാഴ്ച തങ്കഅങ്കി ചാർത്തി ദീപാരാധന
ആറന്മുള പാർത്ഥസാരഥി ക്ഷേത്രത്തിൽ നിന്നും ഘോഷയാത്രയായി ഡിസംബർ 26 വെള്ളിയാഴ്ച സന്ധ്യയ്ക്ക് സന്നിധാനത്ത് എത്തിക്കുന്ന തങ്കഅങ്കിക്ക് ഭക്തി നിർഭരമായ വരവേൽപ്പ് നൽകും. തുടർന്ന് ശ്രീ കോവിലിലേക്ക് ആനയിച്ച ശേഷം അത് ദിവ്യവിഗ്രഹത്തിൽ ചാർത്തിയാണ് സന്ധ്യാ ദീപാരാധന നടക്കും. തിരുവിതാംകൂർ മഹാരാജാവായിരുന്ന ശ്രീ ചിത്തിരതിരുനാൾ ബാലരാമവർമ്മയാണ് മണ്ഡലപൂജയ്ക്കു ചാർത്തുന്നതിനുള്ള 451 പവൻ തൂക്കമുള്ള തങ്ക അങ്കി 1973 ൽ നടയ്ക്കു വച്ചത്.
എല്ലാ ക്ഷേത്രങ്ങളിലും വിശേഷം
കലിയുഗദുഃഖങ്ങൾ അകറ്റുന്ന മൂർത്തിയായ അയ്യപ്പസ്വാമിയെ ഉപാസിക്കുവാൻ ഏറ്റവും ഉത്തമമായ കാലമാണ് മണ്ഡല – മകര വിളക്ക് തീർത്ഥാടന സമയം. ശബരിമലയിൽ മാത്രമല്ല എല്ലാ ക്ഷേത്രങ്ങളിലും മണ്ഡല പരിസമാപ്തി അതിവിശേഷമായാണ് ആചരിക്കുന്നത്. ഗുരുവായൂരപ്പന്റെ ഇഷ്ട വഴിപാടായ കളഭാഭിഷേകം നടക്കുന്ന പുണ്യ ദിനവുമാണിത്. തന്ത്രിയുടെ കാർമ്മികത്വത്തിൽ കണ്ണന് സമർപ്പിക്കുന്ന കളഭാട്ടം തൊഴുതാൽ സർവ്വ സൗഭാഗ്യവും സിദ്ധിക്കും.
ശാസ്തൃപൂജ ദുരിത മോചന മാർഗ്ഗം
മണ്ഡലവിളക്ക് ദിവസം നടത്തുന്ന അയ്യപ്പപൂജയ്ക്ക് അത്ഭുതകരമായ ഫലം ലഭിക്കും എന്നാണ് വിശ്വാസം. അയ്യപ്പഭജനത്തിന് ജാതിയും മതവുമൊന്നും തടസം അല്ല. ഈശ്വരവിശ്വാസികൾക്കെല്ലാം ശ്രീ അയ്യപ്പനെ ആരാധിക്കാം. കലിയുഗത്തിൽ ഈശ്വരകൃപ നേടാനുള്ള എളുപ്പവഴി നാമജപമാണ് . അയ്യപ്പസ്വാമിയെ ശരണം പ്രാപിച്ചാൽ ഏതൊരു ജീവിത ദു:ഖത്തിനും പരിഹാരം കാണം. പ്രത്യേകിച്ച് ശനിദോഷങ്ങൾ കാരണം കഠിനമായ പരീക്ഷണങ്ങൾ നേരിട്ട് തളർന്നവർക്കുള്ള മോചന മാർഗ്ഗമാണ് ശാസ്തൃ പൂജ.
അയ്യപ്പപ്രീതിക്ക് അത്ഭുത മന്ത്രങ്ങൾ
അയ്യപ്പസ്വാമിയെ പ്രീതിപ്പെടുത്താന് ഏറ്റവും ഗുണകരവും അത്ഭുത ശക്തിയുമുള്ള ചില അത്ഭുത മന്ത്രങ്ങളുണ്ട്. ഭക്തിപൂര്വ്വം ഈ മന്ത്രങ്ങള് ജപിക്കുന്നതിനൊപ്പം മണ്ഡല വിളക്ക് ദിവസം ക്ഷേത്ര ദർശനവും നടത്തണം. കഴിയുമെങ്കില് ധർമ്മശാസ്താ ക്ഷേത്രദര്ശനം തന്നെ നടത്തണം. നെയ്വിളക്ക് കൊളുത്തി അതിനു മുന്നിൽ ഇരുന്ന് വേണം മന്ത്രം ജപം. വ്രതനിഷ്ഠയോടെ തികഞ്ഞ വിശ്വാസത്തോടും ശ്രദ്ധയോടും ചെയ്യുന്ന പ്രാര്ത്ഥന പൂര്ണ്ണഫലം നല്കും. വെറും നിലത്തിരുന്ന് ജപിക്കരുത്. ഒരു പലകയിലോ, പായയിലോ ഷീറ്റ് വിരിച്ചോ ഇരിക്കണം. അശുദ്ധിയുള്ളപ്പോള് ജപം പാടില്ല. മന്ത്രോപദേശം നിര്ബന്ധമില്ല. ശാസ്താവിന്റെ മൂലമന്ത്രമായ ഓം ഘ്രൂം നമഃ പരായഗോപ്ത്രേ എന്നതാണ് ഇതിൽ പ്രധാനപ്പെട്ട ഒരു മന്ത്രം. ഇത് എന്നും 108 തവണ ജപിക്കുക. ശനിദോഷം നീക്കുവാൻ ശാസ്തൃഗായത്രി ഉത്തമമാണ്. കണ്ടകശനി, ഏഴരശനി, അഷ്ടമശനി എന്നിവയാൽ വലയുന്നവര്ക്ക് അത്ഭുത ഫലങ്ങൾ ശാസ്തൃഗായത്രി ജപത്തിലൂടെ ലഭിക്കും. കുറഞ്ഞത് 108 തവണ 18 ദിവസം ജപിക്കുക. തുടർന്ന് എന്നും 36 തവണ വീതം ജപിക്കണം.
ഇതാണ് ശാസ്തൃഗായത്രി:
ALSO READ
ശാസ്തൃഗായത്രി
ഓം ഭൂതനാഥായ വിദ്മഹേ
ഭവപുത്രായ ധീമഹേ
തന്ന: ശാസ്താ പ്രചോദയാത്
4 ശാസ്തൃ മന്ത്രങ്ങൾ
ഇനി പറയുന്ന അയ്യപ്പമന്ത്രങ്ങള് ഒരോ ആവശ്യത്തിനും 144 തവണ വീതം ദിവസവും ജപിക്കാവുന്നതാണ്.
ഓം മഹാ ശാസ്ത്രേ നമഃ (പാപശാന്തിക്ക് )
ഓം ഭവപുത്രായ നമഃ (കാര്യവിജയത്തിന്)
ഓം ശാസ്ത്രേ നമഃ (രോഗദുരിതശാന്തി)
ഓം വീരസേനായ നമഃ (ആരോഗ്യത്തിന്)
തന്ത്രരത്നം പുതുമന മഹേശ്വരൻ നമ്പൂതിരി,
(മൊബൈൽ: +919447020655)
Story Summary: Sabarimala Mandala Pooja will take place on December 27, 2025. This ritual marks the conclusion of the 41-day Mandalakala penance.
(നേരം ഓൺ ലൈൻ വാട്സ്ആപ്പിലും ലഭിക്കും. ക്ലിക്ക് ചെയ്യൂ : NeramOnline.com . നേരം ഓൺലൈനിൻ പ്രസിദ്ധീകരിക്കാൻ ലേഖനങ്ങൾ, ചിത്രങ്ങൾ, വീഡിയോകൾ അയയ്ക്കേണ്ട വാട്സ്ആപ്പ് നമ്പർ : + 91 81380 15500 . ആത്മീയ ജ്യോതിഷ വാര്ത്തകള്ക്ക് അസ്ട്രോ ജി, നേരം ഓൺലൈൻ ആപ് ഡൗണ്ലോഡ് ചെയ്യുക : AstroG App .)
Copyright 2025 NeramOnline.com . All rights reserved
