എല്ലാ രീതിയിലുള്ള ശത്രുക്കളിൽ നിന്നും പ്രതിബന്ധങ്ങളിൽ നിന്നും രക്ഷിക്കുന്ന
വ്രതാനുഷ്ഠാനമാണ് വരൂഥിനീ ഏകാദശി വ്രതം. മീനം / മേടമാസത്തിൽ കൃഷ്ണപക്ഷ ഏകാദശിയിൽ മഹാവിഷ്ണു പ്രീതിക്കായി ഈ വ്രതംഎടുക്കുന്നതിലൂടെ എല്ലാ സുഖസൗഭാഗ്യങ്ങളും നേടാൻ കഴിയും. വരൂഥിനീ എന്ന ഹിന്ദിപദത്തിന്റെ അർത്ഥം സംരക്ഷണം, കവചം എന്നെല്ലാമാണ്. വിധി പ്രകാരം വരൂഥിനീ ഏകാദശി വ്രതം അനുഷ്ഠിച്ചാൽ പേരും പ്രശസ്തിയും ഐശ്വര്യാഭിവൃദ്ധിയും കരഗതമാകും. വ്രതാനുഷ്ഠാനത്തിന്റെ ഭാഗമായി ഈ ദിവസം ദാനാര്ഹരായവർക്ക് ദാനം നല്കുന്നത് വിശേഷമാണ്. ഈ ദാനത്തിലൂടെ അനേകായിരം വര്ഷം ധ്യാനമഗ്നരായി തപസ്സു ചെയ്യുന്നതിലും കന്യാദാനം ചെയ്യുന്നതിലും നിന്നു ലഭിക്കുന്നതിനേക്കാള് ശ്രേഷ്ഠമായ സർവ സൗഭാഗ്യ ഫലം ലഭിക്കും. ഈ ദിവസം വേപ്പിന് കമ്പ് ഒടിക്കരുത് എന്നും പറയുന്നു.
ഹരിവാസര വേളയിൽ മന്ത്രജപം
2026 ഏപ്രിൽ 13 തിങ്കളായാഴ്ചയാണ് വരൂഥിനി ഏകാദശി. ഈ വ്രതമെടുക്കുന്നവർ തലേന്ന് ദശമിക്ക് വ്രതം തുടങ്ങണം. ഏപ്രിൽ 13 രാത്രി 7:30 മുതൽ പിറ്റേന്ന് രാവിലെ 6:52 വരെയാണ് ഹരിവാസര സമയം. ഏകാദശി വ്രതാനുഷ്ഠാനത്തിലെ ഏറ്റവും പ്രധാന സമയമാണ് ഹരിവാസര വേള. ഭൂമിയിൽ ഹരിയുടെ സാന്നിദ്ധ്യം ഏറ്റവും കൂടുതൽ നിറയുന്ന ഈ സമയത്ത് ഓം നമോ നാരായണായ, ഓം നമോ ഭഗവതേ വാസുദേവായ തുടങ്ങിയ മന്ത്രങ്ങൾ നിരന്തരം ജപിച്ചു കൊണ്ടിരിക്കണം. ഭഗവത്ഗീത, വിഷ്ണു അഷ്ടോത്തരം, സഹസ്രനാമം എന്നിവ ജപിക്കുകയോ കേൾക്കുകയോ വേണം. ഊണും ഉറക്കവും ഉപേക്ഷിക്കണം. ഹരിവാസര സമയത്ത് നടത്തുന്ന മഹാവിഷ്ണു ഭജനത്തിന് പൂര്ണ്ണ ഫലസിദ്ധിയാണ് ആചാര്യന്മാർ വിധിച്ചിരിക്കുന്നത്.
ദാനധർമ്മങ്ങൾ നല്കണം
വരൂഥിനീ ഏകാദശി വ്രതഭാഗമായി അര്ഹരായവർക്ക് വിധി പ്രകാരം ദാനധർമ്മങ്ങൾ നല്കുന്നത് നല്ലതാണ്. ഈ ദാനത്തിലൂടെ അനേകായിരം വര്ഷങ്ങൾ തപസ് ചെയ്യുന്നതിലും ശ്രേഷ്ഠമായ സർവ സൗഭാഗ്യ ഫലം കിട്ടും ഈ ദിവസം വേപ്പിന് കമ്പ് ഒടിക്കരുത് എന്ന് വിശ്വാസം.
ദശമി, ഏകാദശി, ദ്വാദശി ദിനങ്ങള് ഏകാദശിക്ക് പ്രധാനമാണ്. ഈ ദിനങ്ങളില് ഒരു നേരം അരിയാഹാരം കഴിക്കാം. മറ്റ് സമയത്ത് പഴങ്ങളും ഫലവർഗ്ഗങ്ങളും ഗോതമ്പിലുണ്ടാക്കിയ ലളിതാഹാരവും കഴിക്കാം. ഏകാദശി നാളില് പൂര്ണ്ണമായി ഉപവസിക്കുന്നതാണ് ഉത്തമം. ഈ ദിവസം തുളസീതീര്ത്ഥം മാത്രം കുടിച്ചും വ്രതമെടുക്കാം. അതിന് കഴിയാത്തവർ ലളിതാഹാരം കഴിച്ച് വ്രതം നോൽക്കുന്നു. ദ്വാദശി ദിവസം രാവിലെ തുളസീതീര്ത്ഥം കഴിച്ച് വ്രതം പൂർത്തിയാക്കും. വ്രത ദിവസങ്ങളിൽ വിഷ്ണു പ്രീതികരമായ മന്ത്രജപങ്ങൾ പ്രധാനമാണ്. ഓം നമോ നാരായണായ നമഃ കഴിയുന്നത്ര തവണ ജപിക്കണം. വിഷ്ണുക്ഷേത്രദര്ശനം നടത്തണം. അല്ലെങ്കിൽ വീട്ടിൽ പൂജാമുറിയിൽ മഹാവിഷ്ണുവിന്റെ ചിത്രത്തിനു മുന്നിൽ വിളക്ക് കൊളുത്തി പ്രാർത്ഥിക്കുക. ശ്രീരാമ, ശ്രീകൃഷ്ണ പ്രീതികരമായ മന്ത്രങ്ങൾ ജപിക്കുന്നതിനും ഏകാദശി ദിനം ഉത്തമമാണ്. മൗനം ഭജിക്കുന്നതും നല്ലതാണ്. മത്സ്യമാംസ ഭക്ഷണം, മദ്യം, ശാരീരിക ബന്ധം, പകലുറക്കം ഇതൊന്നും പാടില്ല. രണ്ടു നേരം കുളിക്കണം. മഹാവിഷ്ണുവിന് ഏറെ പ്രിയപ്പെട്ട തുളസിയിലയും പഴങ്ങളും ഏകാദശി ദിവസം ക്ഷേത്രത്തിൽ സമര്പ്പിക്കണം. പുഷ്പാഞ്ജലി, മുഴുക്കാപ്പ് തുടങ്ങിയ വഴിപാടുകൾ നടത്തുന്നതും നല്ലതാണ്. പ്രസിദ്ധ ഗായകൻ മണക്കാട് ഗോപൻ ആലപിച്ച അച്യുതാഷ്ടകം കേൾക്കാം:
Story Summary: Significance of Varoodhini Ekadashi of Medam Masam Krishna Paksha
Highlights
വിധിപ്രകാരം വരൂഥിനീ വ്രതം എടുത്താൽ പ്രശസ്തിയും ഐശ്വര്യവും ലഭിക്കും
ALSO READ
വ്രത ദിവസങ്ങളിൽ വിഷ്ണു പ്രീതി മന്ത്രജപങ്ങൾ പ്രധാനം
ഹരിവാസര വേളയിലെ മഹാവിഷ്ണു ഭജനത്തിന് പൂര്ണ്ണ ഫലസിദ്ധി കിട്ടും
(നേരം ഓൺ ലൈൻ വാട്സ്ആപ്പിലും ലഭിക്കും : NeramOnline.com . നേരം ഓൺലൈനിൻ പ്രസിദ്ധീകരിക്കാൻ ലേഖനങ്ങൾ, ചിത്രങ്ങൾ, വീഡിയോകൾ അയയ്ക്കേണ്ട വാട്സ്ആപ്പ് നമ്പർ : + 91 81380 15500 . ആത്മീയ- ജ്യോതിഷ വാര്ത്തകള്ക്ക്, അസ്ട്രോ ജി, നേരം ഓൺലൈൻ ആപ് ഡൗണ്ലോഡ് ചെയ്യുക: AstroG App .)
Copyright @ 2026 NeramOnline.com . All rights reserved.
