സാധാരണ ജീവിതത്തിലെ ദുരിതങ്ങളിൽ പ്രധാനമായ ശത്രുദോഷം, ദൃഷ്ടിദോഷം, ബാധാദോഷം, രോഗക്ലേശം, ശനിദോഷം തുടങ്ങിയവ മാറുന്നതിന് ഏറ്റവും ഉത്തമമാണ് ത്രയോദശി തിഥിയിലെ പ്രദോഷ വ്രതാചരണം. 2026 ജനുവരി 16 വെള്ളിയാഴ്ച മകരമാസത്തിലെ കൃഷ്ണപക്ഷ പ്രദോഷമാണ്. മകരത്തിലെ മുപ്പെട്ടു വെള്ളിയിൽ കൃഷ്ണപക്ഷ പ്രദോഷവും വരുന്നത് കൂടുതൽ ശ്രേയസ്കരമാണ്. സമ്പത്ത്, സന്താനഭാഗ്യം, രോഗശാന്തി, കാര്യസിദ്ധി എന്നിവ കൈവരിക്കുന്നതിനും പ്രദോഷവ്രതം ഉത്തമാണ്. ഈ ദിവസം ഉപവാസ വ്രതമെടുത്ത് ശിവപാർവ്വതിമാരെ പ്രാർത്ഥിക്കുകയും സന്ധ്യയ്ക്ക് പ്രദോഷപൂജയിൽ പങ്കെടുക്കുകയും ശിവപാർവതി സ്തുതികളും മന്ത്രങ്ങളും ജപിക്കുകയും ചെയ്താൽ സങ്കടങ്ങളകറ്റി ആഗ്രഹസാഫല്യം നേടാം
കറുത്തപക്ഷ പ്രദോഷം വിശേഷം
ത്രയോദശി തിഥി സന്ധ്യയ്ക്ക് വരുന്ന ദിവസമാണ്പ്ര ദോഷം ആചരിക്കുന്നത്. ശിവപാർവ്വതി ക്ഷേത്രങ്ങളിലെല്ലാം അതിവിശേഷകരമാണ് ഈ ദിവസം. മാസത്തിൽ രണ്ടു പ്രദോഷം ഉണ്ട് വെളുത്തപക്ഷത്തിലും കറുത്തപക്ഷത്തിലും. ശിവഭക്തർ രണ്ടും ആചരിക്കാറുണ്ട്. കറുത്തപക്ഷ പ്രദോഷത്തിന് കൂടുതൽ പ്രാധാന്യം കല്പിക്കുന്നു.
വ്രതം, ക്ഷേത്ര ദർശനം, ജപം
പ്രദോഷ വ്രതമെടുക്കുന്നവർ രാവിലെ കുളിച്ച് ഭസ്മം തൊട്ട് വൃത്തിയും ശുദ്ധിയുമുള്ള വസ്ത്രം ധരിച്ച് ക്ഷേത്രദർശനം നടത്തണം.കഴിവിനൊത്ത വഴിപാടുകൾ നടത്തണം. അന്ന് ഓം നമഃ ശിവായ, ശിവ അഷ്ടോത്തരശത നാമാവലി, ഉമാ മഹേശ്വര സ്തോത്രം തുടങ്ങിയ ശിവപ്രീതികരമായ മന്ത്രങ്ങളും സ്തോത്രങ്ങളും പരമാവധി ചൊല്ലണം. ക്ഷേത്രത്തിൽ പോകാൻ കഴിയുന്നില്ലെങ്കിൽ വീട്ടിൽ ഇരുന്ന് പ്രാർത്ഥിച്ചാലും മതി. എന്തായാലും ഓം നമഃ ശിവായ പഞ്ചാക്ഷരി മന്ത്രം പരമാവധി പ്രാവശ്യം ജപിക്കുക. കൂടാതെ പാർവതീ സമേതനായ ശിവനെ സങ്കല്പിച്ചു കൊണ്ട് ഓം ഹ്രീം നമഃ ശിവായ എന്ന ശക്തി പഞ്ചാക്ഷരീ മന്ത്രം ജപിക്കുന്നതും ഉത്തമമാണ്. ശിവസഹസ്രനാമം ജപിക്കുന്നത് ഏറ്റവും നല്ലതാണ്. ശിവലീലകൾ അടങ്ങുന്ന ശിവപുരാണം പാരായണം ചെയ്യാൻ ഏറ്റവും നല്ല ദിവസവുമാണിത്.
മിതമായി മാത്രം ഭക്ഷണം കഴിക്കുക
ഈ പുണ്യദിനത്തിൽ യാതൊരു അധാർമ്മിക പ്രവൃത്തികളും ചെയ്യരുത്. മോശം കാര്യങ്ങൾ ചിന്തിക്കുകയും പ്രവർത്തിക്കുകയും പാടില്ല. അസ്തമയ സന്ധ്യാസമയത്ത് നല്ല കാര്യങ്ങൾ മാത്രം ചിന്തിക്കുകയും പറയുകയും പ്രവർത്തിക്കുകയും ചെയ്യണം. പ്രദോഷ ദിവസം ഉപവസിക്കാൻ കഴിയുന്നില്ലെങ്കിൽ മിതമായി മാത്രം ഭക്ഷണം കഴിക്കുക. പ്രാർത്ഥനയ്ക്കുള്ള സന്ധ്യാസമയമാണ് പ്രദോഷസമയമായി കണക്കാകുന്നത്. ഈ സമയത്ത് ക്ഷേത്രത്തിൽ പോയി ഫലമൂലാദികൾ സമർപ്പിച്ച് ധാര നടത്തി പൂജ കണ്ട് തൊഴണം. പ്രദോഷപൂജയുടെ തീർത്ഥം കഴിച്ച് വ്രതം അവസാനിപ്പിക്കാം.
മഹനീയ മുഹൂർത്തം പ്രദോഷ സമയം
ത്രയോദശിയിലെ പ്രദോഷസന്ധ്യയിൽ പാർവ്വതിയെ തൃപ്തിപ്പെടുത്താൻ ശിവൻ താണ്ഡവമാടുന്നു എന്നാണ് വിശ്വാസം. ഈ സമയത്ത് സകല ദേവഗണങ്ങളും ശിവ സന്നിധിയിലെത്തും എന്നാണ് വിശ്വാസം. അപ്പോൾ പാർവതിയും സുബ്രഹ്മണ്യനും ഗണപതി ഭഗവാനും ശിവ ഭൂതഗണങ്ങളും മാത്രമല്ല മറ്റ് ദേവതകളും മഹർഷിമാരും ദിവ്യത്മാക്കളുമെല്ലാം ഭഗവാന്റെ നൃത്തം കണ്ട് സ്തുതിക്കുന്നു. അത്ര മഹനീയ മുഹൂർത്തമായാണ് പ്രദോഷ സമയം.
എന്ത് ചോദിച്ചാലും ലഭിക്കും
കാലകാലനാണ് ശിവൻ. അതായത് കാലന്റെ പോലും കാലൻ. മനുഷ്യ ജീവിതത്തിൽ എല്ലാ ദോഷ ദുരിതങ്ങളുടെയും അവസാനം മരണമാണ്. കാലനാണ്, യമധർമ്മനാണ് മരണത്തിന്റെ ദേവൻ. ആ കാലനെ പോലും നശിപ്പിക്കാൻ ശക്തിയുള്ള ദേവനാണ് പരമശിവൻ. അതുകൊണ്ടുതന്നെ മൃത്യുദോഷം ഉൾപ്പെടെയുള്ള ദുരിതങ്ങളും ദുഃഖങ്ങളും അകറ്റുന്ന ദേവനായി ശിവനെ ആരാധിക്കുന്നു. ക്ഷിപ്രകോപിയും ക്ഷിപ്രപ്രസാദിയുമായ ശിവൻ അത്യധികം സന്തോഷവാനാകുന്നത് പ്രദോഷ സന്ധ്യയിലാണ്. അപ്പോൾ ഭക്തർ എന്ത് ചോദിച്ചാലും ദേവദേവൻ കനിഞ്ഞ് അനുഗ്രഹിക്കുമെന്ന് ആചാര്യന്മാർ പറയുന്നു.
ALSO READ
പെട്ടെന്ന് ഫലസിദ്ധി ലഭിക്കും
പ്രദോഷദിനത്തിലെ ഉമാമഹേശ്വര ഉപാസനയ്ക്ക് അതിവേഗം ഫലം ലഭിക്കും. അന്ന് ശ്രീ പാർവതി വല്ലഭാഷ്ടകവും ഉമാമഹേശ്വര സ്തോത്രവും ഗൗരീശ കീർത്തനവും ജപിച്ച് ശങ്കരപാർവതിമാരെ ഭജിച്ചാൽ ദാമ്പത്യക്ലേശം അകലും. വിവാഹതടസ്സം മാറും; സന്താനങ്ങൾക്ക് നന്മയുണ്ടാകും. കുടുംബത്തിൽ ഐശ്വര്യം, രോഗമുക്തി ഇവ തീർച്ചയായും ലഭിക്കും. ശ്രീ പാർവതി വല്ലഭാഷ്ടകവും ഉമാമഹേശ്വര സ്തോത്രവും പ്രദോഷ സന്ധ്യയ്ക്ക് നെയ് വിളക്ക് കത്തിച്ച് ജപിച്ചാൽ ഇരട്ടി ഫലം ലഭിക്കും. തിങ്കളാഴ്ചകളിലും പ്രദോഷം തുടങ്ങിയ ശിവപാർവ്വതി പ്രധാനമായ ദിവസങ്ങളിലും
ഇവ ജപിച്ച് ക്ഷേത്രദർശനം നടത്തി മൃത്യുഞ്ജയ പുഷ്പാഞ്ജലി കഴിപ്പിച്ചാൽ രോഗശമനമുണ്ടാകും. അന്ന് പ്രദോഷ പൂജയിൽ പങ്കെടുത്താൽ ശിവപർവതി പ്രീതിയാൽ എല്ലാ കാര്യങ്ങളും ആഗ്രഹം പോലെ നടക്കും. പ്രസിദ്ധ ഗായകൻ മണക്കാട് ഗോപൻ ആലപിക്കുന്ന ശ്രീ പാർവതി വല്ലഭാഷ്ടകം കേൾക്കാം:
തന്ത്രരത്നം പുതുമന മഹേശ്വരൻ നമ്പൂതിരി,
മൊബൈൽ: +91 094-470-20655
Story Summary: Significance of Pradosha Vritham of Makaram Month Krishna Paksha
(നേരം ഓൺ ലൈൻ വാട്സ്ആപ്പിലും ലഭിക്കും: NeramOnline.com . നേരം ഓൺലൈനിൻ പ്രസിദ്ധീകരിക്കാൻ ലേഖനങ്ങൾ, ചിത്രങ്ങൾ, വീഡിയോകൾ അയയ്ക്കേണ്ട വാട്സ്ആപ്പ് നമ്പർ : + 91 81380 15500 . ആത്മീയ- ജ്യോതിഷ വാര്ത്തകള്ക്ക്, അസ്ട്രോ ജി, നേരം ഓൺലൈൻ ആപ് ഡൗണ്ലോഡ് ചെയ്യുക: AstroG App .)
Copyright @ 2026 NeramOnline.com . All rights reserved.
