കൃഷ്ണാഷ്ടമിയോ ദുർഗ്ഗാഷ്ടമിയോ?

ഭഗവാൻ ശ്രീകൃഷ്ണനും യോഗമായാദേവിയും ഒരേ അഷ്ടമി രാത്രിയിലാണ് അവതരിച്ചെങ്കിലും, എന്തുകൊണ്ട് നാം ഈ ദിവസം കൃഷ്ണ ജന്മാഷ്ടമി മാത്രമായി ആഘോഷിക്കുന്നത് ?

ഭാദ്രപദ മാസത്തിലെ കൃഷ്‌ണപക്ഷ അഷ്ടമി രാത്രിയിൽ മഥുരയിൽ ശ്രീകൃഷ്ണൻ ജനിക്കുന്നു.
അതേ രാത്രിയിൽ ഗോകുലത്തിൽ യോഗമായയും ശിശുരൂപത്തിൽ പ്രത്യക്ഷപ്പെടുന്നു. എന്നിട്ടും എന്താണ്
ഈ ദിനം കൃഷ്ണാഷ്ടമി മാത്രം ആകുന്നത് എന്ന ചോദ്യം സ്വാഭാവികം. യോഗമായയും അതേ അഷ്ടമിയിലാണ് അവതരിച്ചതെങ്കിൽ, എന്തുകൊണ്ടാണ് ആ ദിവസം ദുർഗാദേവിയുടെ ജന്മാഷ്ടമി എന്ന് പറയാത്തത് ?

ഇതിന് പിന്നിൽ വളരെ ആഴമുള്ള ഒരു ശക്തിതത്ത്വം ഒളിഞ്ഞിരിക്കുന്നു.

ശ്രീകൃഷ്ണൻ മനുഷ്യരൂപത്തിൽ ജന്മം സ്വീകരിച്ച് ലീലയിൽ തുടരുന്നു. ശിശുവായി വളരുന്നു, മനുഷ്യരുമായി ഇടപഴകുന്നു, ജീവിതത്തിന്റെ വിവിധ ഘട്ടങ്ങൾ കടന്നു മുന്നോട്ടുപോകുന്നു. അതുകൊണ്ടുതന്നെ ശ്രീകൃഷ്ണ അവതാരം “ജന്മം” എന്ന നിലയിൽ ഭക്തർ ആഘോഷിക്കുന്നു.

എന്നാൽ യോഗമായയുടെ ആവിർഭാവം വ്യത്യസ്തമാണ്.

കംസൻ ആ ശിശുവിനെ നിഗ്രഹിക്കാൻ ശ്രമിച്ചപ്പോൾ, യോഗമായ തന്റെ ദിവ്യസ്വരൂപം വെളിപ്പെടുത്തുന്നു. ദേവി ഒരു സാധാരണ ശിശുവായി ജീവിക്കാനല്ല പ്രത്യക്ഷപ്പെട്ടത്. ദൈവികമായ ഒരു ദൗത്യത്തിനായിരുന്നു ആ അവതരണം.

ആ ദേവി ആരാണ്?
യോഗമായ — പരാശക്തി, ജഗന്മാതാവ്, ആദിശക്തി. ഇങ്ങനെ എന്തു വേണമെങ്കിലും പറയാം.

അതിനാൽ യശോദയുടെ പുത്രിയായി പ്രത്യക്ഷപ്പെട്ട ആ ശിശുരൂപം ദേവിയുടെ അവതാരം അല്ല. അവിടെ ആദിപരാശക്തി ജനിക്കുകയല്ല; മറിച്ച്, ഒരു പ്രത്യേക ദൗത്യത്തിനായി ശക്തി രൂപത്തിൽ പ്രത്യക്ഷപ്പെടുകയാണ് ചെയുന്നത് . ആ ദൗത്യങ്ങൾ ഇതെല്ലാമായിരുന്നു :

കൃഷ്ണലീല ആരംഭിക്കേണ്ടതുണ്ട്.
മഥുരയിലെ കാരാഗൃഹത്തിന്റെ വാതിലുകൾ തുറക്കണം.
കാവൽക്കാർ അറിയാതെ ഉറങ്ങണം.
വസുദേവൻ കുഞ്ഞിനെ ഗോകുലത്തിലെത്തിക്കണം.
കൃഷ്ണനും യോഗമായയും പരസ്പരം മാറ്റപ്പെടണം.
കംസന്റെ ശ്രദ്ധ വഴിതിരിച്ചുവിടണം.

ഇതെല്ലാം സാധ്യമാക്കുന്ന ശക്തിയായി യോഗമായ പ്രവർത്തിക്കുന്നു.

അപ്പോൾ മറ്റൊരു ചോദ്യം:
“കൃഷ്ണൻ ഭഗവാനാണെങ്കിൽ, യോഗമായയുടെ സഹായം എന്തിന്?”

ഭഗവാൻ നിസ്സഹായനായതുകൊണ്ടല്ല.
അത് ലീലയുടെ സ്വഭാവമാണ്. ഭഗവാൻ മനുഷ്യലോകത്തിലേക്ക് അവതരിച്ച് ലീല ചെയ്യുമ്പോൾ, ആ ലീലയുടെ ചലനങ്ങളെ നിയന്ത്രിക്കുകയും സാഹചര്യങ്ങളെ ഒരുക്കുകയും ചെയ്യുന്ന ശക്തിയായി മായയും ശക്തിയും പ്രവർത്തിക്കുന്നു.

ശാക്തദർശനം ഇവിടെ ഒരു മനോഹരമായ സത്യം ഓർമ്മിപ്പിക്കുന്നു:
ശക്തി ഒന്നുതന്നെയാണ്.
അവൾ സൃഷ്ടിക്കുന്നു.
അവൾ മറയ്ക്കുന്നു.
അവൾ വെളിപ്പെടുത്തുന്നു.
അവൾ മോചിപ്പിക്കുന്നു.

കൃഷ്ണന്റെ ലീലയും ശക്തിയിൽനിന്ന് വേറിട്ടതല്ല.
അതുകൊണ്ടുതന്നെ ഈ രണ്ട്
പ്രത്യക്ഷ ഭാവളെയും രണ്ട് മത്സരിക്കുന്ന “ജന്മങ്ങൾ” ആയി കാണേണ്ടതില്ല.

കൃഷ്ണൻ ലീലയിൽ ജനിക്കുന്നു.
യോഗമായ ആ ലീല സാധ്യമാക്കാൻ ശക്തിയായി പ്രത്യക്ഷപ്പെടുന്നു.
ഇതാണ് കൃഷ്ണജന്മാഷ്ടമിയുടെ ആഴമുള്ള അർത്ഥം.
ലോകം കൃഷ്ണന്റെ ജന്മം ആഘോഷിക്കുന്നതിന് മുമ്പുതന്നെ, പരാശക്തി ആ ദിവ്യലീലയുടെ വേദി ഒരുക്കിയിരുന്നു.

അതിനാൽ ഒരേ അഷ്ടമി രാത്രിയിൽ പ്രത്യക്ഷപ്പെട്ട ഈ രണ്ട് ദിവ്യസ്വരൂപങ്ങൾ നമ്മോട് പറയുന്നത് ഒരേ സത്യമാണ്.

സായി ശ്രീനിവാസ് നന്ദഗോപാലൻ
(പി എച്ച് ഡി സ്‌കോളർ, തന്ത്രിക്
ട്രെഡിഷൻസ് )

Story Summary: Krishna Ashtami or Durga Ashtami?  If Both Appeared on the Same Night, Why Do We Celebrate Krishna’s Birth?

(നേരം ഓൺ ലൈൻ വാട്‌സ്ആപ്പിലും ലഭിക്കും : NeramOnline.com . നേരം ഓൺലൈനിൻ പ്രസിദ്ധീകരിക്കാൻ ലേഖനങ്ങൾ, ചിത്രങ്ങൾ, വീഡിയോകൾ അയയ്ക്കേണ്ട വാട്‌സ്ആപ്പ് നമ്പർ : + 91 81380 15500 . Visit our online store https://www.okalasha.com, for Devotional Decors, Photos, Jewels and Book’s etc)

Copyright @ 2026 NeramOnline.com . All rights reserved.