(നേരം ഓൺ ലൈൻ ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വിശേഷങ്ങൾക്കായി ക്ലിക്ക് ചെയ്യൂ : riyoceline.com/projects/Neram/)
ജോതിഷി പ്രഭാസീന സി പി
സുബ്രഹ്മണ്യന്റെയും ശിവപാർവ്വതിമാരുടെയും
കൃപാകടാക്ഷം ഒരുപോലെ ലഭിക്കുന്ന കുംഭത്തിലെ ഷഷ്ഠി വ്രതം 2025 മാർച്ച് 5 ബുധനാഴ്ചയാണ്. മാസന്തോറും വെളുത്ത പക്ഷത്തിലെ ഷഷ്ഠിതിഥിയാണ്
ഷഷ്ഠിവ്രതമായി ആചരിക്കുന്നത്. സ്കന്ദഷഷ്ഠി, തൈപ്പൂയം, ഭഗവാന്റെ അവതാര ദിനമായ ഇടവത്തിലെ വൈകാശി വിശാഖം ഇവയാണ് സുബ്രഹ്മണ്യസ്വാമിക്ക് ഏറ്റവും പ്രാധാന്യമുള്ള വാർഷിക ദിവസങ്ങൾ. ഇതിനു പുറമെ ചൊവ്വ, ഞായർ ദിനങ്ങളും കാർത്തിക, വിശാഖം, പൂയം നക്ഷത്രങ്ങളും ഷഷ്ഠി തിഥികളും ശ്രീ മുരുകനെ
പ്രീതിപ്പെടുത്താൻ ഉത്തമമായ ദിവസങ്ങളാണ്.
ഷഷ്ഠിവ്രത ഫലം
ഷഷ്ഠിക്ക് ശ്രീമുരുകനെ ഭജിക്കുന്നത് ഐശ്വര്യത്തിനും ആഗ്രഹലബ്ധിക്കും സന്താനങ്ങളുടെ ക്ഷേമത്തിനും സന്താന ലബ്ധിക്കും ദാമ്പത്യ ദുരിതശമനത്തിനും വളരെ ഉത്തമമാണ്. ജാതകത്തിൽ ചൊവ്വ അനിഷ്ട സ്ഥാനത്ത് ഉള്ളവരും ചൊവ്വാദോഷമുള്ളവരും ഷഷ്ഠിവ്രതം അനുഷ്ഠിക്കുന്നത് നല്ലതാണ്. മകയിരം, ചിത്തിര, അവിട്ടം നക്ഷത്രക്കാരും ജാതകത്തില് മേടം, മിഥുനം, ചിങ്ങം, തുലാം, ധനു, കുംഭം എന്നീ രാശികളില് ചൊവ്വ നില്ക്കുന്നവരും ഷഷ്ഠി ദിവസം സുബ്രഹ്മണ്യ ഗായത്രി ജപിക്കുന്നത് വളരെ നല്ലതാണ്. സന്താനങ്ങളുടെ ഉയര്ച്ചയ്ക്കും സുബ്രഹ്മണ്യ ഗായത്രി ജപം ഉത്തമമാണ്. നിത്യജപത്തിനും നല്ലതാണ്.
വ്രതനിഷ്ഠ
തലേന്ന് പഞ്ചമി മുതൽ വ്രതമെടുത്ത് ഷഷ്ഠി ദിവസം ഉപവാസത്തോടെ സുബ്രഹ്മണ്യ ക്ഷേത്രത്തിൽ ദർശനവും വഴിപാടുകളും നടത്തി ഉച്ചനേരത്തെ ഷഷ്ഠി പൂജയും തൊഴുത് ക്ഷേത്രത്തിൽ നിന്നു ലഭിക്കുന്ന നേദിച്ച പടച്ചോറും കഴിച്ചാണ് ഷഷ്ഠി വ്രതം പൂർത്തിയാക്കുന്നത്. ഈ ദിവസം സുബ്രഹ്മണ്യ ഭഗവാന്റെ മൂലമന്ത്രം, ഗായത്രി, അഷ്ടോത്തരം, സ്കന്ദപുരാണം എന്നിവ പാരായണം ചെയ്യണം. സന്ധ്യയ്ക്ക് ഇതിനൊപ്പം ഷഷ്ഠിദേവി സ്തുതി ചൊല്ലുന്നത് ഉത്തമമാണ്. ഷഷ്ഠി നാളിൽ ഭസ്മാഭിഷേകം,
പഞ്ചാമൃതാഭിഷേകം, കുമാരസൂക്ത പുഷ്പാഞ്ജലി എന്നിവ ക്ഷേത്രത്തിൽ നടത്തുന്നത് അത്യുത്തമമാണ്. പിറ്റേന്നു തുളസീതീർഥം സേവിച്ച് പാരണ വിടുന്നു.
സുബ്രഹ്മണ്യ ധ്യാനശ്ലോകം
സ്ഫുരൻമകുടപത്ര കുണ്ഡല വിഭൂഷിതം ചമ്പക-
സ്രജാകലിതകന്ധരം കരയുഗീന ശക്തിം പവിം
ദധാനമഥവാ കടീകലിതവാമഹസ്തേഷ്ടദം
ഗുഹം ഘുസൃണഭാസുരം സ്മരതു പീതവാസോവസം
ALSO READ
(ശ്രീമുരുകനെ ധ്യാനിച്ച് ഭഗവൽ രൂപം സങ്കല്പിച്ച് ധ്യാനശ്ലോകം ജപിക്കണം. ശ്ലോകത്തിന്റെ അർത്ഥം മനസ്സിലാക്കി ജപിച്ചാൽ വേഗം ഫലസിദ്ധിയുണ്ടാകും. അർത്ഥം: തിളങ്ങുന്ന കിരീടം, പത്രകുണ്ഡലം ഇവയാൽ വിഭൂഷിതനും ചമ്പകമാലയാൽ അലങ്കരിക്കപ്പെട്ട കഴുത്തോടു കൂടിയവനും കൈകളിൽ വേലും വജ്രവും ധരിക്കുന്നവനും കുങ്കുമ വർണ്ണശോഭയുള്ളവനും മഞ്ഞപ്പട്ടുടുത്തവനുമായ സുബ്രഹ്മണ്യസ്വാമിയെ ഞാൻ ധ്യാനിക്കുന്നു.)
സുബ്രഹ്മണ്യ മൂലമന്ത്രം
ഓം വചദ്ഭുവേ നമഃ
ഓം ഷൺമുഖായ നമഃ
സുബ്രഹ്മണ്യ ഗായത്രി
സനത്കുമാരായ വിദ്മഹേ
ഷഡാനനായ ധീമഹി
തന്നോ സ്കന്ദ: പ്രചോദയാത്
പ്രാർത്ഥനാ മന്ത്രം
ശക്തി ഹസ്തം വിരൂപാക്ഷം
ശിഖിവാഹം ഷഡാനനം
ദാരുണം രിപു രോഗഘ്നം
ഭാവയേ കുക്കുട ധ്വജം
ഷഷ്ഠീദേവീസ്തുതി
ഷഷ്ഠാംശം പ്രകൃതേശുദ്ധാം
പ്രതിഷ്ഠാപ ച സുപ്രഭാം
സപുത്രദാം ച ശുഭദാം
ദയാരൂപാം ജഗത്പ്രസൂം
ശ്വേതചമ്പക വര്ണാഭ്യാം
രത്നഭൂഷണ ഭൂഷിതാം
പവിത്രരൂപാം പരമാം
ദേവസേനാം പരേഭജേ
ഷഷ്ഠി മന്ത്രം
ഓം ഹ്രീം ഷഷ്ഠീദേവ്യേ സ്വഹാ
ക്ഷേത്രദർശനം നടത്തണം
ഈ ഷഷ്ഠി വ്രതമെടുക്കാൻ കഴിയാത്തവർ ഭഗവാൻ്റെ അനുഗ്രഹത്തിന് അന്നേദിവസം സുബ്രഹ്മണ്യ ക്ഷേത്രദർശനം നടത്തി കഴിയുന്ന രീതിയിൽ വഴിപാടുകൾ നടത്തുകയെങ്കിലും ചെയ്യണം. വ്രതം നോൽക്കുന്നവർ അന്ന് കഴിയുന്നത്ര നേരം ക്ഷേത്രത്തിൽ തന്നെ കഴിയുകയും മുരുക മന്ത്രങ്ങൾ, കീർത്തനങ്ങള് എന്നിവ ജപിക്കുകയും വേണം. പ്രസിദ്ധ ഗായകൻ മണക്കാട് ഗോപൻ ആലപിച്ച എല്ലാ വിധത്തിലുമുള്ള ദാരിദ്ര്യം നശിപ്പിക്കുന്ന ഗുഹ സ്തവംകേൾക്കാം :
ജോതിഷി പ്രഭാസീന സി പി
+91 9961 442256
(ഹരിശ്രീ, മമ്പറം പി.ഒ, പിണറായി, കണ്ണൂർ)
Email: prabhaseenacp@gmail.com)
Story Summary: Significance and Benefits Of Kumbha Masa Shashi Vritham
ആത്മീയ വിശേഷങ്ങളും ജ്യോതിഷ പ്രവചനങ്ങളും സംബന്ധിച്ച വാര്ത്തകള് അപ്പപ്പോള് ലഭിക്കാന്, അസ്ട്രോ ജി, നേരം ഓൺലൈൻ ആപ് ഡൗണ്ലോഡ് ചെയ്യുക : AstroG App
Copyright 2025 riyoceline.com/projects/Neram/. All rights reserved
