Tuesday, November 17, 2026
Tuesday, November 17, 2026
Home » തിരുപ്പതി ബാലാജിയുടെ വിഖ്യാതചിത്രം വരച്ച കലാകാരൻ എസ്.എം. ശ്രീനിവാസൻ അന്തരിച്ചു

തിരുപ്പതി ബാലാജിയുടെ വിഖ്യാതചിത്രം വരച്ച കലാകാരൻ എസ്.എം. ശ്രീനിവാസൻ അന്തരിച്ചു

by മംഗളഗൗരി
0 comments

കോവിൽപട്ടി (തമിഴ്‌നാട്): ഇന്ത്യയിലുടനീളമുള്ള ദശലക്ഷക്കണക്കിന് വീടുകളിലും ആരാധനാലയങ്ങളിലും പൂജിക്കപ്പെടുന്ന തിരുമല വെങ്കിടേശ്വര സ്വാമിയുടെ (തിരുപ്പതി ബാലാജി) വിഖ്യാത ഛായാചിത്രങ്ങൾ വരച്ച പ്രമുഖ ചിത്രകാരൻ എസ്.എം. ശ്രീനിവാസൻ (86) അന്തരിച്ചു. വാർദ്ധക്യസഹജമായ അസുഖങ്ങളെത്തുടർന്ന് തമിഴ്‌നാട്ടിലെ തൂത്തുക്കുടി ജില്ലയിലുള്ള കോവിൽപട്ടിയിലെ വീട്ടിലായിരുന്നു അന്ത്യം.

1970-ൽ തിരുമല തിരുപ്പതി ദേവസ്ഥാനത്തിന്റെ (TTD) പ്രത്യേക ക്ഷണപ്രകാരമാണ് ശ്രീനിവാസൻ തിരുപ്പതിയിലെത്തിയത്. ക്ഷേത്ര ശ്രീകോവിലിന് ഉള്ളിൽ കടന്ന് മൂലവിഗ്രഹം നേരിൽ കണ്ട് വരയ്ക്കാനുള്ള അപൂർവ അവസരം അദ്ദേഹത്തിന് ലഭിച്ചു. തിരുപ്പതി ഭഗവാന്റെ രണ്ട് പ്രശസ്തമായ ചിത്രങ്ങളാണ് അദ്ദേഹം ക്യാൻവാസിലേക്ക് പകർത്തിയത്—പരമ്പരാഗത ആഭരണങ്ങളാൽ അലങ്കരിച്ച രൂപവും ആഭരണങ്ങളില്ലാത്ത രൂപവും.

തിരുമല തിരുപ്പതി ദേവസ്ഥാനം ഔദ്യോഗികമായി അംഗീകരിച്ച ഈ ചിത്രങ്ങൾ പിന്നീട് ശിവകാശിയിലെ പ്രസ്സുകളിലൂടെ കലണ്ടറുകളായും പോസ്റ്ററുകളായും ഫ്രെയിം ചെയ്ത ഫോട്ടോകളായും രാജ്യമെമ്പാടും പ്രചരിച്ചു. പതിറ്റാണ്ടുകളായി ഭക്തരുടെ മനസ്സിൽ പതിഞ്ഞ തിരുപ്പതി ബാലാജിയുടെ രൂപത്തിന് പിന്നിൽ ശ്രീനിവാസന്റെ കരവിരുതാണ്.

തൂത്തുക്കുടി ജില്ലയിലെ കോവിൽപട്ടി സ്വദേശിയായ അദ്ദേഹം പത്താം ക്ലാസ് വരെയുള്ള വിദ്യാഭ്യാസത്തിന് ശേഷം പ്രശസ്ത ചിത്രകാരൻ കൊണ്ടയ്യ രാജുവിന്റെ കീഴിലാണ് ചിത്രകല അഭ്യസിച്ചത്. തിരുപ്പതി ചിത്രങ്ങൾക്ക് പുറമെ നിരവധി ദേവീദേവന്മാരുടെ ചിത്രങ്ങൾ അദ്ദേഹം വരച്ചിട്ടുണ്ട്. പ്രശസ്തിയുടെ പ്രഭയിൽ നിന്ന് സ്വയം അകന്നുനിന്ന് ലളിത ജീവിതം നയിച്ച ശ്രീനിവാസന്റെ വിയോഗത്തിൽ കലാ-ആത്മീയ രംഗത്തെ പ്രമുഖരും ഭക്തരും അനുശോചനം രേഖപ്പെടുത്തി.

(നേരം ഓൺ ലൈൻ വാട്‌സ്ആപ്പിലും ലഭിക്കും : NeramOnline.com . നേരം ഓൺലൈനിൻ പ്രസിദ്ധീകരിക്കാൻ ലേഖനങ്ങൾ, ചിത്രങ്ങൾ, വീഡിയോകൾ അയയ്ക്കേണ്ട വാട്‌സ്ആപ്പ് നമ്പർ : + 91 81380 15500 . Visit our online store https://www.okalasha.com, for Devotional Decors, Photos, Jewels and Book’s etc)

ALSO READ

Copyright @ 2026 NeramOnline.com . All rights reserved.

You may also like

Leave a Comment

Are you sure want to unlock this post?
Unlock left : 0
Are you sure want to cancel subscription?