നേരം ഓൺ ലൈൻ ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വിശേഷങ്ങൾക്കായി ക്ലിക്ക് ചെയ്യൂ : riyoceline.com/projects/Neram/
വെള്ളിയോട്ടില്ലം പി. ഈശ്വരൻ നമ്പൂതിരി
ആത്മസമർപ്പണമാണ് വഴിപാട്. തനം, മനം, ധനം
എന്നിവ അർപ്പിക്കുന്നത് പൂർണ്ണമായ സമർപ്പണമാണ്.
എന്താണ് തനം മനം ധനം? മനസും ശരീരവും ധനവും. അതായത് തനിക്കു സ്വന്തമായുള്ളത് മൂന്നും സമർപ്പിക്കലാണ് തനമനധന സമർപ്പണം.
വ്രതവും ദർശനവും കൊണ്ട് ശരീരവും പ്രാർത്ഥന മനസ്സും നിവേദ്യങ്ങൾ കൊണ്ട് ധനവും സമർപ്പിക്കുന്നതാണ് ആറ്റുകാൽ പൊങ്കാല.
ചുരുക്കിപ്പറഞ്ഞാൽ ഇഷ്ടമുള്ള എന്ത് നിവേദ്യവും വഴിപാടും നടത്തി നിഷ്കളങ്കമായി പ്രാർത്ഥിച്ചാൽ ആറ്റുകാൽ അമ്മ പ്രസാദിക്കും. 2025 മാർച്ച് 13 വ്യാഴാഴ്ചയാണ് ഇത്തവണ പൊങ്കാല. രാവിലെ 10:15 ന് പൊങ്കാലയ്ക്ക് അഗ്നി പകരും. ഉച്ചയ്ക്ക് 1:15 നാണ് നിവേദ്യം.
ഐതിഹ്യങ്ങൾ
ആറ്റുകാലമ്മയുടെ സുപ്രധാന ദിവസമായ കുംഭത്തിലെ പൂരം നക്ഷത്രത്തിലാണ് ഭക്തർ അമ്മയ്ക്ക് നേരിട്ട് നിവേദ്യം സമർപ്പിക്കുന്നത്. നിരപരാധിയായ തന്റെ ഭർത്താവിനെ വധിച്ചതിൽ മനംനൊന്ത് കണ്ണകിയുടെ നേത്രാഗ്നി മധുരാനഗരം ചുട്ടെരിച്ചു. എന്നിട്ടും കോപം ശമിക്കാതെ വർത്തിച്ച കണ്ണകിയെ ശാന്തയാക്കാൻ ഭക്തർ പൊങ്കാല അർപ്പിച്ചു പ്രാർത്ഥിക്കുന്നു എന്നാണ്
ഐതിഹ്യം. ഒടുവിൽ കണ്ണകി ആദിപരാശക്തിയുടെ മാതൃഭാവമായ കൊടുങ്ങല്ലൂരമ്മയിൽ ലയിച്ചു ചേർന്നു.
കൊടുങ്ങല്ലൂരമ്മയുടെ ചൈതന്യം പാടി ആവാഹിച്ച് കൊണ്ടുവന്ന് കാപ്പുകെട്ടി കുടിയിരുത്തിയാണ് ആറ്റുകാൽ പൊങ്കാല മഹോത്സവം ആരംഭിക്കുന്നത്.
കുംഭമാസത്തിലെ പൂരം നാളിൽ മഹിഷാസുര നിഗ്രഹം നടത്തി ഭദ്രകാളിയായ ദേവിയെ സൗമ്യ ഭാവത്തിലേക്ക് നയിക്കുന്നതിന് പൊങ്കാലയിട്ട് പ്രാർത്ഥിക്കുന്നു എന്നാണ് മറ്റൊരു ഐതിഹ്യം. ശിവനെ പ്രീതിപ്പെടുത്താൻ സൂര്യന് അഭിമുഖമായി നിന്ന് വായു ഭക്ഷിച്ച് കഠിനമായ സൂര്യതാപം ഏറ്റുവാങ്ങി തപസ് ചെയ്ത പാർവ്വതി ദേവി സങ്കല്പത്തിലാണ് പൊങ്കാല എന്നും ഐതിഹ്യമുണ്ട്. സൂര്യമണ്ഡല മധ്യസ്ഥയാണ് ആറ്റുകാലമ്മ എന്ന സങ്കല്പ പ്രകാരം ഭക്തർ അമ്മയ്ക്ക് നിവേദ്യം തയ്യാറാക്കുന്നു
എന്ന വ്യാഖ്യാനത്തിനും സാംഗത്യമുണ്ട്.
ALSO READ
അഭീഷ്ടസിദ്ധി ഫലം
ഐതിഹ്യങ്ങൾ എന്തായാലും ആറ്റുകാലമ്മയ്ക്ക്
പൊങ്കാലയിടുന്നതിലൂടെ ആഗ്രഹസാഫല്യം, മന:സുഖം എന്നിവ ലഭിക്കുമെന്നത് ലക്ഷക്കണക്കിന് ഭക്തരുടെ
അനുഭവമാണ്. ദോഷപരിഹാരവും മുഖ്യ ഫലമാണ്. പൊങ്കാല ഇടുന്നതിന് ഓരോരുത്തർക്കും ഓരോരോ കാരണമുണ്ട്. വിവാഹം, ആരോഗ്യം, ആയുസ്, ജോലി, രോഗമുക്തി, ഭൂമി, ഗൃഹം ഇവ സംബന്ധിച്ച ആഗ്രഹ സാഫല്യം പൊങ്കാല ഇടുന്നതിലൂടെ ലഭ്യമാകുന്നു എന്ന് വിശ്വാസം. അർപ്പണ ബുദ്ധിയോടെ പൂർണ്ണമായ ആത്മ സമർപ്പണത്തോടെ അമ്മയ്ക്ക് നിവേദ്യം അർപ്പിക്കുമ്പോൾ അതിന്റെ ഫലം അനുഭവത്തിൽ വരും.
വ്രതം എങ്ങനെ വേണം
പൊങ്കാലയിടാൻ 3 ദിവസം വ്രതമെടുക്കണം. അതിനു കഴിയാത്തവർ തലേ ദിവസമെങ്കിലും വ്രതമെടുക്കണം. സാധാരണ വ്രതങ്ങൾ പോലെ തലേന്ന് ഒരിക്കലെടുത്ത് മത്സ്യമാംസാദിവെടിഞ്ഞ് സഹശയനം ഉപേക്ഷിച്ച് ദേവീ സംബന്ധമായ പ്രാർത്ഥനകളിലും പൂജകളിലും മുഴുകി കഴിയണം. തലേന്ന് പുലർച്ചെ കുളിച്ച് ക്ഷേത്രദർശനം നടത്തണം. ഒരുനേരം അരിയാഹാരം കഴിക്കാം. ബാക്കി രണ്ടുനേരം ഫലവർഗ്ഗങ്ങൾ ആകാം. അല്ലെങ്കിൽ ഗോതമ്പു ഭക്ഷണം കഴിക്കാം. രണ്ടുനേരവും കുളിയും പ്രാർത്ഥനയും വേണം. കഴിയുമെങ്കിൽ ക്ഷേത്രദർശനവും നടത്തണം. പിറ്റേന്ന് പൊങ്കാല നിവേദ്യം കഴിഞ്ഞ ശേഷം ആഹാരം കഴിക്കാം.
മൺകലം ഭൂമി പ്രതീകം
മൺകലത്തിലാണ് പൊങ്കാല ഇടേണ്ടത്. മൺകലം എന്നുപറയുന്നത് പഞ്ചഭൂതത്തിൽ ഏറ്റവും പ്രധാനമായ ഭൂമിയെ പ്രതിനിധീകരിക്കുന്നു. സ്വർണ്ണപ്പാത്രം, വെള്ളിപ്പാത്രം, പിച്ചള, ചെമ്പ് പാത്രങ്ങളിലൊക്കെ നിവേദ്യം തയ്യാറാക്കാമെങ്കിലും മൺകലത്തിലെ പൊങ്കാലയ്ക്കു തന്നെയാണ് പ്രാധാന്യം കൂടുതൽ. നിത്യവും ക്ഷേത്രത്തിൽ പന്തീരടി പൂജയ്ക്ക് മൺകലത്തിൽ ഒരു നിവേദ്യം നിവേദിച്ചുവരുന്നു.
ശുദ്ധി പ്രധാനം
പുതുവസ്ത്രം പുതിയ കലം തുടങ്ങിയവ പൊങ്കാലയ്ക്ക് ഉപയോഗിക്കണമെന്നു പറയുന്നതിന് കാരണം
ഇവയൊക്കെ നമ്മുടെ മാനസിക ശുദ്ധി, ശാരീരികശുദ്ധി എന്നിവയെ പ്രതിനിധീകരിക്കുന്നു എന്നതാണ്. കുളിച്ച് പുതുവസ്ത്രം ധരിച്ച് ഇറങ്ങുമ്പോഴുള്ള ശാരീരിക ഉണർവ്വ് പഴയ വസ്ത്രം ധരിച്ചാൽ ഉണ്ടാകില്ല. വ്രതത്തിന്റെയും വിശ്വാസത്തിന്റെയുമൊക്കെ പ്രതീകമായിട്ടാണ് പുതുവസ്ത്രവും പുതുകലവും ഉപയോഗിക്കുന്നത്.
നിവേദ്യങ്ങൾ പലത്
ശർക്കരപ്പായസം, പഞ്ചസാരപ്പായസം, പാൽപ്പായസം, വെള്ളനിവേദ്യം, തെരളി, അട മുതലായവയാണ്
പൊങ്കാലയായി സമർപ്പിക്കുന്നത്. ഓരോന്നിനും ഓരോ ഫലമാണ്. എങ്കിലും മധുരപദാർത്ഥങ്ങളെല്ലാം വശ്യമായിട്ടും ആവിക്ക് പുഴങ്ങുന്ന അട, തെരളി ഇവ മാംസമായിട്ടുമാണ് സങ്കല്പം. നമ്മുടെ സങ്കല്പത്തെ അനുസരിച്ച് ഫലം ചിന്തിക്കുന്നതാണ് ഉചിതം.
കിഴക്കോട്ട് തുകിയാൽ സാഫല്യം
പൊങ്കാല തിളച്ചു തൂവുന്നതിന് ഫലമുണ്ട്.
കിഴക്കുദർശനമായി പൊങ്കാലയിടുന്നവർക്കു കിഴക്കുദിശയിലേക്ക് തൂകുന്നത് സാഫല്യമാണ്.
വെള്ളിയോട്ടില്ലം പി. ഈശ്വരൻ നമ്പൂതിരി
ആറ്റുകാൽ ഭഗവതി ക്ഷേത്രം മേൽശാന്തി
Story Summary: Attukal Pongala: Date, significance and all you need to know
ആത്മീയ വിശേഷങ്ങളും ജ്യോതിഷ പ്രവചനങ്ങളും സംബന്ധിച്ച വാര്ത്തകള് അപ്പപ്പോള് ലഭിക്കാന്, അസ്ട്രോ ജി, നേരം ഓൺലൈൻ ആപ് ഡൗണ്ലോഡ് ചെയ്യുക : AstroG App
Copyright 2025 riyoceline.com/projects/Neram/. All rights reserved
