പി ഹരികൃഷ്ണൻ
ചതുർമാസ്യ വ്രതകാലത്ത് വലത് തിരിഞ്ഞ് ഉറക്കം തുടങ്ങിയ വിഷ്ണു ഭഗവാൻ ഇടതുവശം തിരിഞ്ഞ് കിടക്കുന്ന ദിനത്തിൽ വരുന്ന ഏകാദശിയായ പരിവർത്തന ഏകാദശി 2025 സെപ്തംബർ 3, 1201 ചിങ്ങം 18 ബുധനാഴ്ചയാണ്. യോഗനിദ്രയിൽ കഴിയുന്ന ഭഗവൻ്റെ പരിവർത്തന ദിനമായതിനാലാണ് ഇതിന് ഈ പേര് ലഭിച്ചത്. ഭാദ്രപദമാസത്തിലെ ശുക്ലപക്ഷ ഏകാദശിയിൽ വരുന്ന ഈ പുണ്യ ദിനത്തിന് പാർശ്വ
പരിവർത്തന ഏകാദശി, വാമന ഏകാദശി, പദ്മ ഏകാദശി, ജയന്തി ഏകാദശി തുടങ്ങി ഇത് പല പേരുകളിൽ അറിയപ്പെടുന്നു.
🟠 വാമന ഏകാദശിയും മഹാബലിയും
വാമനരൂപത്തിൽ വന്ന വിഷ്ണുഭഗവാൻ അസുര ചക്രവർത്തിയായ മഹാബലിയെ സുതലത്തിലേക്ക് അയച്ച ഓണാഘോഷ ഐതിഹ്യം ഈ ഏകാദശിയുമായി ബന്ധപ്പെട്ടിരിക്കുന്നു. ബുധനാഴ്ച രാത്രി 10:15 ന് തുടങ്ങുന്ന ഹരിവാസര വേള വ്യാഴാഴ്ച രാവിലെ 10:18 മണിക്ക് അവസാനിക്കും. ഏകാദശി വ്രതത്തിൻ്റെ സുപ്രധാന സമയമാണ് ഹരിവാസര വേള. ഈ സമയത്ത് ഊണും ഉറക്കവും വെടിഞ്ഞ് ഭക്തർ അഖണ്ഡനാമ ജപം നടത്താറുണ്ട്.
🟠 ലക്ഷ്മീനാരായണ പ്രീതി നേടാം
വിഷ്ണുപ്രീതിയും ലക്ഷ്മീപ്രീതിയും ഒന്നിച്ച് നേടാൻ ഈ ദിവസത്തെ വ്രതം സഹായിക്കുന്നു. പരിവർത്തന ഏകാദശി ദിവസം ലക്ഷ്മീ പൂജ നടത്തുന്നത് വളരെ ഐശ്വര്യപ്രദമാണ്. ഈ പരിവർത്തന ഏകാദശി വ്രതം അനുഷ്ഠിച്ചാൽ ദാമ്പത്യ ബന്ധം സുദൃഢമാകും. ധനം ഐശ്വര്യം, കീർത്തി, പാപമോചനം എന്നിവയെല്ലാം ലഭിക്കും എന്ന് പറയുന്നു.
🟠 ഏകാദശി മഹാത്മ്യം
ഏറ്റവും കൂടുതൽ പ്രചാരമുള്ള വ്രതമാണ് ഏകാദശി. ഈ വ്രതം എടുക്കുന്നതിന്റെ പ്രാധാന്യം മനസിലാക്കി ഭക്തിയോടെ, ശ്രദ്ധയോടെ അനുഷ്ഠിച്ചാൽ അത്ഭുത ഗുണസിദ്ധിയും ഫലസിദ്ധിയും തീർച്ചയാണ്. ഏകാദശി
മാസത്തിൽ രണ്ടെണ്ണമുണ്ട്. ഒന്ന് കറുത്തപക്ഷത്തിലെ ഏകാദശി; മറ്റേത് വെളുത്ത പക്ഷത്തിലേത്. രണ്ടും പ്രധാനപ്പെട്ടത് തന്നെ. എന്നാൽ വെളുത്തപക്ഷത്തിലെ ഏകാദശിയാണ് ചിലർ മുഖ്യമായി കൊണ്ടാടുന്നത്.
🟠 വ്രതനിഷ്ഠ , പ്രാർത്ഥനകൾ
ഏകാദശി നാളിൽ വ്രതശുദ്ധിയോടെ ഉപവാസം അനുഷ്ഠിച്ച് മഹാവിഷ്ണുവിനെ ധ്യാനിച്ച് പൂജിക്കണം. വിഷ്ണു അഷ്ടോത്തരം,വിഷ്ണു ശതനാമ സ്തോത്രം, വിഷ്ണു സഹസ്രനാമം, അച്യുതാഷ്ടകം, വിഷ്ണു കീർത്തനാലാപം എന്നിവ വളരെ ഗുണപ്രദമാണ്. ദശമി ദിവസം മത്സ്യ മാംസാദികൾ ത്യജിച്ച്, ഒരുനേരം മാത്രം അരി ഭക്ഷണം കഴിച്ച് ഏകാദശിനാൾ അതിരാവിലെ കുളിച്ച് വിഷ്ണു ക്ഷേത്രദർശനം നടത്തി ഭജിക്കണം. തുളസിനീര് കഴിക്കുന്നതും തുളസിത്തറയ്ക്ക് വലം വയ്ക്കുന്നതും വളരെ നല്ലതാണ്. പകലുറക്കം പാടില്ല. ബ്രഹ്മചര്യം പാലിക്കണം സദാസമയവും വിഷ്ണു ഭജന മാത്രം നടത്തുക. പിറ്റേദിവസം കുളിച്ച് വിഷ്ണുപൂജ നടത്തി നിവേദ്യം അർപ്പിച്ച് ദാനം നൽകി വ്രതം മുറിക്കാം. ഏകാദശിവ്രതങ്ങൾ പല പേരുകളിലറിയപ്പെടുന്നു. ഇതിൽ പരിവർത്തന ഏകാദശി സുപ്രധാനമായ ഒന്നായി കണക്കാക്കപ്പെടുന്നു.
ALSO READ
Story Summary: Significance and Rituals of Parivartana Ekadeshi
Copyright 2025 riyoceline.com/projects/Neram/. All rights reserved
