ജ്യോതിഷി പ്രഭാസീന സി പി
കന്നിമാസത്തിലെ കറുത്ത പക്ഷത്തിൽ വരുന്ന ഏകാദശിയായ ഇന്ദിരാ ഏകാദശി 2025 സെപ്റ്റംബർ 17 ബുധനാഴ്ചയാണ്. ഇന്ദിരാദേവിക്ക് പ്രിയങ്കരമായ ഈ ഏകാദശിയിൽ ലക്ഷ്മീ ദേവിയെയും വിഷ്ണു ഭഗവാനെയും ഭജിച്ചാൽ അളവറ്റ ഐശ്വര്യമാണ് ഫലം.
സാക്ഷാൽ മഹാലക്ഷ്മിയുടെ മറ്റൊരു പേരാണ് ഇന്ദിര. ശ്രേഷ്ഠമായ ഇന്ദിരാ ഏകാദശിയോടനുബന്ധിച്ച് വ്രതമെടുക്കുകയും ദാനധർമ്മാദികൾ നടത്തുകയും കൂടി ചെയ്താൽ തലമുറകളായുള്ള പിതൃദോഷങ്ങളും പാപ ദുരിതങ്ങളും ശമിക്കുകയും ഐശ്വര്യസമൃദ്ധി ലഭിക്കുകയും ചെയ്യുമെന്നും പറയുന്നു.
🟠 മൂലമന്ത്രം ജപിക്കണം
ഏറെ പ്രശസ്തവും, മഹാവിഷ്ണുപ്രീതിക്ക് ഏറ്റവും ഉത്തമവുമായ ഏകാദശി വ്രതത്തിന്റെ ഫലങ്ങൾ എണ്ണിയാൽ തീരാത്തതാണ്. വിഷ്ണു പ്രീതി നേടാൻ ഏറ്റവും ലളിതമായ മാർഗ്ഗമാണ് ഈ വ്രതാചരണം. തികഞ്ഞ ചിട്ടയോടെ ഏകാദശി വ്രതം പാലിക്കുകയും, വിഷ്ണു ഭഗവാന്റെ മൂലമന്ത്രമായ ഓം നമോ നാരായണായ ജപിക്കുകയും ചെയ്താൽ വിഷ്ണു പ്രീതിയിലൂടെ എല്ലാവിധത്തിലുമുള്ള ദുരിതങ്ങള്ക്കും പരിഹാരം ഉണ്ടാകും. ഭൗതികജീവിതത്തില് അളവറ്റ ഐശ്വര്യവും, ജീവിതാന്ത്യത്തില് മോക്ഷവുമാണ് ഏകാദശി വ്രതത്തിന്റെ ഫലം. വ്രതമെടുക്കുന്നവർ ദശമി, ഏകാദശി, ദ്വാദശി എന്നീ മൂന്ന് ദിനങ്ങളില് ഏകാഗ്രതയോടെ വിഷ്ണു ഭജനം നടത്തണം. എല്ലാമാസത്തിലെയും രണ്ട് പക്ഷത്തിലെയും ഏകാദശി വ്രതം അനുഷ്ഠിക്കാം.
🟠 കന്നി ഒന്നും ഏകാദശിയും ഒന്നിച്ച്
കന്നി മാസത്തിലെ മഹാളയപക്ഷത്തിൽ വരുന്ന ഇന്ദിര ഏകാദശി ഇത്തവണ കന്നി മാസപ്പുലരിയിലാണ് വരുന്നത്. ബുധനാഴ്ച പുലരുന്ന രാത്രി 1:47 നാണ് കന്നി രവി സംക്രമം. അന്ന് വൈകിട്ട് 05:49 മുതൽ വ്യാഴാഴ്ച പുലരുന്ന 05:39 വരെയാണ് വിഷ്ണുചൈതന്യം ഏറ്റവും കൂടുതൽ ഭൂമിയിൽ നിറയുന്ന ഹരിവാസര വേള. ഏകാദശി നോൽക്കുമ്പോൾ പ്രധാനമായും ശ്രദ്ധിക്കേണ്ടത് ഹരിവാസരമാണ്. ഏകാദശിയുടെ ഒടുവിലത്തെ 6 മണിക്കൂറും ദ്വാദശിയുടെ ആദ്യത്തെ 6 മണിക്കൂറുമടങ്ങിയ 12 മണിക്കൂറാണ് ഹരിവാസരം. ഈ സമയത്ത് ആഹാരവും ഉറക്കവും പാടില്ല. അപ്പോൾ പൂർണ ഉപവാസമെടുക്കുക തന്നെ വേണം. ഈ സമയത്തെ നാമം ജപം ആഗ്രഹസാഫല്യം നൽകും. തികഞ്ഞ ഭക്തിയോടെ വ്രതമനുഷ്ഠിച്ചാൽ മാത്രമേ പൂർണ്ണഫലം ലഭിക്കുകയുളളൂ. ജാതകവശാൽ വ്യാഴം അനുകൂലം അല്ലാത്തവർക്ക് ദോഷകാഠിന്യം കുറയ്ക്കാനും ഈ വ്രതം ഉത്തമമാണ്.
🟠 വ്രതനിഷ്ഠകൾ പാലിക്കണം
ഏകാദശി വ്രതമെടുക്കുന്നവർ മത്സ്യമാംസാദികൾ ഉപേക്ഷിക്കണം. ഏകാദശിയുടെ തലേന്ന് ദശമി ദിവസവും ദ്വാദശിദിവസവും ഉച്ചയ്ക്ക് ഊണ് കഴിക്കാം. മറ്റ് നേരങ്ങളില് പഴവര്ഗ്ഗങ്ങള് കഴിക്കാം. ഏകാദശി ദിവസം പൂർണ്ണ ഉപവാസം വേണം. കഴിയാത്തവർക്ക് ഒരു നേരം പഴങ്ങളോ മറ്റോ കഴിക്കാം. ഈ ദിവസങ്ങളിൽ എണ്ണതേച്ചു കുളിക്കരുത്. പകലുറക്കം പാടില്ല. തുളസി നനയ്ക്കണം. തുളസിത്തറയ്ക്കു മൂന്ന് പ്രദക്ഷിണം വയ്ക്കണം. ബ്രഹ്മചര്യനിഷ്ഠ പാലിക്കണം. ഏകാദശി ദിവസം പ്രഭാത സ്നാന ശേഷം വിഷ്ണു ഭഗവാനെ ധ്യാനിക്കുകയും സാധിക്കുമെങ്കില് വൈഷ്ണവ ക്ഷേത്രദർശനം നടത്തി അര്ച്ചന നടത്തുകയും വേണം. വിഷ്ണുസഹസ്രനാമം, വിഷ്ണു അഷ്ടോത്തരം, വിഷ്ണു ശതനാമ സ്തോത്രം, ഭാഗവതം, നാരായണീയം, ഭഗവദ്ഗീത എന്നീ ഗ്രന്ഥങ്ങൾ പാരായണം ചെയ്യുകയോ ശ്രവിക്കുകയോ ചെയ്യുക. ഓം നമോ നാരായണയാ,
ഓം നമോ ഭഗവതേ വാസുദേവായ എന്നീ മന്ത്രങ്ങൾ 108 പ്രാവശ്യം ജപിക്കണം. ദ്വാദശി ദിവസം രാവിലെ വ്രതം മുറിക്കാം.
🟠 വിഷ്ണുശതനാമ സ്തോത്രം
ഏകാദശിവ്രതം അനുഷ്ഠിക്കുന്നവർ ഏറ്റവും കൂടുതൽ ജപിക്കുന്ന ഒന്നാണ് വിഷ്ണു ശതനാമ സ്തോത്രം. വിഷ്ണു ഭഗവാനെ ഈ 100 നാമങ്ങളാൽ എന്നും ഭജിക്കുന്നവരുടെ ജീവിതത്തിൽ അശുഭങ്ങൾ ഉണ്ടാകാറില്ല. കേൾക്കാം : പ്രസിദ്ധ ഗായകൻ മണക്കാട് ഗോപൻ ആലപിച്ച വിഷ്ണു ശതനാമ സ്തോത്രം:
ALSO READ
ജ്യോതിഷി പ്രഭാസീന സി പി
Email ID prabhaseenacp@gmail.com
+91 9961442256
Story Summary : Story Summary : Importance of Indira Ekadashi on 2025 September 17
Copyright 2025 riyoceline.com/projects/Neram/. All rights reserved
