ഉഗ്രരൂപിണിയായ ഭഗവതിയാണ് ഭദ്രകാളി. എന്നാൽ പരിശുദ്ധമായ മനസ്സോടെ ഭക്തിയോടും ശ്രദ്ധയോടും പ്രാർത്ഥിക്കുന്നവരെ എല്ലാം വാരിക്കോരി നൽകി അമ്മ സംരക്ഷിക്കും. അവർക്ക് യാതൊരു ദോഷവും ഉണ്ടാകില്ല. ഒരേസമയം ദുഷ്ടരെ സംഹരിക്കുന്ന ഉഗ്രരൂപിണിയായും മാതൃവാത്സല്യത്തോടു കൂടിയ ഏറ്റവും ശാന്തയായ അമ്മയായും ഭദ്രകാളി ദേവിയെ ഭജിക്കാം. എല്ലാ ഭദ്രങ്ങളും അതായത് മംഗളങ്ങളും തരുന്ന ഭഗവതിയായതു കൊണ്ടാണ് അമ്മ ഭദ്രകാളി ആയത്.
വൈദിക സങ്കല്പത്തിൽ സൗമ്യദേവത
ആരാധനാക്രമങ്ങളിൽ വ്യത്യാസം ഉണ്ടെങ്കിലും ജാതി പരിഗണനകളും ഉച്ചനീചത്വങ്ങളുമില്ലാതെ എല്ലാ വിഭാഗം ഹൈന്ദവരും ഭദ്രകാളിയെ ആരാധിക്കുന്നു. കാവുകളുമായി ബന്ധപ്പെട്ടാണ് ഭദ്രകാളി ആരാധന ഇവിടെ കൂടുതലും കാണപ്പെടുന്നത്. കൊടുങ്ങല്ലൂർകാവ്, പനയന്നാർ കാവ്, മണ്ണടിക്കാവ്, മാടായിക്കാവ് തുടങ്ങി പ്രസിദ്ധമായ മിക്ക ഭദ്രകാളി ക്ഷേത്രങ്ങളും കാവുകളുടെ അനുബന്ധമായി നിർമ്മിച്ചവയാണ്. വൈദിക സങ്കല്പങ്ങളിൽ കാളി സൗമ്യദേവതയാണ്. വൈദിക, താന്ത്രിക ക്രമങ്ങളിൽ ഭഗവതി പൂജാ ദുർഗ്ഗാപൂജ തുടങ്ങി സാത്വിക കർമ്മങ്ങളാണ് നിലനിൽക്കുന്നത്. എന്നാൽ പണ്ടുകാലത്ത് പാരമ്പര്യ കാളീ ആരാധന രീതിയിലും ബ്രഹ്മണേതരുടെ ശാക്തേയ പൂജകളിലും മദ്യം, ജന്തുബലി തുടങ്ങിയവയുണ്ടായിരുന്നു. ഇപ്പോൾ അതെല്ലാം ഒഴിവായി. പകരം കളമെഴുത്ത്, പാട്ട്, കുത്തിയോട്ടം, ഗുരുതി, ബലി, തുടങ്ങിയ അനുഷ്ഠാന കർമ്മങ്ങളാണ് നമ്മുടെ കാളീപൂജയുടെ വകഭേദങ്ങൾ.
സ്ത്രീകളെ ഉപദ്രവിക്കരുത്
ഭദ്രകാളി പ്രീതി ആഗ്രഹിക്കുന്നവർ സ്ത്രീകളെ ഒരു കാരണവശാലും ഉപദ്രവിക്കരുത് , അവരെ വേദനിപ്പിക്കരുത്. തമോഗുണ പ്രധാനയായ കാളിക്ക് പ്രിയങ്കരം ചുവന്ന പൂക്കൾ കൊണ്ടുള്ള ആരാധനയാണ്. ഭദ്രകാളിയെ പൂജിക്കുന്നതിന് ഏറ്റവും നല്ല ദിവസങ്ങൾ ചൊവ്വ, വെള്ളി, ഭരണി, അഷ്ടമി, അമാവാസി എന്നിവയാണ്.
ഐതിഹ്യങ്ങൾ അനവധി
കാലങ്ങളായി കേരളത്തിൽ ക്ഷതമേൽക്കാതെ നിൽക്കുന്നത് ഭദ്രകാള്യാരാധനയാണ്. മിക്ക കേരളീയ ഹൈന്ദവ കുടുംബങ്ങളുടെയും പരദേവത, ധർമ്മദൈവം ഭദ്രകാളിയാണ്. ഹിമവാന്റെ പുത്രിയും പരമേശ്വര പത്നിയുമാണ് കാളി എന്ന് ഒരു സങ്കല്പമുണ്ട്. ഭഗവാൻ കാളി എന്ന് കളിയാക്കി വിളിച്ചത് തന്റെ കറുത്ത ശരീരം ശിവന് ഇഷ്ടമല്ലാത്തത് കൊണ്ടാണെന്ന് പാർവ്വതി തെറ്റിദ്ധരിച്ചു. തുടർന്ന് പാർവതി ബ്രഹ്മാവിനെ തപസ് ചെയ്ത് വരം നേടിയപ്പോൾ കറുത്ത ചർമ്മം അടർന്ന് വീഴുകയും ദേവി ഗൗരവർണ്ണമുള്ള ഗൗരിയായി മാറുകയും ചെയ്തു എന്ന് ദേവീഭാഗവതത്തിൽ പറയുന്നു. സതി ദേഹത്യാഗം ചെയ്തത് അറിഞ്ഞ് കോപിച്ച പരമശിവൻ ദക്ഷനോടുള്ള പ്രതികാരം തീർക്കാൻ തന്റെ ജട നിലത്തടിച്ച് സൃഷ്ടിച്ചതാണ് ഭദ്രകാളിയെ എന്നും ദേവീഭാഗവതത്തിൽ തന്നെ പറയുന്നുണ്ട്. അതിഭയങ്കര മുഖത്തോട് കൂടിയ, കയ്യിൽ വാളും പാശവും ധരിച്ചിരിക്കുന്ന കാളി, സിംഹാസനസ്ഥയായ ദേവിയുടെ നെറ്റിത്തടത്തിൽ നിന്നുമാണ് അപ്പോൾ ഉത്ഭവിച്ചതത്രേ.
കേരളത്തിൽ മുഖ്യം ദാരികവധം
ഇങ്ങനെ കാളിയെക്കുറിച്ച് നിരവധി കഥകൾ ഉണ്ടെങ്കിലും കേരളത്തിൽ ഭദ്രകാളീ ആരാധനയ്ക്ക് അടിസ്ഥാനം ദാരികവധമാണ്. ദാരികാസുരനെ നിഗ്രഹിക്കാൻ ശിവന്റെ തൃക്കണ്ണിൽ നിന്നും ഭദ്രകാളി ആവിർഭവിച്ച കഥ മാർക്കണ്ഡേയ പുരാണത്തിലുണ്ട്. മറ്റ് സ്ഥലങ്ങളിൽ ദുർഗ്ഗയുടെ മഹിഷാസുര നിഗ്രഹ കഥയ്ക്കാണ് പ്രാധാന്യം. ദാരികാസുരവധം സമഗ്രഹമായി പ്രതിപാദിക്കുന്ന കൃതിയാണ് ഭദ്രകാളീമഹാത്മ്യം.
ജീവിത ദുരിതങ്ങൾ മാറ്റാം
നിത്യവും ഭദ്രകാളി ദേവിയുടെ ധ്യാനവും മൂലമന്ത്രവും 7 തവണ വീതം ജപിച്ചാൽ ജീവിത ദുരിതങ്ങൾ അതിജീവിച്ച് ഐശ്വര്യസമൃദ്ധിയിലേക്ക് ചുവടുവയ്ക്കാൻ കഴിയും. ദൃഷ്ടിദോഷം ശത്രു
ദോഷം, ഭയം, പല തരത്തിലെ തിരിച്ചടികൾ എല്ലാം ഒഴിഞ്ഞു പോകും. കാർമേഘത്തിന്റെ നിറമുള്ള, മൂന്നു കണ്ണുകളുള്ള, വേതാളത്തിന്റെ കണ്ഠത്തിൽ ഇരിക്കുന്ന വാൾ, പരിച, തലയോട്ടി, ദാരികശിരസ് എന്നിവ ധരിച്ച, ഭൂതങ്ങൾ, പ്രേതങ്ങൾ, പിശാചുക്കൾ, മാതൃക്കൾ എന്നിവയോടു കൂടിയ, മനുഷ്യശിരസുകൾ കോർത്ത മാല അണിഞ്ഞ, വസൂരി മുതലായവ മഹാമാരികൾ നശിപ്പിക്കുന്ന ഭഗവതിയായാണ് ഭദ്രകാളിയെ ധ്യാനത്തിൽ വന്ദിക്കുന്നത്. കാളിയെ പ്രാർത്ഥിക്കുമ്പോൾ ഈ രൂപമാണ് മനസിൽ നിറേണ്ടത്.
ALSO READ
ഭദ്രകാളിയുടെ ധ്യാനം
കാളീം മേഘസമപ്രഭാം
ത്രിനയനാം
വേതാളകണ്ഠസ്ഥിതാം
ഖഡ്ഗം ഖേടകപാലദാരികശിര:
കൃത്വാ കരാഗ്രേഷു ച
ഭൂതപ്രേതപിശാചമാതൃസഹിതാം മുണ്ഡസ്രജാലംകൃതാം
വന്ദേ ദുഷ്ടമസൂരികാദിവിപദാം
സംഹാരിണീമീശ്വരീം
ഭദ്രകാളിയുടെ മൂലമന്ത്രം
ഓം ഐം ക്ലീം സൗ: ഹ്രീം ഭദ്രകാള്യെ നമ:
സംശയ നിവാരണത്തിനും
മന്ത്രോപദേശത്തിനും ബന്ധപ്പെടുക:
തന്ത്രരത്നം പുതുമന മഹേശ്വരൻ നമ്പൂതിരി,
+91 094-470-20655
Story Summary: Significance of Bhadrakali Worshipping
(നേരം ഓൺ ലൈൻ വാട്സ്ആപ്പിലും ലഭിക്കും. ക്ലിക്ക് ചെയ്യൂ : NeramOnline.com . നേരം ഓൺലൈനിൻ പ്രസിദ്ധീകരിക്കാൻ ലേഖനങ്ങൾ, ചിത്രങ്ങൾ, വീഡിയോകൾ അയയ്ക്കേണ്ട വാട്സ്ആപ്പ് നമ്പർ : + 91 81380 15500 . ആത്മീയ- ജ്യോതിഷ വാര്ത്തകള്ക്ക്, അസ്ട്രോ ജി, നേരം ഓൺലൈൻ ആപ് ഡൗണ്ലോഡ് ചെയ്യുക: AstroG App .)
Copyright @ 2025 NeramOnline.com . All rights reserved.
